"წუთი - წუთზე უნდა მივიღოთ სამოქმედო გეგმა"  - კორონავირუსის გავრცელების მომატებული საფრთხის გამო მესტია ჩაიკეტება?!

საქართველოში დღეს გამოვლენილი კორონავირუსის 25 ახალი შემთხვევიდან 17 მესტიის მუნიციპალიტეტში დადასტურდა. აღსანიშნავია, რომ ვირუსის გავრცელების დღევანდელი მაჩვენებელი მნიშვნელოვნად აღემატება ბოლო პერიოდში ყოველდღიურად გამოვლენილ შემთხვევათა რიცხვს.

სვანეთში კორონავირუსის გავრცელების დეტალებზე ისაუბრა მხარის რწმუნებულის მოადგილემ ნინო ვიბლიანმა. მისი განცხადებით, ვირუსით დაინფიცირებული პირი მესტიაში ერთ-ერთ ოჯახში იმყოფებოდა სტუმრად და ვირუსი სავარაუდოდ, მისგან გადაედოთ.

"მესტიის მუნიციპალიტეტში იკვეთება ერთი ოჯახი, რომელსაც ჰყავდა სტუმარი და სავარაუდოდ, ვირუსი გადაედოთ მისგან, ვირუსი გადაედოთ ამ ოჯახის კონტაქტებს, საუბარია სულ 17 დადასტურებულ შემთხვევაზე, აქედან მესტიის მუნიციპალიტეტის მკვიდრი არის 7. პაციენტები მოთავსებულები არიან თბილისისა და ქუთაისის სამედიცინო დაწესებულებებში, ნაწილის გადმოყვანა ხდება ახლა და მოთავსდებიან როგორც ზუგდიდის, ასევე სხვა კლინიკებში. მიმდინარეობს ჩაღრმავებული ეპიდკვლევა და ლაბორატორიული კვლევა. დაავადებათა კონტროლის ცენტრის 5 ბრიგადა დღეს მთელი დღის განმავლობაში იმუშავებს სოფელში და მოხდება ყველა მცხოვრებისთვის ბიოლოგიური მასალის აღება"- განაცხადა ნინო ვიბლიანმა.

არაოფიციალურად გავრცელებული ინფორმაციის თანახმად, კორონავირუსის მომატებული საფრთხის გამო შესაძლოა, სვანეთი ჩაიკეტოს. მესტიაში დამატებითი რეგულაციების ამოქმედების შესახებ ისაუბრა ჯანდაცვის მინისტრმა ეკატერინე ტიკარაძემ. რაც შეეხება რეგულაციების ამოქმედებას მთელი ქვეყნის მასშტაბით, მინისტრის თქმით, ინფიცირების დეტალური სტატისტიკა ჯერჯერობით ამის საფუძველს არ იძლევა.

"ამ მომენტისთვის რეგულაციები ამოქმედდება სვანეთში, დანარჩენი რიცხვები არ გვაძლევს იმის საფუძველს, რომ ქვეყნის მასშტაბით გარკვეული გამკაცრებები გვქონდეს. კვლავ გვექნება მიზნობრივი ტესტირება, ბევრად უფრო გაფართოებული და მივყვებით იმ სტრატეგიულ გეგმას, რომელიც დღემდე გვქონდა დასახული", - განაცხადა ჯანდაცვის მინისტრმა.

ტიკარაძის განცხადებით, კორონავირუსის ახალ შემთვევებთან დაკავშირებით თუ რა ღონისძიებები გატარდება, უწყებათშორისი საკოორდინაციო საბჭოს დღევანდელი შეხვედრის შემდეგ გახდება ცნობილი.

"გადაუდებელი დახმარების სამსახური და ეპიდემიოლოგიური სამსახური მობილიზებულია სრულად, ადგილზე იმყოფება უკვე 5 ბრიგადა, რომელიც კვლევებს დეტალურად აწარმოებს. ამ შეხვედრის შემდეგ მაქვს კონკრეტული შეხვედრა საბჭოში და მივიღებთ გადაწყვეტილებას დამატებითი ქმედების შესახებ, თუ რა ღონისძიებებს გავატარებთ“, - განაცხადა ტიკარაძემ.

სვანეთის ჩაკეტვასთან დაკავშირებით გავრცელებული ინფორმაციის გადამოწმების მიზნით AMBEBI.GE მესტიის მუნიციპალიტეტის მერიას დაუკავშირდა. უწყებაში აცხადებენ, რომ მხარის ჩაკეტვის შესახებ აქტიურად მსჯელობენ, თუმცა ოფიციალური პროტოკოლი ამის თაობაზე ჯერ არ მიუღიათ.

"ამაზე არის საუბარი ჩვენთანაც, რომ შესაძლოა ჩაიკეტოს მესტია. ველოდებით ოფიციალურ პროტოკოლს ჯანდაცვის სამინისტროსგან და მთავრობის ადმინიტრაციისგან. წუთი - წუთზე უნდა მივიღოთ სამოქმედო გეგმა, რის შემდეგაც ალბათ დადასტურებულად შეგვეძლება ამ კითხვაზე პასუხის გაცემა „ - გვითხრეს მესტიის მუნიციპალიტეტის მერიაში.

P.S. სტატია უკვე გამოქვეყნებული იყო, როდესაც ცნობილი გახდა, რომ მესტიაში, უშგულსა და ლენჯერში საკარანტინო შეზღუდვა დაწესდა.