14
მარტიდღის ზოგადი ასტროლოგიური პროგნოზი
"საზოგადოებრივი მაუწყებლის" ოპერატორის, 29 წლის სანდრო ბერაძის მშობლებმა გადაცემა "პროფილის" ეთერში პირველად ისაუბრეს გარდაცვლილ შვილზე, რომელიც აზარტულ თამაშებს ემსხვერპლა.
ნინო ლოლაძის თქმით, სანდრო საკუთარ თავთან ულმობელ ბრძოლაში დამარცხდა, რადგან ვერ ეგუებოდა და ეჯავრებოდა თავისი თავი ისეთი, როგორიც ის აზარტულ თამაშებზე დამოკიდებულებამ გახადა:
"აზარტმა იმდენად მოიცვა მთელი მისი გონება, რომ თავი შეზიზღდა. ეს აღარ იყო თამაში ფულისთვის და აზარტისთვის, ეს იყო თამაში თამაშისთვის..." - ყვება "პროფილთან" გარდაცვლილის დედა.
მშობლები იხსენებენ იმასაც, როგორ დაემშვიდობა 29 წლის შვილი თვითმკვლელობამდე:
"სულ კახას მეძახდა, მთელი ცხოვრება. ბოლოს, ჯერ დედას დაურეკა, მერე ძმას და ბოლოს მე დამირეკა: მამა, მაპატიე ყველაფერიო... და მანდ დაასრულა ყველაფერი. მაშინ პირველად დამიძახა მამა... მე იმ დღიდანვე უკვე სხვანაირად ვეძებდი, ბავშვებს, ვინც ეძებდნენ არ ვაგრძნობინებდი, მაგრამ მე სულ ხეებზე ვიყურებოდი..." - ყვება კახა ბერაძე (სანდრო ბერაძე დაკარგვიდან 4 დღის შემდეგ ცხვარიჭამიასთან ტყეში იპოვეს, ავტ.)
გარდაცვლილის მამა იხსენებს, როგორ ცდილობდა თამაშებზე დამოკიდებულებისგან თავის დახსნას სანდრო:
"ბავშვობაში "მაიმუნობდა", ე.წ 20-თეთრიანები რომ შემოვიდა, მაგას თამაშობდა, მაგრამ ბოლო წლებში, რაც ეს ონლაინთამაშები წამოვიდა, ტელეფონით თამაშობდა, მთხოვდა ხოლმე თანხას, ვალი მაქვს და მომეციო... ამ ერთხელ და მერე მორჩაო, იფიცებდა, მეტს აღარ ვიზამო...
ბოლოს დამთანხმდა და წამომყვა ფსიქოლოგთან, სარეაბილიტაციო ცენტრშიც ვიყავით... გაგიჟდა, ამხელა თანხას ითხოვენ და არ მინდაო... ერთადერთი რაც უნდოდა, იქნებ საქართველოდან წავიდე და სხვა რამეზე გადავერთოო. აქ რასაც უყურებდა, რეკლამას, ბილბორდებს, ამისგან მოცილება უნდოდა...
...ხანდახან, როცა წააგებდა, მეტყოდა: რა ვქნა, არ მინდა მაგრამ ეშმაკი შემიჩნდაო... შველას ითხოვდა და გულწრფელი იყო ამ დარდში... გულწრფელად განიცდიდა, რომ მამას ფულს სთხოვდა, გვანერვიულებდა და სულ ამბობდა, ეს ყველაფერი რომ დამთავრდება, აქეთ დაგიდგებით გვერდში და დაგეხმარებითო...
ტყუილია რომ ვალი ჰქონდა, ჩემზე უკეთ ეგ არავინ იცის. მისმა საძმაკაცომაც გვითხრა, ვისთვისაც ჰქონდა გამორთმეული 50-50 ლარი, ყველას დაგვიბრუნაო..." - ამბობს სანდროს მამა, კახა ბერაძე.
გარდაცვლილი ოპერატორის მშობლების თქმით, მათი შვილი ვეღარ უმკლავდებოდა ცდუნებას, რომელსაც მრავალრიცხოვანი რეკლამა, სარეკლამო სმს-ები და ქუჩაში ბილბორდები აღვივებდა. სანდრო ბერაძის მეგობრებმა, მისი გარდაცვალების შემდეგ კამპანია დაიწყეს აზარტული თამაშების წინააღმდეგ და სურთ, რომ მთელი საქართველო შეუერთდეთ ბრძოლაში:
"იმიტომ დავთანხმდით საუბარს, გვინდა ბევრისთვის ეს გასაგები გახდეს, რომ არ შეიძლება ამ თაობის გაწირვა, რეკლამებით, ონლაინთამაშებით. სანდრიკასნაირი ბევრია, სამწუხაროდ... პატარა ბავშვების ფსიქიკა ვერ უძლებს ამდენს, წლები რომ გადის, ეს ყველაფერი ილექება, გროვდება და ყველა არა, მაგრამ ბევრი ძალიან ცუდად ამთავრებს...
სანდრო გახდა კატალიზატორი, დამწყები და არ გვინდა ეს მუხტი ჩაქრეს. გვინდა რაც შეიძლება ბევრი ადამიანი შემოგვიერთდეს ამ საქმეში, რადგან საუბარია სანდროს სახელით სხვა ბავშვების გადარჩენაზე... გვინდა დაგვეხმაროთ, აგვყვეთ, რომ ეს ყველაფერი მოხდეს ახალი თაობის გადასარჩენად და სანდრიკა იყოს ბოლო, ვინც ამ პრობლემით, ამ გზით წავიდა ცხოვრებიდან...
...წამდაუწუმ ვერ ჩაეძიები შვილს, რომ მის პირად სივრცეში არ შეიჭრა, მაგრამ მშობლები მაინც უფრო ყურადღებიანები უნდა იყვნენ... თუნდაც, ის რომ ჩვენ გვერიდებოდა ამ პრობლემაზე საუბარი და ბევრი ახლაც გაჩუმებულია... იციან შვილის პრობლემა და ერიდებათ, ათასი ფაქტორი მოქმედებს... თუმცა, როცა ეს დაგვემართა, მერე მივხვდი, რომ თურმე უნდა იყვირო ამ პრობლემაზე! იმიტომ რომ ყველა ვინც არის ამ დაავადებით დაავადებული, უნდა უმკურნალონ. დამალვა არ შველის ამ საქმეს" - მიმართავს საზოგადოებას ნინო ლოლაძე.
ნუ რათქმაუნდა კაზინოების რეკლამა რომ უნდა აიკრძალოს ეს ცალსახა თემაა და ამაზე მგონი აღარც აღარავინ დავობს, მაგრამ ბიჭს ბავშვობიდანვე (მეც მისი ხნის ვარ და ჩემს ბავშვობაში მახსოვს ეს 20 თეთრიანი აპარატები) ქონია მიდრეკილება აზარტული თამაშებისადმი და მგონია რომ მისმა საახლობლომ დააგვიანა ამაზე რეაგირება, ან თავის დროზე სათანადოდ ვერ შეფასდა მისი ეს დამოკიდებულება და ბოლოს უკვე იმ დონემდე მივიდა ვეღარავინ უშველა. ადამიანს ბავშვობიდანვე ეტყობა რამდენად ძლიერია მასში აზარტი (არამარტო თამაშებისადმი). სწორედ ასეთი ბავშვების გადასარჩენად აუცილებელია კაზინოების რეკლამის აკრძალვა და მასში რეგისტრაციის გართულება. სულ რომ არ აკრძალავენ ეს დღესავით ნათელია, მაგრამ პირველ ეტაპზე ესეც საკმაოდ დიდი შვება იქნება.
თუ საქართველოს მოქალაქეებზე აიკრძალება თამაში, და ონლაინ კაზინოები საერთოდ აიკტ=რძალება, პრობლემა მოგვარდება, მე სხვა გამოსავალს ვერ ვხედავ.