15
მარტიდღის ზოგადი ასტროლოგიური პროგნოზი
უკრაინულ მასმედიაში გამოქვეყნებული მასალების მიხედვით, უკრაინის სამხედრო-საზღვაო ძალების მყვინთავები, ამერიკელი კოლეგების დახმარებით, "სი ბრიზის“ სამხედრო მანევრების ჩარჩოებში, ოდესის ნავსადგურში ჩაძირულ ლეონიდ ბრეჟნევის კატერს (იახტას) "ბურევესტნიკს“ ამოიღებენ. ნავსაყუდელთან ახლოს, სადაც იახტაა ჩაძირული, ამერიკელებმა უკვე თავიანთი მცირე ტექნიკური ბაზა მოაწყეს.
როგორც გაზეთი "კომსომოლსაკია პრავდა - უკრაინა“ («Комсомольская правда – Украина») იუწყება სტატიაში, სათაურით: "ოდესაში ჩაძირულ ლეონიდ ილიჩის საყვარელ იახტას ამერიკელები ამოიღებენ“, "ბურევესტნიკი“, რომლითაც სკკპ ცენტრალური კომიტეტის გენმდივანი ლეონიდ ბრეჟნევი და მისი უახლოესი გარემოცვა შავ ზღვაზე დასეირნობდა ხოლმე, ხუთი წლის წინ ჩაიძირა და ამჟამად ოდესის ნავსადგურში სამხედრო გემების მანევრირებას ხელს უშლის. იახტის ამოღება სამხედრო წრთვნების "დღის წესრიგში“ არის ჩაწერილი და, შესაბამისად, მისთვის სპეციალური ლეგენდა მოიფიქრეს - თითქოსდა "ბურევესნტნიკი“ მტრის სარაკეტო დარტყმის შედეგად ჩაიძირა.
როგორც უკრაინის სამხედრო ფლოტის სამაშველო-საძიებო სამსახურის უფროსი, პირველი რანგის კაპიტანი ალექსი ნესტეროვი აცხადებს, ჩაძირული იახტის კორპუსის წინასწარმა დათვალიერებამ ცხადყო, რომ ის ძალზე ცუდ მდგომარეობაში იმყოფება და რომც ამოიღონ, აღდგენას არ ექვემდებარება. იახტა ხისგან არის დამზადებული და წყალქვეშ ხუთწლიანი ყოფნა მისთვის სასიკვდილო განაჩენის ტოლფასია. ისე, კაცმა რომ თქვას, ამხანაგ ლეონიდ ილიჩის სასეირნო-გასართობი იახტა პატარა არ გახლავთ - მისი სიგრძე 37 მეტრია, ხოლო წყალწყვა - 150 ტონას აღწევს.
ორი დღის წინ ამერიკელმა სპეციალისტებმა მოსამზადებელი პროცედურები ჩაატარეს და ობიექტი გამოიკვლიეს. ისინი დარწმუნებულნი არიან, რომ საზღვაო რარიტეტს ამოიღებენ. იქვე ახლოს მცურავი ამწე დგას, თუმცა განზრახულია იახტის ამოღება პონტონებით სცადონ, ფსკერს "ააგლიჯონ“. ალბათ, ოპერაცია პირველი აგვისტოსათვის დასრულდება.
- ისტორია: "სტრელა“ - იალტაში, "ბურევესტნიკი“ - ფოთში
1960-იანი წლების პირველ ნახევარში სსრ კავშირში ოთხი სასაზღვრო-სადარაჯო ხომალდი აიგო. თავდაპირველად ისინი სასაზღვრო-სანაპირო დაცვის ქვედანაყოფებს ეკუთვნოდა, მოგვიანებით კი მათგან ორი - "ბურევესტნიკი“ და "სტრელა“ გადააკეთეს საბჭოთა სახელმწიფოს პირველი პირისა და მისი გარემოცვის შავ ზღვაზე გასეირნების მიზნით. 1970-იან წლებში ლეონიდ ილიჩი "ბურევესტნიკით“ ხშირად სარგებლობდა - გენმდივანს უყვარდა ხოლმე შვებულების გატარება ზღვის ტალღებით დარწეულ იახტაზე...
"სტრელას“ ბაზა იალტაში (უკრაინის სსრ, ყირიმი) მდებარეობდა, "ბურევესტნიკის“ კი - საქართველოში, ფოთის სასაზღვრო რაზმში "ჩაეწერა“. იახტა ზამთრობით ოჩამჩირეში იდგა, ხოლო ზაფხული რომ მოახლოვდებოდა, აფხაზეთში მდებარე სამთავრობო აგარაკებთან ახლოს - სოხუმის ნავსადგურში მიცურდებოდა ხოლმე და ბორტზე "კრემლის ნაჩალნიკებით“ ზღვაზე კრუიზს ახორციელებდა. ისე, კაცმა რომ თქვას, ამ ორი იახტიდან მთავარი "ჩლენოვოზი“ (ანუ პოლიტბიუროს წევრმავალი) მაინც "სტრელა“ იყო, რადგან სამთავრობო აგარაკების დიდი უმეტესობა სწორედ უკრაინის სსრ-ის ყირიმის სამხრეთ სანაპიროზე იყო განლაგებული, მაგრამ ლეონიდ ილიჩს საქართველოს სსრ-ის შავი ზღვის სანაპიროზეც უყვარდა დასვენება და ხშირად "ბურევესტნიკით“ სარგებლობდა.
რატომ? იმიტომ, რომ "ბურევესტნიკს“ იმ დროისთვის ძალიან მნიშვნელოვანი ტექნიკური მონაცემები ჰქონდა: ჯერ ერთი, რომ მისი კორპუსი სამფენიანი ხისგან იყო დამზადებული, აღჭურვილი იყო ორი ძლიერი - ოთხი ათასი ცხენის ძალის მქონე - დიზელის ძრავით. შესაბამისად, ხომალდი საათში 80-90 კილომეტრამდე სიჩქარეს ავითარებდა. მასზე დამონტაჟებული იყო იმ დროისათვის ყველაზე საიმედო რადიოსადგური "რეიდ-1“.
ამხანაგ ლეონიდ ილიჩის გარდაცვალების შემდეგ "ბურევესტნიკი“ შავი ზღვის სანაოსნოს გადაეცა, დროთა განმავლობაში იახტიდან ყველაფერი მოიპარეს, რისი მოხსნაც შეიძლებოდა, თუმცა მოგვიანებით მისი რარიტეტული ნაწილები მოძებნეს და დღეს ექსპონატების სახით შავი ზღვის ფლოტის ისტორიის იალტის მუზეუმშია გამოფენილი. 1995 წელს "ბურევესტნიკი“ ჩამოწერეს, რადგან მისი ექსპლუატაცია უკვე შეუძლებელი იყო. გემი ოდესის ნავსადგურში იდგა და იჟანგებოდა... ბოლოს კი, ყველასგან დავიწყებული, ოდესღაც კი დიდებული იახტა 2016 წელს ჩაიძირა. წყარო
მოამზადა სიმონ კილაძემ
ყველაზე კარგი მაგარი დრო...
რომ გეკითხათ, კომუნისტებს ყველას თანასწორობა უნდოდათ, მაგრამ პარტიულ ზედა ფენას რეი-ბანებიც ეკეთა, იახტებზეც ისვენებდნენ და საუკეთესო მანქანებითაც დადიოდნენ