ლაგუნა ვერესთან მომხდარ სისხლიან გარჩევაში, რომლის დროსაც 2 ადამიანი მოკლეს, 20-მდე პირი მონაწილეობდა, მათგან 5 დააკავეს - რას აცხადებს შსს?
ლაგუნა ვერესთან მომხდარი სისხლიანი დაპირისპირების ფაქტზე, რომლის შედეგადაც 2 ადამიანი დაიღუპა და რამდენიმე დაიჭრა, პოლიციამ 5 პირი დააკავა. აღნიშულის შესახებ ინფორმაციას შსს ავრცელებს.
მათივე ინფორმაციით, დაპირისპირება 20 - მდე პირს შორის მოხდა. პოლიციამ 1987 წელს დაბადებული კ. მ. განზრახ მკვლელობის ბრალდებით დააკავა. სხეულის განზრახ მძიმე დაზიანების ბრალდებით კი დაკავებულია 1971 წელს დაბადებული გ.ქ., ხოლო განსაკუთრებით მძიმე დანაშაულის შეუტყობინებლობისთვის დაკავებული არიან: წარსულში ნასამართლევი 1986 წელს დაბადებული გ. გ. 1991 წელს დაბადებული გ.ა. და წარსულში ნასამართლევი, 1990 წელს დაბადებული გ. პ.
"შინაგან საქმეთა სამინისტრო აგრძელებს დანაშაულში მონაწილე სხვა პირების დაკავების ღონისძიებებს. ჩატარებული გამოძიებით ამ ეტაპზე დადგენილია, რომ მიმდინარე წლის 2 აპრილს თბილისში, კოსტავას ქუჩის მიმდებარედ განთავსებულ ერთ-ერთ ორგანიზაციაში დაახლოებით 20-მდე პირს შორის წარმოიშვა სიტყვიერი კამათი. მოგვიანებით კამათი ფიზიკურ დაპირისპირებაში გადაიზარდა, რასაც ორივე მხრიდან ცეცხლსასროლი იარაღიდან სროლა მოჰყვა.
ცეცხლსასროლი იარაღიდან მიღებული ჭრილობით ადგილზე გარდაიცვალა 1971 წელს დაბადებული კ.ქ., ხოლო შემთხვევის ადგილის მიმდებარედ გარდაიცვალა კიდევ ერთი პირი - 1970 წელს დაბადებული ვ.გ. დაპირისპირების დროს, სხეულის სხვადასხვა დაზიანება მიიღო ოთხმა პირმა: 1989 წელს დაბადებული ო.ბ., 1971 წელს დაბადებული დ.ც., 1962 წელს დაბადებული ხ.ც., 1989 წელს დაბადებული მ.მ., ყველა მათგანი საავადმყოფოშია გადაყვანილი და შესაბამისი მკურნალობა უტარდებათ.
ორი ან მეტი პირის დამამძიმებელ გარემოებაში ჩადენილი განზრახ მკვლელობის, ცეცხლსასროლი იარაღის მართლსაწინააღმდეგო შეძენა-შენახვა-ტარების, განზრახ მკვლელობის, დანაშაულის შეუტყობინებლობის და ჯანმრთელობის განზრახ მძიმე დაზიანების ფაქტებზე გამოძიება სსკ-ის 109-ე მუხლის მე-3 ნაწილის “ა”
ქვეპუნქტით, 236-ე მუხლის მე-3 და მე-4 ნაწილებით, 108 -ე მუხლით, სსკ-ის 117-ე მუხლის 7-ე ნაწილის „ა“ პუნქტით და სსკ-ის 376-ე მუხლის მე-2 ნაწილებით მიმდინარეობს“, - ნათქვამია შინაგან საქმეთა სამინისტროს მიერ გავრცელებულ განცხადებაში.
მედიაში გავრცელებული ინფორმაციით, სისხლიანი გარჩევა თურქეთში მყოფი ე.წ. კანონიერი ქურდს, დავით ყალიჩავას და "კრიმინალური ავტორიტეტს", ლევან მარღიას მხარეებს შორის მოხდა. მიზეზი დავით შენგელიას ბიზნესსაქმიანობა იყო, რომელსაც ბიზნესში წილს სთხოვდა ლევან მარღია, შენგელიამ დასახმარებლად თურქეთში მყოფ ყალიჩავას მიმართა, რომელმაც საქმის მოგვარება ზუგდიდელ კრიმინალურ ავტორიტეტს, ხვიჩა ცხაკაიას დაავალა.
ასევე იხილეთ: