"რამდენიმე წინსაფარი მაქვს, მაგრამ სახლში ხალათებით სიარული მიყვარს" - ვინ არის "მასტერშეფის" კონკურსანტი, რომელმაც ინტერნეტმომხმარებელი აალაპარაკა

ყველაზე გემრიელი კულინარიული შოუ "მასტერშეფი" სატელევიზიო სეზონზე დაბრუნდა და პირველივე გადაცემას ძალიან დიდი გამოხმაურება მოჰყვა სოციალურ ქსელში.

როგორც დაანონსდა, ჟიური წელს უფრო კრიტიკული იქნება, რაც დამატებით სანერვიულოს უქმნის ახალ მონაწილეებს.

ჟურნალისტი მარიამ ქურდიანი ერთ-ერთია, ვინც შეეცდება მკაცრ ჟიურის სამეულს სეზონის ბოლომდე მოაწონოს თავისი მომზადებული კერძები და ფინალშიც გავიდეს. ამბობს, რომ მისთვის მიუღწეველი მიზანი არ არსებობს, თუმცა შოუში მის პირველივე გამოსვლას მაყურებელი კრიტიკულად შეხვდა.

"ეს ლუკას ნუ ეპრანჭება, ბევრს გადაგვიმტერებს"; "მეორე თათიაა"; "კომპლექსებით გამოტენილია და მაკა კვიციანს როგორ ბაძავს"; "ამან თუ პროექტში გაიმარჯვა, საჯაროდ ლაივში, უნდა გადავხტე მტკვარში" - წერენ მარიამ ქურდიანის ვიდეოს კომენტარებში "ფეისბუქზე".

AMBEBI.GE-მ გადაწყვიტა, ახლოს გაგაცნოთ "მასტერშეფის" მონაწილე, რომელმაც ერთი ნახვით აალაპარაკა ინტერნეტმომხმარებლები:

"მე ვარ მარიამ ქურდიანი, 29 წლის, თბილისიდან, „მოამბის“ კრიმინალისა და სამართლის ჟურნალისტი. ძალიან გამიკვირდა, ამდენი წელია ჟურალისტი ვარ, ყოველთვის განსაკუთრებული ადგილებიდან მაქვს ჩართვა საინფორმაციოში და არავინ არ მიცნობს. ახლა კი „მასტერშეფის“ ვიდეოს ძალიან დიდი გამოხმაურება მოჰყვა.

დაახლოებით ათი წელია ჟურნალისტიკაში ვარ, აქედან შვიდი წელია „მოამბეში“ ვმუშაობ, თუმცა ახლა დეკრეტში ვარ. ორი შვილი მყავს, 6 წლის და 4 თვის. ჩემი მეუღლე ლევან ბადურაშვილი, ბიზნესმენია, მამასთან ერთად პროექტი აქვს. ჩემი მამამთილი ყოფილი ენერგეტიკის მინისტრია, ედუარდ შევარდნაძის დროს მუშაობდა".

- გადაცემაში თქვი, ჩემთვის მიუღწეველი მიზანი არ არსებობსო...

- მინდოდა ოჯახი - მყავს ოჯახი, მინდოდა გოგო-შვილი, ბიჭი-შვილი, წარმატებული ჟურნალისტი ვყოფილიყავი, მქონოდა ბედნიერი ოჯახი და ამას, ყველაფერს მივაღწიე.

- კულინარიით რა ასაკიდან დაინტერესდი?

- ოჯახში ყოველთვის ძალიან გემრიელ კერძებს ამზადებდნენ. დედას ბევრი ნათესავები ჰყავს და ყველანი ერთად ვიკრიბებოდით "ნახალოვკაში". ბავშვები დავრბოდით და უფროსები სხვადასხვანაირ კერძებს ამზადებდნენ. ამ ემოციებმა და გარემომ ძალიან იმოქმედა.

გვქონდა ტრადიციული კერძი - ლობიოს გუფთა, რომელიც იოსელიანების ოჯახმა გვასწავლა, ბებიას გაუმხილეს რეცეპტი. უგემრიელესია და ძალიან მინდა, რომ გადაცემაში მოვამზადო, მაგრამ რეცეპტს ვერ გავამხელ, დედა და იოსელიანების სამზარეულო ანათემას გადამცემს.

- შენი საყვარელი კერძი რომელია?

- სპაგეტი, ქართული სამზარეულოდან კი ხინკალი მიყვარს. ჩემს მეუღლეს ძალიან უყვარს ჩემი მომზადებული კერძები. ყოველთვის ვცდილობ მოვუმზადო, მარტო ვცხოვრობთ და რომ არ გავაკეთო მშიერი იქნება. რამდენიმე წინსაფარი მაქვს, მაგრამ სახლში ძალიან მიყვარს ხალათებით სიარული. თმა ყოველთვის მოწესრიგებული მაქვს და ისე შევდივარ სამზარეულოში.

- საინტერესო კომენტარებია თქვენს ვიდეოზე სოციალურ ქსელში, წერენ რომ შენი და დალი ჩიტალაძის დუელი საინტერესო იქნება...

- ვნახოთ... მე და დალი გვერდიგვერდ უბანში ვცხოვრობთ. ის ვერაზე და მე ვაკეში რაზმაძეზე. "ინსტაგრამზე" დალის "ფოლოვერიც" ვარ და მიყვარს ძალიან ეს ქალი.

- და სიგოიმე არ გიყვარს...

- სიგოიმე მგონი არავის უყვარს, უბრალოდ ხმამაღლა არავინ ამბობს, ეს არის შოუს ნაწილი და საზოგადოება მინდა ვუთხრა, არ გაღიზიანდნენ. არ მგონია ვინმეს თავის თავზე მიეღო, რადგან კონკრეტულად არავისზე მითქვამს. შოუში რომ მივდიოდი, წინა სეზონიდან გამომდინარე ვგრძნობდი, რომ შეიძლებოდა ხალხს მოსწონებოდი ან პირიქით.

მყავს ოჯახი, რომელიც ძალიან მიყვარს, ყველა განვიცდით რაც სოციალურ ქსელში კომენტარებში ხდება. სიუჟეტი მეუღლეს და ოჯახის წევრებს ძალიან მოეწონათ, მგონია, რომ დადებითი იყო და სახალისო. კომენტარები მათ არ წაუკითხავთ, მაგრამ მეუღლე მიხვდა რომ დიდად ნასიამოვნები არ ვიყავი და სცადა ჩემი გამხნევება.

- კრიტიკული იყო ჟიური...

- ჩემი შეცდომა იყო საჭმლის პროპორციები, მეტი ბრინჯი მქონდა და ნაკლები კრევეტი და როგორც ერთმა ფეისბუქმომხმარებელმა დაწერა, საქართველოა და ძვირი ღირსო კრევეტი.

- თქვენზე იმასაც წერენ, წინა სეზონის მონაწილეების, მაკას და თათიას ნაზავიაო.

- ძალიან არ მესიამოვნა ეს კომენტარი. მე და თათია ძალიან განსხვავებულები ვართ, მინიმუმ 40 კილომეტრი გვაშორებს ერთმანეთისგან და ვიმეორებ რომ მე მყავს ოჯახი და ძალიან ბედნიერი ვარ, ჟიურის წევრებს არ ვეპრანჭები.

მე და თათია სტილითაც ძალიან განსხვავებულები ვართ, მე დესერტები არ მიყვარს და არც ტკბილეულს ვჭამ. მინდა ყველამ იცოდეს, რომ ძალიან ბევრი ვიშრომე ცხოვრებაში, იმისთვის რომ მიმეღწია, რაც მაქვს. მაქვს დოქტორის ხარისხი, რომელიც 2018 წელს მოვიპოვე და 160-გვერდიანი ნაშრომი დავწერე. ამ დროს არ იყიდებოდა დიპლომები. ასევე ამბობენ, რომ მამის, ქმრის და დედის ფულებით არისო, მოდი ჩამოყალიბდნენ ვისი.

- რა მოლოდინი გაქვს შოუსგან?

- მეგონა რომ უფრო ლოიალური და იუმორით სავსე მაყურებელი დამხვდებოდა, არ მეგონა ასეთ გაღიზიანებას თუ გამოვიწვევდი. ძალიან ნუ გამაკრიტიკებთ, ეს არის შოუ. ჩვენს უკან დგანან პროდიუსერები, გამოგონილი არაფერია ყველა ის ტიპაჟია რაც ვართ, მაგრამ მაინც შოუა.

მოლოდინი მაქვს, რომ ჩემი კერძებით მოვაწონებ თავს მაყურებელს და მიხვდებიან, რომ ჩემი ადგილი იქ არის.

- ჟურნალისტიკიდან კულინარიაში ხომ არ გადაინაცვლებ?

- არა, მაგრამ ძალიან მინდა რომ საკუთარი კაფე მქონდეს. სადაც ისეთ გარემოს შევქმნი, რომ ადამიანს მოუნდება მოსვლა, განტვირთვა, გემრიელი კერძების დაგემოვნება და სასიამოვნო დროის გატარება.