6
აპრილიდღის ზოგადი ასტროლოგიური პროგნოზი
ბელარუსში ჟურნალისტ რომან პროტასევიჩთან ერთად დაკავებული მისი მეგობარი გოგონა, სოფია საპეგა მშობლებს ციხიდან წერილს უგზავნის. სოფიას წერილი გამოცემა pdmnews.ru-მ გამოაქვეყნა. წერილი სამ ივნისამდეა დაწერილი. მასში სოფია საპეგა წერს, რომ უკვე ორი წერილი მისწერა მშობლებს, თუმცა როგორც ჩანს, მათ წერილები არ მიუღიათ, რადგანაც მშობლებისგან "პასუხი არაა.“
"ჯერ არ მიმიღია პასუხები ჩემს ორ წერილზე, მაგრამ გადავწყვიტე კიდევ დავწერო. დღეს ის დღეა, როდესაც იმედი მქონდა, რომ სამაგისტრო ნაშრომს დავიცავდი. საღამოს რომში რესტორანში წავიდოდი, შამპანურს დავლევდი, პიცას მივირთმევდი, ზაფხულს შევხვდებოდი...ყველაფერი ოდნავ განსხვავებული აღმოჩნდა, ამის ნაცვლად ვისაუზმე ფაფით, ვივარჯიშე, საღამოს კი ჩაი დავლიე ორცხობილასთან ერთად.
არანაირი რომი, არანაირი რესტორანი, არავითარი ცივი შამპანური, არც სიყვარულის ზეიმი, მაგრამ იყო ჩაი“, - წერს ის.
გოგონა ასევე ამბობს, რომ მას დაკავების შემდეგ, სარკეში არ ჩაუხედავს - "ხელებით ვიგებ რა მდგომარეობაშია ჩემი კანი. სარკეს არ მაძლევენ, რადგანაც ამბობენ, რომ არ არის შესაბამისი პარამეტრების. ჯიბეში რომ მოთავსდეს და პლასტმასის ჩარჩო ჰქონდეს, ასეთი სარკეა საჭირო“, - წერს გოგონა.
სოფია აღნიშნავს, რომ საათს გარეთ დარეკილი ზარის მიხედვით იგებს, ის ასევე სწერს დედას, რომ ხელით დაწერილი წერილები გაუგზავნოს, რადგნაც ასეთი წერილები "რატომღაც უფრო ძვირფასია.“
ამასთან, აღსანიშნავია, რომ ბელარუსის მედიამ სოფიას დაკავების შემდეგ ვიდეოჩანაწერი გაავრცელა, სადაც ის ამბობს, რომ "ტელეგრამზე" იმ არხის რედაქტორია, სადაც ბელარუს სამართალდამცველებზე პერსონალურ ინფორმაციას ავრცელებენ. საპეგას მშობლები კი აცხადებენ, რომ მის შვილს ამის თქმა აიძულეს.
შეგახსენებთ, თვითმფრინავი, რომელიც ათენი-ვილნიუსის რეისს ასრულებდა და რომელშიც რომან პროტასევიჩი იჯდა, 23 მაისს მინსკის აეროპორტში იძულებით დასვეს და ჟურნალისტი, მეგობარ გოგონასთან, სოფია საპეგასთან ერთად დააკავეს.
სოფია საპეგას ორთვიანი წინასწარი პატიმრობა მიუსაჯეს."ნოვაია გაზეტა“ წყაროზე დაყრდნობით წერს, რომ საპეგას 2020 წლის აგვისტო-სექტემბერში მასობრივი არეულობების და ჯგუფური ძალადობის ორგანიზებაში ედება ბრალი. წინასწარი პატიმრობა აქვს მისჯილი პროტასევიჩსაც.
