"დღეს ხალხი უკრაინაში, საქართველოსა და მოლდოვაში ჯერ კიდევ გვიცქერს იმავე მიზნით" - რას ამბობს ევროპარლამენტის პრეზიდენტი, რობერტა მეცოლა

"მე ძალიან ვამაყობ, რომ დღეს აქ ვარ. იმ უამრავ გამოსვლას შორის, რომელიც დღეს გვესმის, ვფიქრობ, არის ერთი მთავარი გზავნილი: ევროპის მომავალი ჯერ კიდევ დაუწერელია და ჩვენი ისტორია თქვენზეა დამოკიდებული", - ეს განცხადება ევროპარლამენტის თავმჯდომარე რობერტა მეცოლამ ევროპის დღის აღსანიშნავად გამართულ კონფერენციაზე გამოსვლისას გააკეთა.

რობერტა მეცოლამ უკრაინის საკითხზე ისაუბრა და აღნიშნა, რომ "24 თებერვალს რუსეთის მიერ წამოწყებულმა შუა საუკუნეების მსგავსმა აგრესიამ მსოფლიო შეცვალა."

"24 თებერვლის შემდგომი სამყარო სულ სხვაა. უფრო საშიში. ევროპის როლი მასთან ერთად შეიცვალა. ჩვენ არ შეგვიძლია მეტი დროის დაკარგვა. როგორ ვუპასუხეთ შემოჭრას და როგორ უნდა გავაგრძელოთ რეაგირება, ჩვენი ღირებულებების ტესტია. ჩვენ კიდევ ერთხელ ვიმყოფებით ევროპული ინტეგრაციისთვის გადამწყვეტ მომენტში და არც ერთი წინადადება არ უნდა იყოს უგულებელყოფილი. რა პროცესიც არ უნდა იყოს საჭირო, ჩვენ ეს უნდა მივიღოთ“,- განაცხადა მან.

მისი თქმით, კარგად ახსოვს ის დღე, როდესაც მისი ქვეყანა მალტა და კიდევ 9 ევროპული სახელმწიფო ევროკავშირს შეუერთდა.

"ეს გრძნობა, რომელიც 18 წლის წინ მქონდა, როდესაც 10 ქვეყანა შეურთდა ევროკავშირს, არის მომენტი, რომელიც მუდამ დარჩება ჩემთან. დღეს ხალხი უკრაინაში, საქართველოსა და მოლდოვაში, დასავლეთ ბალკანეთში ჯერ კიდევ გვიცქერს იმავე მიზნით.

ცხადია, ყველა ქვეყანას აქვს საკუთარი გზა, მაგრამ ჩვენ არ უნდა შეგვეშინდეს ევროპის ძალის გამოთავისუფლების, რათა შევცვალოთ ევროპა უკეთესობისკენ, როგორც ეს ჩემი ქვეყნის შემთხვევაში მოხდა“, – განაცხადა რობერტა მეცოლამ.