კორონავირუსის საწინააღმდეგოდ დაწესებული რა შეზღუდვები უქმდება დღეიდან?
საკოორდინაციო საბჭოს მიერ 22 მარტს მიღებული გადაწყვეტილებით, რომელიც ეპიდსიტუაციის გაუმჯობესებას ეფუძნება, დღეიდან პანდემიის საწინააღმდეგოდ დაწესებული რიგი შეზღუდვები დღეიდან უქმდება.
28 მარტიდან საქართველოში აღარ არის სავალდებულო ღია სივრცეში პირბადით ყოფნა.
კორონავირუსისგან თავის დასაცავად, ღია სივრცეში ნიღბის გამოყენების ვალდებულება პირველად 2021 წლის ივნისში გაუქმდა, თუმცა, მოგვიანებით, ვითარების ისევ გართულების ფონზე, ღია სივრცეში პირბადის გამოყენების ვალდებულება დაბრუნდა. წესის დარღვევისთვის 20-ლარიანი ჯარიმა მოქმედებდა, თუმცა, ბოლო თვეებში თითქმის აღარავის აჯარიმებდნენ.
ამასთანავე, დამცავი ნიღბით ყოფნა ისევ სავალდებულოა საზოგადოებრივ ტრანსპორტსა და დახურულ სივრცეებში.
უწყებათაშორისი საკოორდინაციო საბჭოს გადაწყვეტილებითვე, დღეიდან, 28 მარტიდან ასევე გაუქმდა: სტუმრების რაოდენობის შეზღუდვა როგორც საზოგადოებრივი კვების ობიექტებში, ასევე, სპორტულ, სახელოვნებო თუ სხვა სახის ღონისძიებებზე, მათ შორის სოციალურზე;დისტანციურ სამუშაო რეჟიმზე მყოფი საჯარო მოხელეები სამუშაო ადგილებს უბრუნდებიან;გაუქმდა თვითიზოლაციის ვალდებულება საქართველოს იმ მოქალაქეებისთვის, რომლებიც ქვეყანაში PCR-ტესტირების გარეშე ბრუნდებიან.