ნონა მამულაშვილი მის მიმართ "ქართული ოცნების" დეპუტატის გიორგი ხელაშვილის რეპლიკაზე პარლამენტის ეთიკის კომისიის რეაგირებას ითხოვს
ფრაქცია "ნაციონალური მოძრაობის" წევრი ნონა მამულაშვილი მის მიმართ "ქართული ოცნების" დეპუტატის გიორგი ხელაშვილის რეპლიკაზე პარლამენტის ეთიკის კომისიის რეაგირებას ითხოვს.
როგორც ნონა მამულაშვილი აცხადებს, „ქართული ოცნების" დეპუტატები ოპოზიციონერი კოლეგების მიმართ შეურაცხმყოფელ სიტყვებს გამარჯობასავით იყენებენ.
"საგარეო ურთიერთობათა კომიტეტის სხდომაზე სალომე სამადაშვილმა დასვა კითხვა იმის თაობაზე, თუ რატომ არ მობრძანდება კომიტეტში საგარეო საქმეთა მინისტრი. ამაზე „ქართული ოცნების" კლასიკური პასუხი იყო, რომ თურმე ჩვენ რეგლამენტის კითხვა არ ვიცით - მათგან შეურაცხყოფა ისეა, როგორც გამარჯობის თქმა. მაშინ როდესაც ამასთან დაკავშირებით პროტესტი გამოვთქვი ერთ-ერთმა დეპუტატმა ხელი ამიქნია. ვუთხარი, რომ ასეთი ჟესტებით საუბარი ეთიკური არ არის. მან კი მომაძახა, რომ ვარ ნაბიჭვარი. მე ვარ ეთიკის კომიტეტის წევრი და შესაბამის რეაგირებას ვითხოვ", - განუცხადა ჟურნალისტებს ნონა მამულაშვილმა.