"გავუფრთხილდეთ ერთმანეთს... მადლობა მინდა ვუთხრა მაშველებს, რომლებიც გაუჩერებლად იბრძოდნენ, რომ სიცოცხლე ენახათ, მაგრამ ვერ ნახეს" - დავლაძე

რამაზ დავლაძე, რომელმაც ბათუმის ტრაგედიის დროს ოჯახის 4 წევრი დაკარგა, გვერდში დგომისთვის მადლობას უხდის.

ის ამბობს, რომ ტრაგედიის შემდეგ ათასობით ადამიანი ურეკავს და თანადგომას უცხადებს მას. დავლაძემ ასევე მადლობა გადაუხადა მაშველებს, რომლებიც კორპუსის ნგრევის დღეს 29 საათი მუშაობდნენ ადგილზე.

"ჩემთვის ჩემი ბავშვების თითოეული ნივთი უკვე ისტორიის ნაწილია და შევინახავ... გამაძლიერებს, გადავხედავ ხოლმე და გამახსენდება. უღრმესი მადლობა მთელ საქართველოს ასეთი გვერდში დგომისთვის. გავუფრთხილდეთ ერთმანეთს. არ წარმომედგინა, თუ საქართველო ასეთი მთლიანი იყო.

მაშველებს მინდა გადავუხადო დიდი მადლობა, რომლებიც გაუჩერებლად ბოლომდე იბრძოდნენ, რომ სიცოცხლე ენახათ, მაგრამ, სამწუხაროდ, ვერ ნახეს. ათასი ზარი შემომდის თანადგომის, ისეთი სითბო წამოვიდა ხალისგან, რომ მადლობის მეტი არაფერი მეთქმის" - ამბობს დავლაძე "ფორმულას" ეთერში.

შეგახსენებთ, 9 ოქტომბერს ბათუმში საცხოვრებელი კორპუსის სადარბაზოს ნგრევისას 9 ადამიანი გარდაიცვალა. რამაზ დავლაძემ ტრაგედიის დროს 2 მცირეწლოვანი შვილი, მეუღლე და ძმა დაკარგა.