როგორია გორი-ქარელის მონაკვეთზე ავარიის შედეგად დაშავებული ხუთი პირის ჯანმრთელობის მდგომარეობა
ცენტრალური საავტომობილო მაგისტრალის გორი-ქარელის მონაკვეთზე გუშინ მომხდარი ავტოსაგზაო შემთხვევის შედეგად დაშავებული ხუთი პირიდან ორი მათგანი ქარელიდან თბილისში, სპეციალიზებულ კლინიკაში გადაიყვანეს, ორს სტაციონარული მკურნალობა გორში უტარდება, ერთმა კი საავადმყოფო დატოვა, - ამის შესახებ "ინტერპრესნიუსს“ სამედიცინო ქსელ „გორმედის“ კლინიკურმა დირექტორმა განუცხადა.
ხათუნა შრუბის ინფორმაციით, დაშავებულთაგან ერთს ქირურგიული ოპერაცია ჩაუტარდა.
"საავტომობილო მაგისტრალზე მომხდარი ავარიის შედეგად დაშავებული ხუთი პირი სასწრაფო დახმარების ჯგუფებმა გუშინ „გორმედის“ ქსელის კლინიკებში - გორსა და ქარელში შემოიყვანეს. ქარელში მოთავსებული ორი პაციენტი გადაყვანილია თბილისში, სპეციალიზებულ კლინიკაში. გორის საუნივერსიტეტო კლინიკაში შემოყვანილი სამი პირიდან, ერთი ამბულატორიულად გაეწერა ბინაზე, ორი პაციენტი კი სტაციონარში რჩება. ერთ-ერთ მათგანს ჩაუტარდა ქირურგიული ოპერაცია. ამჟამად მისი მდგომარეობა სტაბილურად მძიმეა, შეესაბამება გადატანილი დაზიანების სიმძიმეს,“ - განაცხადა ხათუნა შრუბმა.
შეგახსენებთ, ავტოსაგზაო შემთხვევა თბილისი-სენაკი-ლესელიძის საავტომობილო მაგისტრალის გორი-ქარელის მონაკვეთზე გუშინ მოხდა. ერთმანეთს ორი ავტომობილი შეეჯახა, რამაც ხანძარი გამოიწვია. შემთხვევის შედეგად დაშავდა ხუთი ადამიანი და ერთი გარდაიცვალა.