ვლადიმერ ჟირინოვსკი ხელოვნური კომიდან გამოიყვანეს - რას წერს რუსული მედია მისი ჯანმრთელობის მდგომარეობის შესახებ
რუსეთის "ლიბერალ-დემოკრატიული პარტიის" ლიდერი, ვლადიმერ ჟირინოვსკი ხელოვნური კომიდან გამოიყვანეს. ამის შესახებ რუსული სააგენტო Tacc-ი წერს. გამოცემის ცნობით, ის გონზეა და უკვე ჩართულია პოლიტიკურ საქმიანობაში. იღებს და ეცნობა დოკუმენტებს, რომლებსაც თანაშემწეები აწვდიან.
ცნობისთვის, 9 თებერვალს რუსეთის ფედერაციის ჯანდაცვის სამინისტროს პრესსამსახურმა გაავრცელა ინფორმაცია იმის შესახებ, რომ ჟირინოვსკი კოვიდთან დაკავშირებული გართულების გამო, მოსკოვის ცენტრალურ საავადმყოფოში იმყოფებოდა. კლინიკაში ის 2 თებერვალს მოათავსეს.
მას შემდეგ არაერთხელ გავრცელდა ინფორმაცია ჟირინოვსკის ჯანმრთელობის მდგომარეობის დამძიმების, ასევე მისი გარდაცვალების შესახებ, თუმცა ყოველ ჯერზე მის პარტიაში ამ ინფორმაციას უარყოფდნენ და აცხადებდნენ, რომ პოლიტიკოსის ჯანმრთელობის მდგომარეობა სტაბილური იყო.