ტაქსის მანქანა თეთრ ფერად ჯერ მხოლოდ 994-მა მძღოლმა გადაღება

ტაქსის ლიცენზიის მქონე მძღოლებიდან, ჯერჯერობით მხოლოდ 994-მა გამოყენა ვაუჩერი და საკუთარი მანქანა თეთრ ფერად გადაღება.

როგორც "ინტერპრესნიუსს“ შესაბამისი მომსახურების გაწევაზე ტენდერში გამარჯვებული კომპანიის, შპს “ალმას“ დირექტორმა, გიორგი ტრაპაიძემ განუცხადა, ტაქსის ლიცენზიის მქონე მძღოლებზე ჯამში, თეთრად გადაღებვის და ფირის გადაკვრის 2610 ვაუჩერია გაცემული, თუმცა 7 აგვისტოს მონაცემებით, განაღდებულია 994 ვაუჩერი.

„ღებვის და ფირის გადაკვრის ვაუჩერების გაცემის ვადა 10 აგვისტოს ამოიწურა. რაც შეეხება ქიმწმენდის ვაუჩერს, მძღოლებს შეუძლიათ ისევ მოგვმართონ. ოქტომბრამდე გრძელდება გაცემული ვაუჩერების განაღდების მომსახურება და ასევე გრძელდება ქიმწმენდის ვაუჩერების გაცემა და განაღდება.

10 აგვისტოს მონაცემებით, გაცემულია გადაღებვის და ფირის გადაკვრის 2610 ვაუჩერი“, - განაცხადა ტრაპაიძემ.

„ალმას“ დირექტორის განცხადებით, მოლოდინი ჰქონდათ, რომ შესაბამის მომსახურებას დაახლოებით 15 ათას ტაქსს გაუწევდნენ.

„თავდაპირველი პროექტის მიხედვით, კომპანია „ალმას“ მომსახურება უნდა გაგვეწია დაახლოებით, 15 ათასი ტაქსისთვის, მათთვის, ვისაც ლიცენზია გასული წლის 10 ოქტომბრამდე ჰქონდა აღებული. აქედან გამომდინარე გვქონდა გახსნილი სერვის ცენტრები მთელი თბილისის მასშტაბით და ვიყავით მომზადებული რომ ამ რაოდენობისთვის მომსახურება გაგვეწია.

ამ პერიოდის განმავლობაში კიდევ დამატებით ღებვას სტიკერების გადაკვრაც დაემატა და ბევრი სხვა თავდაპირველი პირობა შერბილდა იმისთვის, რომ უფრო გამარტივებულიყო მძღოლებისთვის მომსახურება. მძღოლების მომართვიანობაზე ჩვენ ვერანაირ გათვლას ვერ გავაკეთებდით. შესაბამისად, დღეს რა რაოდენობაც არის ჩვენამდე მოსული, არცერთი ადამიანი მომსახურების გარეშე არ დარჩენილა“, - განაცხადა ტრაპაიძემ.

შეგახსენებთ, რომ 2019 წლის 1-ელ ოქტომბერს ტაქსების რეფორმის მეორე ეტაპი იწყება.

ამ დროისთვის თბილისში მოძრავი ლიცენზირებული ტაქსები თეთრი ფერის, მარცხენასაჭიანი და ხუთკარიანი უნდა იყოს, გავლილი ჰქონდეს ტექდათვალიერება, ასევე ფლობდეს ლიცენზიას. ლიცენზია თბილისში 31 784 მძღოლს აქვს აღებული.