"ოპერაციის დროს დაფიქსირდა გულის გაჩერება" - როგორია ხაშურში ყოფილი ქმრის მიერ დაჭრილი ქალის მდგომარეობა
ხაშურში ყოფილი ქმრის მიერ დაჭრილი ახალგაზრდა ქალის ჯანმრთელობის მდგომარეობა კვლავ კრიტიკულად მძიმეა. პაციენტს, რომელსაც გულმკერდისა და მუცლის არეში ბასრი საგნით მიყენებული მრავლობითი ჭრილობები აღენიშნებოდა, ხაშურის რეფერალურ საავადმყოფოში ქირურგიული ოპერაცია გაუკეთდა.
"ოპერაცია დასრულდა, პაციენტი გადაყვანილია კრიტიკული მედიცინის დეპარტამენტში. მისი მდგომარეობა კრიტიკულად მძიმეა - მიღებული დაზიანებების და ამ დაზიანებების სიმძიმის შესაბამისია. ერთ-ერთი ჭრილობა ფიქსირდება გულშიც, ოპერაციის მსვლელობისას, დაფიქსირდა გულის ტამპონადა, სიცოცხლისთვის საშიში პათოლოგიური მდგომარეობა, იგივე გულის გაჩერება, თუმცა, მალევე მოხერხდა რიტმის აღდგენა", - აცხადებენ ხაშურის რეფერალურ საავადმყოფოში.
24 წლის ქალს სხეულის მრავლობითი დაზიანებები ქმარმა მიაყენა, რომელთანაც უკვე რამდენიმე წელია აღარ ცხოვრობდა. დაჭრის მომენტში ახალგაზრდა ქალი დედასთან ერთად მიდიოდა ქუჩაში. რა დროსაც მეუღლეს შეხვდა და შელაპარაკება მოუვიდათ განქორწინების საკითხთან დაკავშირებით. ამის შემდეგ მამაკაცმა ქალი დაჭრა.
"როგორც საავადმყოფოში თქვეს, ძალიან მძიმედაა დაჭრილი. ოპერაციაზე შეუყვანიათ ახლა... საწყალი დედამისიც იქ არის, გულწასულია სულ. ეს ბიჭი სულ ქუჩაში იდგა, ალბათ უმუშევარია. საავადმყოფოს წინ ტოტალიზატორია და სულ მანდ იყო, შემთხვევაც იქ მოხდა" - უყვება AMBEBI.GE-ს ინციდენტის თვითმხილველი. ბრალდებული პოლიციამ შემთხვევის ადგილზევე დააკავა. გამოძიება, დამამძიმებელ გარემოებებში ჩადენილ განზრახ მკვლელობის მცდელობის ფაქტზე საქართველოს სისხლის სამართლის კოდექსის 11 პრიმა 19-109-ე მუხლის მე-2-ე ნაწილის „ვ“ ქვეპუნქტით მიმდინარეობს.
კორონავირუსით ინფიცირებული 6 პირი, ორი ოჯახის წევრები არიან
"ევექსი" - კორონავირუსი ჩვენ სათაო ოფისში მომუშავე ადამიანს დაუფიქსირდა
