"პატარა ანხელის დაკარგვა არ ყოფილა ერთადერთი ტრაგედია, მანამდე სამჯერ მომეშალა მუცელი" - ჯორჯინა როდრიგესი ცხოვრების რთულ პერიოდზე

Netflix-ზე კრიშტიანუ რონალდუს პარტნიორის, ჯორჯინა როდრიგესის შესახებ დოკუმენტური ფილმის მეორე ნაწილის თრეილერი გამოქვეყნდა, სადაც ჯორჯინა ცხოვრების რთულ ეტაპზე საუბრობს. ფილმის პრემიერა პარასკევსაა დაგეგმილი.

თითქმის ერთი წელია გასული, რაც კრიშტიანუ რონალდუმ და ჯორჯინა როდრიგესმა ბელა ესმერალდას დაბადებით გამოწვეულ სიხარულთან ერთად, მისი ტყუპი ძმის, ანხელის დაკარგვის ტრაგედიაც განიცადეს.

დოკუმენტურ ფილმში, "I am Georgina”, ქალი ამბობს, რომ მანამდე 3-ჯერ მოეშალა მუცელი.

"თითოეულ ულტრაბგერით გამოკვლევაზე შიშით მივდიოდი. ძალიან დაძაბული ვიყავი, რადგან მანამდე სამჯერ მომეშალა მუცელი და სახლში განადგურებული ვბრუნდებოდი ხოლმე", - ასე აღწერს ფეხბურთელის პარტნიორი გინეკოლოგთან ვიზიტებს.

ბელას გარდა, წყვილს კიდევ ერთი საერთო შვილი, გოგონა, სამი წლის ალანა ჰყავს. პორტუგალიელ ფეხბურთელს მათ გარდა 3 შვილი ჰყავს, 12 წლის კრიშტიანუ ჯუნიორი და 4 წლის ტყუპი, ევა და მატეო.

იმის გამო, რომ ჯორჯინა რონალდუს ყველა შვილს თანაბარ სიყვარულს უნაწილებს და დედობას უწევს, 29 წლის ინფლუენსერი თვლის, რომ - "ის სუპერდედა და სუპერქალია“.

"ისევ ისეთი ვეღარ ვიქნები, როგორიც ადრე ვიყავი. როცა ბელას ვუყურებ, ვფიქრობ ხოლმე, ანხელიც (გარდაცვლილი შვილი) ასეთი იქნებოდა თუ არა.. სიმართლე ისაა, რომ ამაზე ფიქრი მიჭირს, თითქოს ჯერ კიდევ ვერ ვეგუები ანხელის დაკარგვას. ჩემს შვილებს ყოველთვის ვეუბნები, რომ მათი პატარა ძმა ცაშია, ის დაფრინავს, რადგან სიარული არ უნდა“, - ამბობს ჯორჯინა.

ახლა ჯორჯინა ცდილობს, რომ ძლიერი იყოს: “ცხოვრება რთულია, მაგრამ გრძელდება. არაერთი მიზეზი მაქვს, რომ ძლიერი ვიყო და ცხოვრება განვაგრძო. ახლა ჩემი პრიორიტეტი ოჯახია, ძალიან ბედნიერი და მადლიერი ვარ", - ამბობს როდრიგესი.

ფეხბურთელის თქმით კი, ისინი აუცილებლად დაქორწინდებიან - "ერთ დღესაც დავქორწინდებით. ეს დედაჩემის ოცნებაცაა", - ამბობს კრიშტიანუ.

წყარო: thesun

მოამზადა: ანა სიბოშვილმა