"60 წლამდე კორონავირუსით სიკვდილიანობის შემთხვევები იშვიათია" - რა ოთხ დაავადებას ასახელებს ინფექციონისტი, რაც COVID-19 -ით გარდაცვალების რისკს ზრდის

ბოლო პერიოდში საქართველოში COVID-19 -ით გარდაცვლილთა რაოდენობა სულ უფრო იზრდება. სტატისტიკური მონაცემების მიხედვით, საქართველო ვირუსით გარდაცვლილთა პროცენტული მაჩვენებლის მიხედვით, (0.6%) ევროპაში ერთ-ერთ საუკეთესო შედეგს კვლავ ინარჩუნებს, თუმცა ბოლო დღეების ტენდენცია, სპეციალისტთა მოსაზრებით, დამაფიქრებელია.

ამ დროისთვის საქართველოში ახალი კორონავირუსით სულ 25 პაციენტია გარდაცვლილი. შესაბამისი უწყების მიერ გავრცელებული ინფორმაციით, ყველა მათგანს თანმხლები მძიმე ქრონიკული დაავადება ჰქონდა.

რატომ იმატებს ვირუსით გარდაცვლილთა რაოდენობა საქართველოში და რა არის ის მთავარი რისკ-ფაქტორები, რაც პაციენტის გარდაცვალების ალბათობას ზრდის - AMBEBI.GE-მ ამ კითხვებით სპეციალისტებს მიმართა.

იმუნოლოგ ბიძინა კულუმბეგოვის შეფასებით, საქართველოში COVID-19 -ით გარდაცვლილთა რაოდენობა ამ ეტაპზე საგანგაშო არ არის, მთავარია მზარდი ტენდენცია არ შენარჩუნდეს.

"საგანგაშო მაჩვენებელი, რა თქმა უნდა, ეს არ არის, მთლიან კონტინენტს რომ შევხედოთ, სიკვდილიანობა 0.4 % აქვს ისლანდიას, 0.6 პროცენტი - სლოვაკეთს, ხოლო ევროპის დანარჩენ ყველა ქვეყანას აქვს 1% -ზე მეტი. ჩვენ ახლა ვართ მესამე ადგილზე 0.6 %-ით, ანუ ისევ შევდივართ იმ სამეულში, სადაც ყველაზე ნაკლებია გარდაცვლილთა რაოდენობა. მაგრამ მთავარია აწი როგორ განვითარდება მოვლენები. რაც უფრო მეტი იქნება ინფიცირებული, უფრო მეტი იქნება გარდაცვლილთა რიცხვიც. ამიტომ მაქსიმალურად დავიცვათ ყველა ის რეგულაცია, რაც არსებობს კორონავირუსთან მიმართებაში", - ამბობს AMBEBI.GE -სთან იმუნოლოგი.

ის, რომ ახალი კორონავირუსით გარდაცვლილთა რაოდენობა ბოლო დღეების განმავლობაში იზრდება, ინფექციონისტ მაია ბუწაშვილისთვის მოულოდნელი არ ყოფილა. სპეციალისტი მიიჩნევს, რომ არსებული სტატისტიკით დაიმსხვრა მითი, თითქოს საქართველო განსაკუთრებულად ებრძვის და ამარცხებს ვირუსს.

"სავსებით ლოგიკურია ბოლო დღეების სიკვდილიანობის მზარდი ტენდენცია. კანონზომიერიც არის, რადგან ჩვენ დანარჩენი მსოფლიოს ნაწილი ვართ და გამორჩეულ კუნძულად ვერ დავრჩებოდით. ეს სტატისტიკა გვეუბნება იმას, რომ ჩვენ მსოფლიოს ჩვეულებრივი ნაწილი ვართ, ამიტომ ის ილუზია და მითები, რომ ჩვენ თითქოს განსაკუთრებულად ვმართავთ კლინიკურად ამ პანდემიას, გაქარწყლდა. სინამდვილეში ეს ყველაფერი უბრალოდ დროში გადავადდა, რაც გამოიწვია იმან, რომ ყველაფერი ჩაკეტილი იყო. გაიხსნა და იმატა შემთხვევებმა. შეკავება ძალიან კარგი გამოსავალია, მაგრამ დროის მოსაგებად და მოსამზადებლად უნდა იყოს ის გამოყენებული. ამით თავიდან ვერ აიცილებ ვირუსს. რა არის გამოსავალი? გამოსავალია ვაქცინა. ამიტომ ვაქცინის გამოშვებამდე, მაქსიმალურად უნდა ვეცადოთ შევაკავოთ და ვმართოთ სიტუაცია", - გვეუბნება მაია ბუწაშვილი.

(გრაფიკზე მოცემულია მსოფლიო სტატისტიკური მაჩვენებლები)

ახალი კორონავირუსით გარდაცვლილთა აბსოლუტურ უმრავლესობას მწვავე თანმხლები ქრონიკული დაავადებები აღენიშნებოდა, ამასთანავე, წამყვანი ფაქტორი იყო პაციენტთა ხანდაზმულობა. ინფექციონისტთა განმარტებით, ეს ორი მახასიათებელი, სიკვდილიანობის მთავარი რისკ-ფაქტორებია. მაია ბუწაშვილი ასახელებს იმ წამყვან ოთხ დაავადებას, რაც COVID-19 -ით გარდაცვალების ალბათობას ზრდის.

"ესენია: ჭარბი წონა, არტერიული ჰიპერტენზია, დიაბეტი და გულს-სისხლძარღვთა დაავადებები. საქართველოს შემთხვევაში დაფიქსირდა ონკოლოგიური პაციენტის გარდაცვალებაც. სიმსივნეც ასევე მნიშვნელოვანი რისკ-ფაქტორია. და საერთოდაც, ნებისმიერი ქრონიკული დაავადების მქონე ადამიანი უფრო მეტად არის რისკის ქვეშ, რადგან მისი იმუნიტეტი დასუსტებულია. ყველანაირი ვირუსის შემთხვევაში ასეა. კორონავრუსის შემთხვევაში კიდევ ერთი თავისებური მაჩვენებელი ემატება - ასაკი. 60 წლამდე კორონავირუსით სიკვდილიანობის შემთხვევები უკიდურესად იშვიათია. 60 წელს ზემოთ კი მაჩვნენებელი მკვეთრად იზრდება. ყველაზე მაღალია 80 წელს ზემოთ, ნაკლები, მაგრამ მაღალია 70 წელს ზემოთ", - გვიხსნის ინფექციონისტი.