Reuters: "აზოვსტალიდან" გაყვანილი უკრაინელი მეომრების ნაწილი რუსების მიერ კონტროლირებად ოლენივკის საპატიმროში გადაიყვანეს, მათ შორის არიან ქალებიც - რა ელის მათ?
უკრაინის ქალაქ მარიუპოლში მდებარე "აზოვსტალის" ქარხნიდან უკრაინელი მებრძოლების ევაკუაციის თაობაზე Reuters-ი ახალ ცნობებს აქვენებს.
სწორედ ეს გამოცემა იყო პირველი, რომლემაც 17 მაისს, საღამოს, გაავრცელა ინფორმაცია, რომ რუსული ჯავშანტექნიკის თანხლებით, "აზოვსტალის“ ტერიტორია დატოვა შვიდმა ავტობუსმა, რომლებშიც უკრაინელი მეომრები იმყოფებოდნენ. მათი ზუსტი რიცხვი ჯერჯერობით უცნობია.
მანამდე, 16 მაისს კი უკრაინის შეიარაღებული ძალების გენერალურმა შტაბმა განაცხადა, რომ "აზოვსტალის“ ტერიტორიიდან ევაკუირებულია 53 მძიმედ დაჭრილი სამხედრო, რომლებიც გადაიყვანეს ოკუპანტების კონტროლირებადი ქალაქის ნოვოაზოვსკის სამედიცინო დაწესებულებაში, "აზოვსტალის" კიდევ 211 დამცველი კი, ჰუმანიტარული დერეფნით ჩაიყვანეს ოლენივკაში, საიდანაც გენშტაბის მტკიცებით "გაცვლის პროცედურით“ დააბრუნებენ უკრაინის ხელისუფლების მიერ კონტროლირებულ ტერიტორიაზე.
Reuters-ის ინფორმაციით, "აზოვსტალის“ ტერიტორიიდან რუსი სამხედროების მიერ შვიდი ავტობუსით გაყვანილი უკრაინელი მებრძოლები რუსეთის მიერ კონტროლირებულ სოფელ ოლენივკაში, ახლად გახსნილ საპატიმროში მიიყვანეს. ამის შესახებ თვითმხილველმა აცნობა სააგენტოს.
ოლენივკაში გადაყვანილებში რამდენიმე ქალიც არის.
გამოცემის ცნობით, მიუხედავად იმისა, რომ ორივე მხარე ლაპარაკობდა შეთანხმებაზე, რომლის თანახმადაც ყველა უკრაინული ჯარისკაცი დატოვებდა ფოლადის ქარხანას, ბევრი დეტალი ჯერ კიდევ არ არის საჯარო, მათ შორის, რამდენი მებრძოლი დარჩა შიგნით და იყო თუ არა შეთანხმებული პატიმრების გაცვლის რაიმე ფორმა.
კრემლის განცხადებით, პუტინმა პირადად გასცა გარანტია, რომ პატიმრებს საერთაშორისო სტანდარტების შესაბამისად მოეპყრობოდნენ, უკრაინელი ოფიციალური პირები კი აცხადებენ, რომ მათი გაცვლა შესაძლებელია რუს ტყვეებში.
გაეროში რუსეთის ელჩის მოადგილემ, დიმიტრი პოლიანსკიმ განაცხადა, რომ არანაირი შეთანხმება არ ყოფილა და "ტვიტერზე" დაწერა: "არ ვიცოდი, რომ ინგლისურს ამდენი ვარიაცია ჰქონდა ერთი გზავნილის გამოსახატავად: #აზოველები უპირობოდ დანებდნენ“, - დაწერა მან.
საინფორმაციო სააგენტო TASS იტყობინება, რომ რუსული საგამოძიებო უწყებები, აპირებენ დაკითხონ უკრაინელი ჯარისკაცები, მათ შორის "აზოვის" ბატალიონის წევრები იმ გამოძიების ფარგლებში, რომელსაც მოსკოვი უწოდებს: "უკრაინის რეჟიმის დანაშაულებს".
გახმაურებული რუსი კანონმდებლები პატიმართა გაცვლის წინააღმდეგ გამოვიდნენ. რუსეთის ქვედა პალატის სახელმწიფო სათათბიროს სპიკერმა ვიაჩესლავ ვოლოდინმა თქვა: "ნაცისტური დამნაშავეები არ უნდა გაცვალონ“.
ჯერ უცნობია, როგორ მოხერხდება ამ გმირი სამხედროების რუს ტყვეებში გაცვლა, რადგანაც რუსეთის ფედერაციის სახელმწიფო სათათბირო 18 მაისს განიხილავს პროექტს, რომელიც კრძალავს ე.წ. ნაცისტი კრიმინალების ტყვედ გაცვლას, ხოლო 26 მაისს რუსეთის ფედერაციის უზენაესი სასამართლო განიხილავს უკრაინული პოლკის "აზოვის" ტერორისტულ ორგანიზაციად გამოცხადების საკითხს.
"აზოვსტალის" ტერიტორიაზე კვლავ რჩებიან უკრაინელი მებრძოლები, ოღონდ უცნობია მათი რაოდენობა.
პოლკ "აზოვის" დამფუძნებელმა ანდრეი ბელეცკიმ გაავრცელა ვიდეომიმართვა, რომელშიც საუბრობს "აზოვსტალიდან" სამხედროების ევაკუაციაზე. მან ყველას მოუწოდა თავის შეიკავონ კომენტარებისა და კრიტიკისგან ამ ოპერაციასთან დაკავშირებით.
ბილეცკის თქმით, გარნიზონი ადგილზეა.
"ამჟამად შემიძლია ვთქვა, რომ პოლკი კავშირშია. მე ვიცი, რა ხდება იქ, გარნიზონი ადგილზეა, იარაღით ხელში, ყველაფერი კარგად იქნება, დიდება უკრაინას!" - აცხადებს ის.
იხილეთ ასევე: