"მოსკოვს სურს საბჭოთა პერიოდის დროინდელი "გავლენის სფეროები“ აღადგინოს" - რა მისწერეს ქართველმა პოლიტიკოსებმა და ექსპერტ-პოლიტოლოგებმა პომპეოს

ბელგიის გაზეთ «New Europe»-ში გამოქვეყნებულია სტატია, სათაურით: "ღია წერილი აშშ-ის სახელმწიფო მდივანს მაიკ პომპეოს“, რომელსაც ხელს აწერს 50-მდე ქართველი პოლიტიკოსი და ექსპერტ-პოლიტოლოგი.

როგორც ცნობილია, აშშ-ის სახელმწიფო მდივანი მაიკ პომპეო, თავის ერთ-ერთ ბოლო საზღვარგარეთული ტურნეს ფარგლებში, დღეს საქართველოსაც უნდა ეწვიოს. ქართველი პოლიტიკოსები და საექსპერტო წრეების წარმომადგენლები, პოლიტოლოგები ღია წერილში თავიანთ თვალსაზრისს გამოხატავენ საქართველო-აშშ-ის ურთიერთობის შესახებ, მის აწმყოსა და პერსპექტივაზე.

"საქართველოსთვის ამერიკის შეერთებული შტატები სასიცოცხლოდ მნიშვნელოვან მოკავშირეს წარმოადგენს. ჩვენ ასევე გვჯერა, რომ თავის მხრივ, საქართველოსაც დიდი როლის შესრულება შეუძლია დასავლეთის ინტერესების განმტკიცებაში. საქართველო ერთგვარ ქვაკუთხედს წარმოადგენს ჩვენი მოკავშირეებისათვის იმ პლაცდარმის უზრუნველყოფაში, რომელიც "აღმოსავლეთ-დასავლეთის“ დერეფნის განმტკიცებას ემსახურება და რომლის მშენებლობაში აშშ-ის ადმინისტრაციას ბევრი სახსრები აქვს დახარჯული. ჩვენ ამერიკას განვიხილავთ როგორც ერთადერთ გარანტს ევროატლანტიკური სისტემის მთლიანობისა და ევროპული მშვიდობისათვის.

ბოლო წლებში სამხრეთ კავკასიისა და შავი ზღვის რეგიონები გეოპოლიტიკური არასტაბილურობის ზონებად იქცნენ. ამ მუქარების დიდი ნაწილი რუსეთის ამბიციებით არის განპირობებეული - მოსკოვს სურს საბჭოთა პერიოდის დროინდელი "გავლენის სფეროები“ აღადგინოს. ყოფილ საბჭოთა სივრცეს რუსეთი თავის "ახლო საზღვარგარეთად“ აღიქვამს და მიაჩნია, რომ შეუზღუდავად, თავისუფლად უნდა იმოქმედოს. სულ ახლახან მოსკოვმა თავისი ჯარები მთიან ყარაბაღში განალაგა და ამით თავისი რეგიონული პოზიციები განიმტკიცა“, - აღნიშნულია ღია წერილში.

"ჩვენ უდიდეს მადლობას ვუხდით ამერიკის შეერთებულ შტატებს საქართველოს სუვერენიტეტისა და ტერიტორიული მთლიანობის მხარდაჭერის გამო. ვთვლით, რომ როგორც ქართველი ხალხის სოლიდარობისათვის, ასევე აშშ-ის გლობალური და რეგიონული ინტერესებისათვის უდიდესი მნიშვნელობა ექნება იმას, თუ საქართველოში ამერიკის შეიარაღებული ძალები მუდმივად განთავსდებიან, როტაციული საფუძვლით, მატერიალურ-ტექნიკური უზრუნველყოფის ელემენტებით, საჰაერო პატრულირების თანხლებით, რაც აშშ-სა და მის მოკავშირეებისათვის ფართო შესაძლებლობებს უზრუნველყოფს სამხრეთ კავკასიასა და შავი ზღვის რეგიონებში. საქართველოში აშშ-ის სამხედრო ყოფნა ქართველი ხალხის დიდ სურვილს წარმოადგენს, ეს ფაქტორი შეაკავებს რუსულ მუქარებს და ხელს შეუწყობს ნატოში გაწევრებისაკენ წინსვლას“, - ვკითხულობთ წერილში.

ღია წერილის ავტორებს შორის არიან:

ირაკლი ალასანია, თინათინ ხიდაშელი, ბათუ ქუთელია, გიორგი ბადრიძე, ზაზა ბიბილაშვილი, ლევან ბოძაშვილი, დავით დარჩიაშვილი, თედო ჯაფარიძე, თორნიკე გორდაძე, თენგიზ ფხალაძე, ხათუნა ლაგაზიძე, ნოდარ ხარშილაძე, გიორგი რუხაძე, თორნიკე შარაშენიძე, გელა ვასაძე, თემურ იაკობაშვილი და სხვები.

წყარო

სიმონ კილაძე