როგორია მცხეთასთან მომხდარი ავარიის დროს დაშავებულთა ჯანმრთელობის მდგომარეობა
მცხეთასთან მომხდარი ავარიის შედეგად დაშავებული 5 ადამიანიდან ერთ-ერთი ახალგაზრდა კაცის ჯანმრთელობის მდგომარეობა კრიტიკულად მძიმეა.
როგორც "ინტერპრესნიუსს“ კლინიკა "ვივამედის“ კლინიკურმა დირექტორმა, ზურაბ ჩხაიძემ განუცხადა, დაშავებულ მამაკაცს კლინიკაში მიყვანისთანავე მრავლობითი დაზიანებები აღენიშნებოდა, რაც სიცოცხლისთვის სახიფათოა.
"პაციენტი ხელოვნური სუნთქვის აპარატზე იმყოფება, არასტაბილური ჰემოდინამიკური მაჩვენებლები აღენიშნება, მდგომარეობა კრიტიკულად მძიმეა. მამაკაცი ჩვენთან სხეულის მრავლობითი დაზიანებით შემოვიდა, აღენიშნებოდა პოლიტრავმა, სახის ძვლების მრავლობითი დაზიანება, გულმკერდის ტრავმა, ფილტვის ქსოვილის დაზიანება, სისხლდენა, ჰემორაგიული შოკი. საავადმყოფოში ოპერაცია ჩაუტარდა, დაფიქსირდა ასევე ღვიძლის და მსხვილი ნაწლავის დაზიანება. ასევე გაკეთდა ნეიროქირურგიული ოპერაცია თავის ტვინზე“, - განაცხადა ზურაბ ჩხაიძემ.
შეგახსენებთ, მცხეთასთან მომხდარ ავარიას ერთი ადამიანის სიცოცხლე ემსხვერპლა, 5 ადამიანი კი დაშავდა. მიკროავტობუსი, რომელშიც რამდენიმე მგზავრი იმყოფებოდა, ჯებირს შეეჯახა, რის შემდეგაც ცეცხლი გაუჩნდა.