"სომხეთს, რომ დანაღმული ადგილების რუკა მოეცა, ეს ტრაგედია არ მოხდებოდა" - როგორ ეხმაურებიან მხარეები ყარაბაღის აფეთქებას, რომელსაც ჟურნალისტები ემსხვერპლნენ

ქელბაჯარის რაიონში ავტობუსი, რომელშიც ჟურნალისტები ისხდნენ, ტანკსაწინააღმდეგო ნაღმზე აფეთქდა, დაღუპულია 3 ადამიანი.

აზერბაიჯანული მედიის ინფორმაციით, დაღუპულებს შორის ორი ჟურნალისტია - ტელევიზია AzTV-ის ოპერატორი სირაჯ აბიშოვი და საინფორმაციო სააგენტო Azertag-ის თანამშრომელი მაჰერამ იბრაჰიმოვი.

გავრცელებული ინფორმაციით, დაჭრილია კიდევ 4 ადამიანი, რომლებიც სხვადასხვა დაზიანებით საავადმყოფოში არიან გადაყვანილები. მომხდართან დაკავშირებით აზერბაიჯანის სამხედრო პროკურატურამ სისხლის სამართლის საქმე აღძრა.

აზერბაიჯანული მხარე აცხადებს, რომ 2020 წლის ყარაბაღის ომის შემდეგ, ერევანს ამ დრომდე არ გადაუცია ბაქოსთვის დანაღმული ტერიტორიების რუკა.

ბაქოს ცნობითვე, ომის დასრულების შემდეგ, 2020 წლის 10 ნოემბრიდან დღემდე, ყარაბაღის დანაღმულ ტერიტორიებზე 22 სამოქალაქო და სამხედრო პირი დაიღუპა, 100-ზე მეტი კი დაშავდა.

აზერბაიჯანული მხარის განცხადებითვე, სომხეთის წინააღმდეგ ადამიანის უფლებათა ევროპულ სასამართლოში მეორე სახელმწიფოთაშორისო სარჩელი შეიტანა, რომელიც ერევნის მხრიდან ყარაბაღში დანაღმული ტერიტორიების რუკების გადმოცემაზე უარის თქმას უკავშირდება.

"ეს სომხური მხარის მორიგი ვანდალური ქმედების დასტურია, რომელსაც სამოქალაქო პირების წინააღმდეგ ჩადის. არადა, სამმხრივი შეთანხმების შემდეგ გაკეთებული განცხადების თანახმად, სომხეთსა და აზერბაიჯანს შორის საომარი მოქმედებების დასრულების შემდეგ, ის ვალდებული იყო, აზერბაიჯანული მხარისთვის ეცნობებინა ტერიტორიაზე ნაღმების ადგილმდებარეობის შესახებ, რომელიც შესაბამის რუკაზეა ასახული, თუმცა, ამას დღემდე არ აკეთებს. მეტიც, უჭირს წაგების შეგუება და განაგრძობს საერთაშორისო უფლებების დარღვევას" - წერს აზერბაიჯანული მხარე.

"ვიდრე ისინი არსებობენ და მიაჩნიათ, რომ ეს მათი მიწაა, ასეთი ტრაგედიები არასდროს დასრულდება. სრულიად ახალგაზრდა ბიჭები დაიღუპნენ არაფრის გამო... ისინი პირველები არიან, მაგრამ არა უკანასკნელი. რაღაც უნდა მოვიმოქმედოთ და ვაიძულოთ, რომ ის რუკა მოგვცენ და ნაღმების ადგილმდებარეობა გავიგოთ, რათა ჩვენი სპეციალისტები ჩავიდნენ, სხვა შემთხვევაში ტრაგედიებს ვერ ავცდებით, იქ ხომ მშვიდობიანი მოსახლეობა ცხოვრობს, ქალები, ბავშვები, რომლებიც თავისუფლად ვერ გადაადგილდებიან...", - წერს აზერბაიჯანელი ბლოგერი ზულეიხა ისმაილოვა.

"სომხების მიერ დატოვებულ ნაღმებზე ადგილობრივები სისტემატურად ფეთქდებიან, ეს არც პირველი შემთხვევაა და არც უკანასკნელი... 3 აპრილს, სოგოვუშანის დასახლებაში ასევე ნაღმზე აფეთქდა ჯარისკაცი, რომლის სამძებრო სამუშაოები დღემდე გრძელდება. სხეულის მძიმე დაზიანება მიიღო კიდევ ერთმა სამხედრომ ილკინ ბაირამ ოღლი ბაირამოვმა, რომელიც მოგვიანებით საავადმყოფოში გარდაიცვალა... არ ვიცი, რას აკეთებს ჩვენი ხელისუფლება ამის აღმოსაფხვრელად. მე ვიცი, რომ ის ხალხი, ვინც იქ ცხოვრობს, თავისუფლად ვერ გადაადგილდება, რაც სომხებს ძალიან ახარებთ... ნაღმების დატოვება ვის უნდა უკვირდეს, როდესაც თავიანთი 30 წლის ნაშრომს ცეცხლს უკიდებდნენ და წვავდნენ, რომ აზერბაიჯანულ მოსახლეობას არ ესარგებლა. ის აღარ ახსოვთ, როგორ შეცვიდნენ 30 წლის წინ მათ სახლებში..."- წერს ჟურნალისტი ირადა ასედოვა.

მომხდარს სომხებიც ეხმაურებიან. მათი თქმით, ცუდია, ახალგაზრდა ადამიანების დაღუპვა, მაგრამ აზერბაიჯანს არ უნდა ჰქონდეს იმის განცდა, რომ იქ, სომხურ მიწაზე აბსოლუტურ გამარჯვებას მიაღწია...

"რამდენი ხანია სომეხი ტყვედ ჩავარდნილი ჯარისკაცების გადმოცემას ვითხოვთ, ყურსაც არ იბერტყავენ. არავინ იცის ცოცხლები არიან თუ არა და რა მდგომარეობაში არიან. მათ უკან ოჯახები დგას. ისინი ბრძანებას ასრულებდნენ და იმას აკეთებდნენ, რასაც სახელმწიფო ეტყოდა... ამდენი თვეა ამაოდ ვითხოვთ მათ სახლებში დაბრუნებას, მაგრამ აზერბაიჯანული მხარე სპეკულაციას განაგრძობს. ყველა სიტყვასა და ქმედებაში გვაგრძნობინებენ, რომ მოგვიგეს, პატარა ქვეყანას, რომელსაც ყველამ ზურგი შეაქცია..." - წერს სომეხი სამოქალაქო აქტივისტი ჰასმიკ აბრამიანი.

"ამ განწყობას ვერც რუსეთი შეცვლის და ვერც "მინსკის ჯგუფი", რომელსაც ამდენი წელია არაფერი გაუკეთებია. ვწუხვარ დაღუპული ახალგაზრდების გამო, მაგრამ ჩვენ მეტი სისხლი გვაქვს დაღვრილი, ამიტომ, სოლიდარული ვერ ვიქნები. დიახ, არ უნდა ჰქონდეთ განცდა, რომ იქ ცხოვრებას მშვიდობიანად და სტაბილურ გარემოში გააგრძელებენ. მწამს, რომ მათი გამარჯვება დროებითია..." - მიაჩნია კიდევ ერთ სომეხს ვარიდა აირუმიანს.