მთავრობა აპირებს დაეხმაროს მოქალაქეებს, ვინც სამსახური დაკარგა - გიორგი გახარია

პრემიერ-მინისტრის, გიორგი გახარიას განცხადებით, მოხდება იმ ადამიანების იდენტიფიცირება, ვინც კორონავირუსის გამო სამსახური დაკარგა. როგორც პრემიერ-მინისტრმა აღნიშნა, იდენტიფიცირების შემდეგ მთავრობა მათ დაეხმარება.

“ჩვენ გვესმის, რომ ჩვენ უნდა მოვახდინოთ თითოეული ჩვენი იმ მოქალაქის იდენტიფიცირება, რომელმაც დაკარგა სამსახური და მას შემდგომ, რაც ამ იდენტიფიცირებას მოვახდენთ, ჩვენ გვექნება სპეციალური ღონისძიებები მათი ასევე პირდაპირი დახმარებისთვის”, - განაცხადა გახარიამ.

• მთავრობამ, ქვეყნის ეკონომიკის მხარდაჭერისთვის, 2 მილიარდი ლარი გამოიყო - რაზე დაიხარჯება ეს თანხა

მისივე თქმით, დღეს სახელმწიფო ფუნქციონირებს კრიზისული ბიუჯეტის ფარგლებში.

"დღეს შეუძლებელია როგორმე სწორი პროგნოზის გაკეთება რამდენად რთული იქნება შედეგები ეკონომიკაზე. ერთმნიშვნელოვნად ყველა თანხმდება, რომ ჩვენ შევდივართ რეცესიის პერიოდში და შეუძლებელია ამას არ ჰქონდეს მძიმე ზეგავლენა საქართველოს ეკონომიკაზე, ეს არის საქართველოს ეკონომიკაზე გლობალური ტენდენციების ზეგავლენა, თუმცა, ჩვენ ასევე ძალიან კარგად გვესმის, რომ ის მკაცრი ღონისძიებები, რომელსაც ჩვენ ახლა ვატარებთ ვირუსთან ბრძოლისა და გამკლავების თვალსაზრისით, რა თქმა უნდა, პირდაპირ იქონიებს გავლენას ეკონომიკურ შედეგებზე.

დღეს არ ვართ იმ მდგომარეობაში, რომ ვისაუბროთ ეკონომიკის იმ ზრდაზე რომელზეც წლის დასაწყისში ვსაუბრობდით. ყველას კარგად გვესმის რომ დღეს სახელმწიფო ფუნქციონირებს კრიზისული ბიუჯეტის ფარგლებში. პირველ რიგში გვესმის, რომ თითოეულმა ჩვენმა მოქალაქემ მიიღო პირდაპირი ეკონომიკური ზიანი იმ ღონისძიებების გამო, რომელიც მთავრობამ გაატარა და იძულებულია გაატაროს ჩვენი მოქალაქეების ჯანმრთელობის დასაცავად და ეს ზიანი ხშირ შემთხვევაში არის პირდაპირი და ხელშესახები. ხშირ შემთხვევაში ადამიანებმა დაკარგეს შემოსავალი და სამუშაო ადგილები," - განაცხადა გახარიამ.