"ამაზე პასუხისმგებელი ხელისუფლებაა...რა მოხდება, თუ ვერ გადაგვარჩენს?" - ვლადიმერ პუტინს ხერსონიდან ჯარის გაყვანის გამო დუგინი და სოლოვიოვი აკრიტიკებენ
უკრაინის ხერსონის ოლქიდან ჯარის გაყვანის გამო, რუსეთის პრეზიდენტ ვლადიმერ პუტინს მხარდამჭერები აკრიტიკებენ.
- საინტერესოა, რომ მათ შორის არის კრემლის მთავარი იდეოლოგი ალექსანდრ დუგინი და პროპაგანდისტი, ვლადიმერ სოლოვიოვი.
ულტრანაციონალისტურ რუსულ ვებგვერდ tsargrad.tv-ზე გამოქვეყნდა დუგინის ვრცელი წერილი, სადაც იგრძნობა უკმაყოფილება პუტინის ბოლოდროინდელი პოლიტიკისადმი.
"ამაზე პასუხისმგებელი ხელისუფლებაა. რა აზრი აქვს ავტოკრატიას? - არადა, ჩვენ სწორედ ეს გვაქვს. მმართველს ვაძლევთ აბსოლუტურ ძალაუფლებას და კრიტიკულ მომენტში ის გვიშველის ყველას - ხალხს, სახელმწიფოს. თუ ამისათვის შემოიკრებს ბოროტ სულებს, ან ფეხებზე დაიკიდებს სოციალურ სამართლიანობას, არასასიამოვნოა, მაგრამ ოღონდ გადაგვარჩინოს.
რა მოხდება, თუ ვერ გადაგვარჩენს? მაშინ – “წვიმის მეფის” ბედი ელის (იხ. ფრეზერი).
როგორ გამოვიდეთ სიტუაციიდან? დაუყონებლივ გადავიდეთ სუვერენული დიქტატურიდან კომისრის დიქტატურაზე, ანუ შემოვიტანოთ იდეოლოგია.
ხერსონი მთლიანად ჩააბარეს. არავითარი პრეტენზია სუროვიკინთან (რუსული არმიის გენერალი). ის არ არის პოლიტიკოსი, პასუხისმგებელია ფრონტის ტექნიკურ მხარეზე. კრიტიკა მას არ ეხება. კარგად გესმით, ვისაც ეკუთვნის კრიტიკა. და არანაირი პიარი აქ აღარ უშველის. კრიტიკულ სიტუაციაში პოლიტიკური ტექნოლოგიები საერთოდ არ მუშაობს. დღეს ისტორია ლაპარაკობს. და ის წარმოთქვამს ჩვენთვის საშინელ სიტყვებს.
ეს (ხერსონიდან გასვლა) არის ნაბიჯი არმაგედონისაკენ. დასავლეთის პირობები, რომელიც იმარჯვებს, მოსკოვისთვის არასოდეს იქნება მისაღები. ეს ნიშნავს, რომ დარჩება ტაქტიკური ბირთვული იარაღი და სტრატეგიული ბირთვული იარაღი, ანუ დასასრული. და აქ ეს არის ყველაზე მნიშვნელოვანი", - ნათქვამია ალექსანდრ დუგინის წერილში.
- რაც შეეხება რუს ტელეწამყვანს, კრემლის პროპაგანდისტს, ვლადიმერ სოლოვიოვს, მის შესახებ საუბარია ომის შემსწავლელი ამერიკული ინსტიტუტის (ISW) ახალ ანგარიშში. ანგარიშის თანახმად, სოლოვიოვმა პუტინს ხერსონის "ჩაბარების“ გამო "არაკომპეტენტური“ ჩინოვნიკების გათავისუფლებისკენ მოუწოდა.
ინსტიტუტი აღნიშნავს, რომ პუტინის პირდაპირი კრიტიკა მის უპირობოდ მხარდამჭერებში "თითქმის უპრეცედენტოა" და რომ როგორც დუგინის, ასევე სოლოვიოვის მხრიდან მსგავსი შინაარსის განცხადებები მიუთითებს რუსული იმპერიალიზმის ერთგულები ადამიანების განწყობის შესაძლო ცვლილებაზე.
ანგარიშში საუბარია იმაზეც, რომ რუსეთის სამხედრო წარუმატებლობა და უდიდესი დანაკარგი, სავარუდოდ, რუსული საზოგადოების კიდევ უფრო მეტად დემორალიზებას გამოიწვევს.
ცნობისთვის, 11 ნოემბერს რუსეთმა გამოიყვანა გამოიყვანა ჯარები ხერსონიდან. უკრაინის პრეზიდენტმა ვოლოდიმირ ზელენსკიმ ამ დღეს ისტორიული უწოდა. ხერსონი ოკუპირებული იყო პირველი მარტიდან. დასავლური ქვეყნების ლიდერებმა ხერსონის დეოკუპაციას უკრაინის გამარჯვება და რუსეთის სტრატეგიული მარცხი უწოდეს.