სანაიას საქმე: 2018 წელს პროკურატურის მიერ განახლებული გამოძიება და რას ამბობდა წლების წინ შოთა ჭიჭიაშვილი მოკლულ ჟურნალისტსა და მისი ბანდის ყოფილ წევრ ციხისთავზე?

კონსტანტინე ციხისთავმა, რომელიც წარსულში საქართველოს ნომერ პირველ ტერორისტად შერაცხული კრიმინალური ავტორიტეტის, შოთა ჭიჭიაშვილის დაჯგუფების წევრი იყო, "ფორმულას“ ეთერში გიორგი სანაიას მკვლელობის საქმეზე ილაპარაკა. ციხისთავი წლების განმავლობაში ციხეში იჯდა და რამდენიმე თვის წინ გათავისუფლდა. რესპონდენტი ვახო სანაიას საავტორო გადაცემაში ჰყვება, რომ ჟურნალისტის მკვლელობა პრემიერ ირაკლი ღარიბაშვილის სიმამრმა, შინაგან საქმეთა სამინისტროს კახეთის სამმართველოს იმჟამინდელმა უფროსმა, თამაზ თამაზაშვილმა, შს მინისტრის ყოფილმა მოადგილემ, ვლადიმერ ბაკურაძემ და შოთა ჭიჭიაშვილმა დაგეგმეს და შეასრულეს.

ცნობისთვის, კოტე ციხისთავი გიორგი სანაიას მკვლელობაში აღნიშნულ პირებს ჯერ კიდევ 2018 წელს, პატიმრობაში ყოფნისას ადანაშაულებდა. იმჟამად მან "რუსთავი- 2"-ში ციხიდან დარეკა და ტელევიზიას ამის შესახებ ინფორმაცია მიაწოდა. მან თქვა ისიც, რომ სანაია შოთა ჭიჭიაშვილმა მოკლა. და რომ ეს პოლიტიკური მკვლელობა შევარდნაძის მთავრობაში დაიგეგმა; ციხისთავმა ახსენა ასევე ვიდეომასალა, რომელიც წლების განმავლობაში ფიგურირებდა სანაიას საქმეში და განაცხადა, რომ ეს ვიდეომასალა მათი ბანდის წევრებმა გადაიღეს.

გიორგი სანაიას ოჯახმა, მსჯავრდებულ კოტე ციხისთავის სატელევიზიო ინტერვიუს გავრცელების შემდეგ, პროკურატურისგან 2018 წლის 24 თებერვალს მოითხოვა საგამოძიებო მოქმედებების ჩატარება. რაზეც გამოძიებამ საქმის შესწავლა დაიწყო. ამის შემდეგ ამ საქმეზე ვახო სანაია ერთხელ უკვე იმყოფებოდა დაკითხვაზე და მის ხელთ არსებული ინფორმაცია მიაწოდა. ვახო სანაიას განცხადებით, ეს იყო შეკვეთილი პოლიტიკური მკვლელობა.

ჩვენი ინფორმაციით, საქმეზე ასევე დაიკითხნენ: კოტე ციხისთავი, გიორგი ხურცილავა და შოთა ჭიჭიაშვილიც, თუმცა გამოძიების შედეგი ჩვენთვის უცნობია.

ცნობისათვის:

ჟურნალისტი გიორგი სანაია 2001 წლის 26 ივლისს საკუთარ სახლში, გაურკვეველ ვითარებაში, გარდაცვლილი იპოვეს. მისმა მკვლელობამ ქვეყანაში საპროტესტო აქციები გამოიწვია. ამ ფაქტს საზოგადოება პოლიტიკურ მოტივებს უკავშირებდა. ჟურნალისტის მკვლელობის ფაქტზე, 2001 წლის 5 დეკემბერს სისხლის სამართლის პასუხისგებაში მიეცა საქართველოს მოქალაქე გრიგოლ ხურცილავა, იგივე "გრიცკო“ და 2003 წლის 9 ივლისის განაჩენით, მას 13 წლით თავისუფლების აღკვეთა მიესაჯა.

სამივე ინსტანციის სასამართლომ მკვლელობა სულიერი აღელვების ნიადაგზე ჩადენილ დანაშაულად შეაფასა. 2013 წელს ხურცილავას ამნისტია შეეხო და ციხიდან გათავისუფლდა. გიორგი სანაიას ოჯახს გამოძიების ამ ვერსიის არასდროს სჯეროდა, მას შეკვეთილ პოლიტიკური მკვლელობად მიიჩნევდა და სხვადასხვა დროს საქმის ხელახლა გამოძიებას მოითხოვდა.

რაც შეეხება სქართველოს ნომერ პირველ ტერორისტად შერაცხულ შოთა (მევლუდ) ჭიჭიაშვილს, რომელსაც ადამიანის გატაცებებისა და სხვა მძიმე დანაშაულების გამო 22 წლით თავისუფლების აღკვეთა ჰქონდა მისჯილი, ის 2013 წლის 3 ივნისს ამნისტიის საფუძველზე გათავისუფლდა და საქართველოც იმავე დღეს დატოვა. 2019 წლის ოქტომბრის დასაწყისში შოთა ჭიჭიაშვილი უკრაინაში ჩატარებული სპეცოპერაციის დროს მოკლეს.

ჭიჭიაშვილის სახელი უკავშირდება 21-ე საუკუნის დასაწყისში პანკისში ადამიანთა ყველაზე გახმაურებულ გატაცებებს, რომელთა შორის იყო: ესპანელი ბიზნესმენების ანტონიო ტრემილიოსა და ფრანცისკო როდრიგესის, "წითელი ჯვრის“ თანამშრომლების, "აგრობიზნესბანკის" თანათავმჯდომარე პიტერ შოუს, დეპუტატ პეტრე ცისკარიშვილის და ა.შ.

2013 წელს მისი ციხიდან გათავისუფლებიდან 2 დღეში, მასთნ ექსკლუზიური ინტერვიუ ჩაწერა გაზეთმა "ყველა სიახლემ“ ჩაწერა, რომელშიც ჭიჭიაშვილი გიორგი სანაიას მკვლელობის ფაქტსა და მისი ბანდის ყოფილ წევრ კონსტანტინე ციხისთავზეც ლაპარაკობს.

• ამონარიდი ინტერვიუდან:

"- პეტრე ცისკარიშვილი რატომღა გაიტაცეთ 2001 წელს? იყო მითქმა-მოთქმა, რომ მას პანკისელი ნარკომოვაჭრეების ვალი ჰქონდა...

- პეტრე არც ჩემი მეგობარია და არც მისი ადვოკატი ვარ, მაგრამ მიმაჩნია, რომ მას, როგორც მთის კაცს, რაღაც ღირსება აქვს. იმ დროს პრეზიდენტობის კანდიდატებად მოიაზრებოდნენ კახა თარგამაძე, ზურაბ ჟვანია და მიშა სააკაშვილი. ესენი ედუარდ მეფის ვეზირები იყვნენ, მეფის კარზე კი იყო დიდი ინტრიგები - ერთმანეთს უცინოდნენ, თან ძირს უთხრიდნენ. პეტრე ჟვანიას მეგობარი იყო. იმ დროს ჩვენ სულ სხვა ოპერაციაზე მივდიოდით. ძალოვანებმა შემომიგდეს კოტე ციხისთავი, ნაძირალა და ნომრიანი აგენტი, თელაველი კაცი. კახა თარგამაძემ, ნუგზარ საჯაიამ და მათმა «სასტავმა» კოტე ციხისთავი გამოაქცია ციხიდან, რის შემდეგაც მე მომადგა სახლში. შევიფარე, ვასვი, ვაჭამე, ჩავაცვი, გვერდში დავიყენე და ყველას ვუთხარი, ეს კაცი ჩემი სტუმარია და თუ რამე მოხდა, მის სისხლს მე ავიღებ-მეთქი. მოგვიანებით გავიგე, რომ ციხისთავი აგენტი ყოფილა. ჩვენი საქმისთვის მანქანის მონახვა მას დავავალე და მაინცდამაინც პეტრე ცისკარიშვილს არ მიგვაყენა? კოტე პოლიციელის ფორმით იყო და წიგნაკი ჰქონდა.

ეს იყო კოტე ციხისთავის, როგორც პოლიციის აგენტის მიერ წინასწარ დადგმული ოპერაცია. ის თხუნელა იყო, შემოგზავნილი, თორემ დავალება მას თარგამაძემ და მისმა ხალხმა მისცა. ანუ მათ ჩვენდა გაუცნობიერებლად დაგვაჯახეს ერთ-ერთ ჯგუფს. ჩვენ სხვა საქმეზე ვიყავით წასულები, მანქანა უნდა «დაგვეთრია», უფრო სწორად, ექსპროპრიაცია მოგვეხდინა, მერე კი სადმე მიგვეტოვებინა. პეტრე ვაჟკაცი ბიჭი აღმოჩნდა, წინააღმდეგობა გაგვიწია, ამიტომაც მისმა წაყვანამ მოგვიწია. უბრალოდ, გვინდოდა, დროებით, 1-2 დღე იზოლაციაში მოგვექცია, სანამ საქმეს გავაკეთებდით. მას თან ახლდა შეყვარებული, რომელსაც ვუთხარი, წადი, დაიკო, შენთან საქმე არ გვაქვს-მეთქი. ქალს თურმე ძალიან ჰყვარებია პეტრე და გვითხრა, სადაც ეს, მეც იქო და არ მიატოვა. ასეთი თავგანწირვის გამო პატივისცემა გაგვიჩნდა მის მიმართ. მათთვის ზედმეტი არავის არაფერი უკადრებია, პირიქით, რომ სციოდა, ჩვენს ტანსაცმელს ვაცმევდით იმ გოგოს. ამასობაში ლამის მთელი სახელმწიფო გადავიკიდეთ. ახმეტამდე რომ მოვაღწიეთ, კოტე ციხისთავს ვუთხარით, მანქანა დაეტოვებინა. იქ ჯარის კორდონები იდგა, ჩვენ კი ჩვენი ბილიკები გვქონდა და იმის ავლით ჩუმად შევაღწევდით ხოლმე პანკისში. მანქანა რომ მიაგდეს, კოტემ ხელთათმანები არ ჩაიცვა და მანქანაში სპეციალურად დატოვა კვალი, ვითომ გადაავიწყდა. არ მინდოდა მასში ეჭვი შემეტანა, ალალად ვუყურებდი, 23 წლის ბიჭი ვიყავი და არც იმდენი გამოცდილება მქონდა. მერე ეს ციხისთავი ჯერ პეტრეს დაეტაკა, გინება დაუწყო, შემდეგ იმ ქალს დაუწყო «ჩალიჩი», მათი დამცირება და მიწასთან გასწორება უნდოდა. მის არაკაცობაზე ძალიან გავბრაზდი, დავემუქრე, კიდევ თუ რამეს მოიმოქმედებ, ტვინს გაგასხმევინებ-მეთქი. მაშინ დავეჭვდი, რომ რაღაცაში იყო საქმე.

- ამბობენ, რომ ჟურნალისტი გიორგი სანაია პანკისში გადაღებულ მაღალჩინოსნების მამხილებელ ვიდეოკასეტას შეეწირა. როგორ ფიქრობთ, მართლა არსებობდა ასეთი კომპრომატი?

- რამე რომ ყოფილიყო, მეცოდინებოდა. ნარკოტიკების სფერო მძულდა და ჩახედული არ ვიყავი მასში, მაგრამ მგონია, ესეც ჭორია და არანაირი კასეტა არ არსებობს. სანაიას საქმე, ღმერთმა აცხონოს, უფრო მომავალი "ნაცების" ამბავი იყო. შევარდნაძისთვის ძირი რომ გამოეთხარათ და მისი ხელისუფლების მიმართ სიძულვილი დაეთესათ, მასებზე ზემოქმედებისთვის სჭირდებოდათ მისი სიკვდილი. მგონია, ამათ თვითონვე მოკლეს ეგ საცოდავი და შევარდნაძეს გადააბრალეს“.

P.S. ambebi.ge ამ დღეებში შეეცდება შემოგთავაზოთ ექსკლუზიური ინტერვიუ გიორგი სანაიას საქმის პროკურორთან, ვეცდებით, მეტი დეტალი გავიგოთ საქმის ხელახალი გამოძიების შესახებ.