"პირველ რიგში, ავტობუსებისა და მეტროს მოძრაობა უნდა აღდგეს, შემდეგ ვიფიქროთ სამარშრუტო ტაქსებზე" - თენგიზ ცერცვაძე

თბილისის ინფექციური საავადმყოფოს გენერალური დირექტორის, თენგიზ ცერცვაძის განცხადებით, ავტობუსებისა და მეტროს მუშაობის აღდგენა შესაძლებელია, თუმცა გარკვეული რეგულაციების დაცვა უნდა მოხდეს.

როგორც ცერცვაძემ ჟურნალისტებს განუცხადა, საზოგადოებრივ ტრანსპორტში უნდა მოხდეს სკამების მონიშვნა, თუ სად შეეძლებათ მგზავრებს დაჯდომა.

"მეორე სერიოზული პრობლემა, ცოტა ნაკლებად სერიოზული, ვიდრე ტურიზმის გახსნა, არის საზოგადოებრივი ტრანსპორტის ამოქმედება. თქვენ იცით, რომ შეზღუდვების მოხსნის პირველ ეტაპზე ტრანსპორტზე შეზღუდვა დარჩა და ეს სავსებით ნორმალური იყო და მე ამას ვეთანხმები, მაგრამ ისიც აშკარაა ყველასთვის, რომ ეს დიდხანს ვერ გაგრძელდება, ვინაიდან, იმისთვის, რომ ქვეყანა გაიხსნას, იმისთვის, რომ ადამიანებმა სრულფასოვნად იცხოვრონ და ეკონომიკა გაცოცხლდეს, აუცილებელი პირობაა, ადამიანებს ჰქონდეთ გადაადგილების საშუალება.

ყველას საკუთარი მანქანა არ ჰყავს, ამიტომ უნდა აღდგეს, პირველ რიგში, ავტობუსებისა და მეტროს მოძრაობა და შემდეგ ალბათ შეიძლება ვიფიქროთ სამარშრუტო ტაქსებზე. მიმაჩნია, რომ შესაძლებელია ავტობუსებისა და მეტროს აღდგენა, ოღონდ უნდა დავიცვათ გარკვეული რეგულაციები“,- განაცხადა ცერცვაძემ.

ცერცვაძის თქმით, როდესაც საქართველოში ინფიცირების კერა აღარ იქნება, შესაძლებელი გახდება ტრანსპორტში ყველა შეზღუდვა მოიხსნას.

კერძოდ, ზოგიერთმა ქვეყანამ ეს უკვე გააკეთა: მოინიშნოს სკამები, სადაც შეიძლება მგზავრების დაჯდომა. ანუ, ერთ რიგში არ უნდა დაჯდეს ერთ კაცზე მეტი და რიგის გამოშვებით უნდა დასხდნენ მგზავრები. ეს, რა თქმა უნდა, გამოიწვევს მგზავრების რაოდენობის შემცირებას. თუ ჩვეულებრივ ავტობუსში ან მეტროს ვაგონში ეტევა პირობითად, ვთქვათ, 50 ან 100 კაცი, ასეთი რეგულაციის პირობებში დაეტევა იმის მესამედი.

მაგრამ ეს მაინც ბევრად უკეთესია, ვიდრე სულ არაფერი,დავიწყოთ ამით. თუ ჩვენ საქართველოში მივაღწიეთ იმას, რომ საერთოდ წყარო მოვსპეთ ამ კოვიდინფექციის და აღარ იქნა კერა, ვისგანაც შეიძლება ადამიანი დაინფიცირდეს, შემდეგ შეიძლება, ეტაპობრივად ეს შეზღუდვებიც მოიხსნას. ასე რომ, მე მაინც ყველაფერს ვუყურებ ოპტიმისტურად“, – განაცხადა თენგიზ ცერცვაძემ.