ვიქტორ ოსიმენის გზა ნაგავსაყრელიდან ვარსკვლავობამდე - წყლის გამყიდველი, მეოცნებე ბიჭუნას მძიმე ბავშვობისა და წარმატების ამბავი: "ჩემი ცხოვრება იყო ბრძოლა გადარჩენისთვის"

"ყოველ კვირას ნაგავსაყრელზე დავდიოდი, რომ იქ სამოსი და ფეხსაცმელები მეპოვა, ახლა აქამდე მოვედი. დედა, მამა - ნამდვილად იამაყებდით ჩემით", - ეს "ნაპოლის" ვარსკვლავის, ნიგერიელი ფეხბურთელის, ვიქტორ ოსიმენის სიტყვებია.

ის მეოცნებე და მებრძოლი ბიჭია, რომელიც ბავშვობაში ქუჩაში წყალს ყიდდა ოჯახის გამოსაკვებად, რომელიც არ დანებდა, არც მაშინ, როცა სულ პატარას დედა გარდაეცვალა, არც მაშინ, როცა მამამ სამსახური დაკარგა და ხუთი ბავშვი საჭმლის გარეშე დარჩა - ყველას დაუმტკიცა, რომ ნაგავსაყრელიდან შეიძლება კაშკაშა ვარსკვლავი ამობრწყინდეს.

ქართველებს ოსიმენი ხვიჩა კვარაცხელიასთან მეგობრობის გამო განსაკუთრებით უყვართ.

თუმცა, ამის გარდა, არაერთი მიზეზი არსებობს, რომ ის გიყვარდეთ და პატივს სცემდეთ.

• ბრძოლა გადარჩენისთვის

ბავშვი იყო, როცა დედა გარდაეცვალა. ამ ამბიდან სამ თვეში მამამ სამსახური დაკარგა და ვიქტორ ოსიმენი თავის ხუთ და-ძმასთან ერთად იძულებული გახდა, ქუჩაში გასულიყო, რათა ოჯახის სარჩენად საჭირო ფული გამოემუშავებინა.

"როცა დედა გარდაიცვალა, ისე პატარა ვიყავი, რომ არ მახსოვს რომელი წელი იყო, მხოლოდ ის ვიცი, რომ თებერვალში დაგვტოვა", - იხსენებს ოსიმენი France Football-თან.

• ბიჭი, რომელიც დიდიე დროგბას აღმერთებდა და "ჩელსის" მაისური მისთვის ყველაფერი იყო, საცობებში მანქანებს შორის დარბოდა, წყლის ბოთლებით ხელში და მძღოლებს მათ ყიდვას სთხოვდა

"დედაჩემის გარდაცვალებიდან სამი თვის შემდეგ, მამამ სამსახური დაკარგა და ეს ჩვენი ოჯახისთვის უმძიმესი პერიოდი იყო. ჩემი ძმა სპორტულ გაზეთებს ყიდდა, და - ფორთოხალს, ხოლო მე - წყალს. ლაგოსში, ქუჩაში, მანქანებს შორის დავდიოდით და მძღოლებს მათ ყიდვას ვთავაზობდით.

ვიცოდით, რომ უნდა გადავრჩენილიყავით და გვესმოდა, რომ ერთად ყოფნას ასეთ დროს დიდი მნიშვნელობა ჰქონდა. საღამოს ვიკრიბებოდით და გამომუშავებულ ფულს მაგიდაზე ვაგროვებდით. შემდეგ ყველაფერს უფროს დას ვაძლევდით, ის საჭმელს გვიმზადებდა, ყველაფერს აწესრიგებდა და ფულს განკარგავდა.

ჩემი ცხოვრების ეს ნაწილი იყო ბრძოლა გადარჩენისთვის. მაგრამ ამ ყველაფერმა, საბოლოო ჯამში, შემქმნა მე, ჩამომაყალიბა იმ ადამიანად, რომელიც ახლა ვარ“, - ამბობს სპორტსმენი.

ოსიმენის თქმით, ის მუდმივად ეძებდა გზებს, რომ თავი დაეღწია ასეთი ცხოვრებისთვის, უბრალოდ ეცხოვრა ისე, რომ საჭმლის ფული ჰქონოდა, მიეღო განათლება. იმისთვის, რომ ტანსაცმელში ფული დაეზოგა, ნაგავსაყრელზე დადიოდა - იქ პოულობდა სამოსსა და ფეხსაცმელებს.

“ყოველ პარასკევს, ან კვირას დავდიოდი მეგობრებთან ერთად ფეხსაცმელების საპოვნელად. დიდხანს ვრჩებოდით იქ და ეს სახალისოც კი იყო. ჩვენ ამას ისე ვუყურებდით, როგორც თამაშს, მაგრამ როდესაც ამაზე ვფიქრობ... ეს ბრძოლაა.

• ხანდახან ვიპოვიდი ფეხსაცმელს მარჯვენა ფეხისთვის, შემდეგ ვიწყებდი მარცხენა ფეხისთვის ფეხსაცმლის ძებნას. ბოლოს, ბევრი ძებნის შემდეგ, ვპოულობდი. ჩემი და ყველაფერს კერავდა და საბოლოოდ, კარგი გამოდიოდა. დიახ, ეს გადარჩენისთვის ბრძოლა იყო", - ამბობს ფეხბურთელი.

პრემიერ ლიგის ყურება, განსაკუთრებით კი "ჩელსის" თამაშების ნახვა ვიქტორ ოსიმენისთვის რეალობისგან გაქცევის და ოცნების შესაძლებლობა იყო. ხშირად იცვამდა ლურჯ მაისურს, უფროს ძმასთან, ენდიუსთან ერთად, უბნის ცენტრში დადიოდა, სადაც ადამიანები ფეხბურთის საყურებლად იკრიბებოდნენ.

• კარიერა

მეოცნებე ბიჭუნამ ლაგოსში, Ultimate Strikers Academy-ში დაიწყო ვარჯიში. მისი საფეხბურთო მონაცემები მალევე შეამჩნიეს და ევროპის ტოპ კლუბებს შეატყობინეს.

2015 წელს, როდესაც ვიქტორ ოსიმენი 15 წლის იყო, ეროვნულ ნაკრებში, 17-წლამდელებში სავარჯიშოდ მიიწვიეს. ოსიმენი მალე 17-წლამდელთა ნაკრების მთავარი ძალა გახდა და თავდასხმის ხაზის ყველაზე მნიშვნელოვან ფიგურად იქცა. გუნდს ჯერ მსოფლიო ჩემპიონატზე მოხვედრაში დაეხმარა, ხოლო შემდეგ, ჩილეში 17-წლამდელთა მსოფლიო ჩემპიონატზე გაიბრწყინა - მან 10 გოლი გაიტანა, "ვერცხლის ბურთი" მოიგო და ჩემპიონატის საუკეთესო ფეხბურთელად დასახელდა.

ვიქტორ ოსიმენის ევროპული კარიერა გერმანულ კლუბ "ვოლფსბურგში“ თამაშით დაიწყო. ბევრი შეთავაზება ჰქონდა, მათ შორის ინტერესდებოდნენ ისეთი კლუბები როგორებიცაა "არსენალი", "ტოტენჰემი", "მანჩესტერ სიტი." ფეხბურთელმა აღიარა, რომ საბოლოოდ, ის კლუბი აირჩია, რომელმაც უფრო მეტი ფული შესთავაზა.

ფეხბურთელი ამბობს, რომ ასე სიხარბის გამო არ მოქცეულა. ასე იმიტომ მოიქცა, რომ თავისი ოჯახის უკიდურესი გასაჭირით სასოწარკვეთილი იყო და სურდა, რომ მათ დახმარებოდა.

"როდესაც "ვოლფსბურგთან" კონტრაქტი გავაფორმე, პირველად მიღებული თანხითა და ბონუსით ჩემთვის არაფერი მიყიდია, სასწრაფოდ ვიყიდე სახლი ლაგოსში მამაჩემისთვის. ფული მივეცი ჩემს და-ძმებს და დღეს ყველას აქვს თავისი საქმე, ყველა კარგადაა. მახარებს იმის ცოდნა, რომ მათ საჭმელი აქვთ. ისინი ყოველთვის მეხმარებიან და მეხმარებოდნენ და ლოგიკურია, რომ მსურს მათი ცხოვრება უკეთესობისკენ შევცვალო", - ამბობს სპორტსმენი.

"ვოლფსბურგში“ ოსიმენი იბრძოდა სათამაშო დროის მოსაპოვებლად. კლუბში მისი კარიერა კარგად ვერ აეწყო - ჯერ ტრავმებმა შეუშალა ხელი, შემდეგ - მალარიამ. საბოლოოდ, ფეხბურთელი იჯარის წესით, ბელგიურ Charleroi-ში გადავიდა.

აღნიშნულ კლუბში მან ერთი სეზონის 36 მატჩში, 20 გოლი გაიტანა. მოგვიანებით ფეხბურთელით ფრანგული კლუბი, "ლილი" დაინტერესდა და საბოლოოდ, ის 20-მილიონ ევროდ გაიფორმა. "ლილში" გატარებული პერიოდიც წარმატებული იყო, მალევე ყველა ტურნირზე კლუბის საუკეთესო ბომბარდირი გახდა,18 გოლით.

• "ლილის" შემდეგ, იტალია და "ნაპოლი"

"ნაპოლიში" თვლიდნენ, რომ ოსიმენი იქნებოდა ის ფეხბურთელი, რომელიც კლუბს ძველ დიდებას დაუბრუნებდა. მათ ფორვარდში "ნაპოლისთვის" რეკორდული თანხა, 80 მილიონი დოლარი გადაიხადეს. 2020 წელს ვიქტორი იქცა ყველა დროის ყველაზე ძვირადღირებულ აფრიკელ ფეხბურთელად.

თუმცა ამ წარმატებას თან სდევდა სევდა - "ნაპოლისთან" გარიგების დასრულებამდე რამდენიმე თვით ადრე, ვიქტორმა მამა - პატრიკი დაკარგა. მამას ფეხბურთელის ცხოვრებაში უმნიშვნელოვანესი როლი ჰქონდა, ის განკარგავდა შვილის კარიერის ადრეულ ეტაპებს. ოსიმენი ყოველთვის წუხილით აღნიშნავს, რომ მისმა მშობლებმა ვერ ნახეს მისი მიღწევები.

"დედა და მამა ნამდვილად იამაყებდნენ“, - დაწერა ფეხბურთელმა "ტვიტერის" ოფიციალურ გვერდზე, როდესაც "ლილიდან" ნეაპოლურ გუნდში გადავიდა.

• ვიქტორ ოსიმენი და ხვიჩა კვარაცხელია

ვიქტორ ოსიმენი ერთ-ერთია "ნაპოლის" იმ ფეხბურთელებს შორის, რომელთანაც ხვიჩა კვარაცხელია მეგობრობს და რომელიც "კვარას" თავის დამკვიდრებაში მნიშვნელოვან როლს თამაშობს.

ოსიმენს არაერთხელ უსაუბრია კვარაცხელიას შესახებ მედიასთან. მისი თქმით, ქართველი ფეხბურთელის შესაძლებლობები კიდევ უფრო მეტია იმაზე, რაც აქამდე გვინახავს. ის არასდროს მალავს გულწრფელ აღფრთოვანებას. უხარია "კვარას" მიერ გატანილი გოლები და მადლობას უხდის საგოლე გადაცემებისთვისაც.

განსაკუთრებით კი ერთი მომენტით დაგვამახსოვრა თავი - როდესაც 11-მეტრიანი დარტყმის შესასრულებლად კვარაცხელიას ბურთი გაუწოდა და გაამხნევა.

“გვაოცებს თუ არა კვარაცხელია? მე ვფიქრობ, რომ ჯერ კიდევ არ ვიცით, თუ რამდენი რამ შეუძლია მას. მიხარია, მისი ასეთი კარგი სათამაშო ფორმა, რადგანაც კვარა ამას იმსახურებს. ვარჯიშის დროს ის კიდევ უფრო უკეთესია და მჯერა, რომ ჩვენს გაოცებას თანდათან უფრო მეტად შეძლებს”, - ამბობს ნიგერიელი ფეხბურთელი.