"მხოლოდ შენი იმედი მქონდა, ჩემი საყრდენი იყავი" - რას წერენ უკრაინაში დაღუპული სამხედროს მეუღლე და ქალიშვილი?
18 მარტის ღამეს რუსეთ-უკრაინის ომში ორი ქართველი გია ბერიაშვილი და დავით რატიანი დაიღუპნენ. ინფორმაცია მათი გარდაცვალების შესახებ პირველად უკრაინაში ფრონტის ხაზზე მყოფმა საქართველოს თავდაცვის ყოფილმა მინისტრმა ირაკლი ოქრუაშვილმა და უკრაინაში მებრძოლმა ქართველებმა გაავრცელეს.
დავით რატიანს მეუღლე და ოთხი შვილი დარჩა, მათ შორის - ორი მცირეწლოვანი. გია ბერიაშვილს კი მეუღლე და ერთი ქალიშვილი.
გარდაცვლილი მებრძოლის შვილი მარიამ ბერიაშვილი სოციალურ ქსელში წერს:
"როგორ დამტოვე მარტო ამ ბოროტ სამყაროში, მე ხომ მხოლოდ შენი იმედი მქონდა, ჩემი საყრდენი იყავი. ჩემი გმირი იყავი და ხარ მა..."
"როგორ გელოდები ჩემო გია", - წერს გარდაცვლილი მებრძოლის მეუღლე ქეთი ხელაძე.
ქართველი მებრძოლების გია ბერიაშვილი და დათო რატიანზე სოციალურ ქსელში უკრაინელმა ჟურნალისტმა, ალექსეი ბობროვნიკოვმა დაწერა, რომ ისინი ირპენისთვის ბრძოლისას დაიღუპნენ.
"გია ბერიაშვილი და დათო რატიანი, ისინი გუშინ, ირპენისთვის ბრძოლაში დაიღუპნენ, როდესაც ჩვენი ოცეული დაზვერვაზე იყო წასული, ბეროს ცხედარი, გუშინ ნაღმტყორცნების სროლისას გადმოვასვენეთ. ბერო სიცოცხლისთვის ბოლომდე იბრძოდა, დათო რატიანი ჩემი ახლო მეგობარი გახდა. დათომ გარდაცვალებამდე რამდენიმე ოკუპანტის სიცოცხლეც შეიწირა, ის მეტყვიამფრქვევე იყო, ცხოვრობდა როგორც გმირი და დაიღუპა გმირულად: ეხმარებოდა დაჭრილ ფრანგ სამხედროს, რომ შეკრების ადგილას მისულიყო, ჭურვის აფეთქების დროს დათო ადგილზე გარდაიცვალა..." - წერს უკრაინელი ჟურნალისტი
რუსეთ-უკრაინის ომში დაღუპული საქართველოს ორი მოქალაქის, გია ბერიაშვილის და დავით რატიანის სამშობლოში გადმოსვენებას სახელმწიფო უზრუნველყოფს.