"ბიძინას მონებო, ვირთხებო" - აქციის მონაწილეები დეპუტატებს პარლამენტში არ უშვებენ

ხმაურია საქართველოს პარლამენტის მიმდებარე ტერიტორიაზე - აქციის მონაწილეებმა საკანონმდებლო ორგანოში შესვლის საშუალება არ მისცეს დეპუტატებს - რევაზ არველაძესა და მერაბ ქვარაიას.

უხუცესი დეპუტატი არველაძე პირველი იყო, ვინც დღეს პარლამენტში მივიდა და შენობაში შესვლას შეეცადა, თუმცა პიკეტის და აქციის მონაწილეების პროტესტის გამო, იძულებული გახდა ტერიტორია დაეტოვებინა.

აქციის მონაწილეები დეპუტატის მისამართით სკანდირებდნენ: „წადი“, „ვირთხა“, "ბიძინას მონა".

ხმაური მოჰყვა ზუგდიდის მაჟორიტარი დეპუტატის, მერაბ ქვარაიას გამოჩენასაც. აქციის მონაწილეებმა დეპუტატს, რომელმაც პროპორციულ საარჩევნო სისტემაზე გადასვლას მხარი არ დაუჭირა, „მონა“, „ბიძინას გოშია“ და „ვირთხა“ ეძახეს.

ქვარაიას პარლამენტში შესვლა სურდა, თუმცა ის საკანონმდებლო ორგანოში აქციის მონაწილეებმა არ შეუშვეს.

სიტყვიერი დაპირისპირების გარდა, ადგილი ჰქონდა შეხლა-შემოხლასაც, რის გამოც პროცესში პოლიცია ჩაერია. საბოლოოდ, ქვარაიამ პარლამენტის ტერიტორია სწორედ სამართალდამცავების დახმარებით დატოვა.