"ცხინვალში ჩემს მიმართ არ ყოფილა ასეთი უდიერი დამოკიდებულება" - ვაჟა გაფრინდაშვილი მიხეილ სააკაშვილზე
ექიმი-ტრავმატოლოგი ვაჟა გაფრინდაშვილი მიხეილ სააკაშვილის გლდანის ციხის საავადმყოფოში გადაყვანის ფაქტს ეხმაურება. როგორც მან "ფორმულას" ეთერში აღნიშნა, მსგავსი დამოკიდებულება, რაც გუშინ ექსპრეზიდენტის მიმართ დაინახა, მის მიმართ ცხინვალის იზოლატორშიც კი არ ყოფილა.
გაფრინდაშვილი ასევე აღნიშნავს, რომ სააკაშვილისთვის ციხის საავადმყოფოში გადაყვანა არასწორია, რადგან ის არ არის მულტიფუნქციური და არ არის შესაბამისი კვალიფიკაციის მქონე კადრებით დაკომპლექტებული.
"ცხინვალში ჩემს მიმართ არ ყოფილა ასეთი უდიერი დამოკიდებულება, რასაც ჩვენ ვიგებთ მთავრობისგან. მე არ მინდა მყავდეს მატყუარა მთავრობა, რომელიც ყოველ ნაბიჯზე გვატყუებს და აღარ არის მათდამი ნდობა. თუ არ იყო ძალადობა გადაყვანის დროს, ეს კადრები გამოაქვეყნონ.
ჩემს მიმართ ფიზიკური დაპირისპირება ცხინვალის ე.წ ციხეში არ ყოფილა. არავითარი პირადი ან რელიგიური შუღლი არ ყოფილა ჩემს მიმართ და ჩვენი მოქალაქის მიმართ ასეთი დამოკიდებულება არ არის სწორი. ყველა საქართველოს მოქალაქეს აქვს თავისი უფლებები" - ამბობს გაფრინდაშვილი.