ფასდაკლებები, სიახლეები და საბავშვო აქტივობები - „პალიტრა L“ წიგნის საახალწლო ფესტივალზე

ახალი წლის მოახლოებასთან ერთად იზრდება საახალწლო ღონისძიებების რიცხვი. ერთ-ერთი ყველაზე მასშტაბურია წიგნის საახალწლო ფესტივალი, რომელიც 16-18 დეკემბერს, ტრადიციულად „ექსპო ჯორჯიაში“, IV, V და VI პავილიონებში გაიმართება.

საახალწლო ფესტივალს განსაკუთრებული სიახლეებითა და შეთავაზებებით უმასპინძლებს გამომცემლობა „პალიტრა L“. როგორც გამომცემლობაში აცხადებენ, წლევანდელი ახალი წლის სლოგანია: „ყველაფერი იწყება წიგნით“:

„წიგნის მეშვეობით სახლიდან გაუსვლელად შეგიძლია იმოგზაურო ნებისმიერ ადგილას. ერთდროულად შეგიძლია იყო შერლოკ ჰოლმსი, უოტსონი თუ პროფესორი მორიარტი. სწორედ ამ ემოციით წარვუდგენთ წლევანდელი საახალწლო ფესტივალის სტუმრებს როგორც თანამედროვე, ისე კლასიკოსი მწერლების წიგნებს. წელს განსაკუთრებული ყურადღებით მოვეკიდეთ საბავშვო ლიტერატურის სტენდებს, სადაც პატარა სტუმრებს ახალ წიგნებს, საჩუქრებსა და სხვადასხვა შემეცნებით-გასართობ აქტივობას დავახვედრებთ,“ - აღნიშნავენ „პალიტრა L-ში.“

სწორედ საბავშვო სტენდებთან დახვდებათ პატარებს ახალი, ინტერაქციული წიგნების სერია, რომელიც „დისნეისა“ და „პიქსარის“ ანიმაციური ფილმების მიხედვით არის შექმნილი. წიგნები კითხვა-თამაშის პრინციპზეა დაფუძნებული და ბავშვების თვალწინ მათს საყვარელ ანიმაციურ გმირებს აცოცხლებს.

ფესტივალზე მისულ სტუმრებს „პალიტრა L-ის“ სტენდებთან ელოდებათ საჩუქრები, საბავშვო აქტივობები, ახალი წიგნების პრეზენტაციები, თანამედროვე და კლასიკური ლიტერატურის დიდი არჩევანი. რაც მთავარია, წიგნებზე გავრცელდება 50%-მდე ფასდაკლება. ფესტივალზე შეგიძლიათ არა მხოლოდ თქვენთვის შეიძინოთ წიგნები, არამედ შეარჩიოთ საახალწლო საჩუქრები საყვარელი ადამიანებისთვის, რადგან წიგნი საუკეთესო საჩუქარია.

აღსანიშნავია, რომ წიგნის საახალწლო ფესტივალი მოიცავს როგორც წიგნების გამოფენა-გაყიდვას, ასევე საბავშვო ღონისძიებებს ფესტივალის მთავარ სცენაზე და საბავშვო სივრცეში, საახალწლო ხელნაკეთი ნივთებისა და აქსესუარების გამოფენა-გაყიდვასა და სხვადასხვა სახის გასართობ აქტივობებს.

R