6
მაისიდღის ზოგადი ასტროლოგიური პროგნოზი
ვინ თქვა, რომ პოლიტიკა ქალების საქმე არ არის? მიუხედავად იმისა, რომ ხელისუფლების დერეფნებში ხშირად ვერ გაიგონებ ქალის ქუსლების ხმას. მშვენიერი სქესის ბევრი წარმომადგენელი როდი მიჰყავს კარიერულ კიბეს ძალაუფლების ოლიმპამდე - ეს მხოლოდ იმიტომ, რომ მაღალი ქუსლებითა და ქვედაკაბით მასზე აცოცება ძალიან ძნელია.
ახლა კი იმ ძლიერ ქალბატონებს წარმოგიდგენთ, რომლებმაც ყველაფერი მოასწრეს: პირად ცხოვრებაშიც იპოვეს ბედნიერება და ქვეყანასაც მართავენ.
კრისტინა ფერნანდეს დე კირშნერი, არგენტინის პრეზიდენტი
საოცარია, მაგრამ ეს ლამაზმანი მაშინვე გახდა პრეზიდენტი, როგორც კი ეს მაღალი პოსტი მისმა ქმარმა ნესტორ კირშნერმა დატოვა. არგენტინის სათავეში მართლაც ოჯახური ცვლაა. კრისტინა თავის ქვეყანაში მეორე ქალ პრეზიდენტად იქცა და პირველ სახალხოდ არჩეულ ქალად ამ პოსტზე.
განათლებით იურისტი საადვოკატო პრაქტიკას მისდევდა, თან პარტიულ მოღვაწეობასა და ოჯახსაც არ ივიწყებდა: ნესტორთან ქორწინებაში მყოფმა ორი შვილი გააჩინა. გარდა ამისა, ნამდვილ ლედიდ რჩება და ხშირად შედის ყველაზე ლამაზი ქალი პოლიტიკოსების რეიტინგებში.
ელენ ჯონსონ-სერლიფი, ლიბერიის პრეზიდენტი
ეს ქალბატონი იმით არის უნიკალური, რომ სუსტი სქესის პირველი წარმომადგენელია, ვინც აფრიკის კონტინენტზე პრეზიდენტი გახდა. ჰარვარდში ბაკალავრის ხარისხის მიღების შემდეგ ლიბერიის ფინანსთა მინისტრის თანაშემწის პოსტზე მიიწვიეს. ამ თანამდებობაზე მყოფს დაუმსახურებლად დასდეს ბრალი 3 მლნ დოლარის მითვისებაში. თუმცა ამ ფაქტმა ვერ შეუშალა ხელი ელენს, გარკვეული დროის შემდეგ თვით ფინანსთა მინისტრის პოსტზე გადასულიყო. მკაცრად აკრიტიკებდა ქვეყნის მოქმედ რეჟიმს, რის გამოც 10 წლით ჩასვეს ციხეში, მაგრამ მალე გაათავისუფლეს და ლიბერიიდან გააძევეს.
თუმცა მის ხასიათში არ არის მარცხთან შეგუება: ჯონსონ-სერლიფი "სიტი-ბანკის" აფრიკული განყოფილების ვიცე-პრეზიდენტი გახდა, ოთხი ვაჟის გაჩენაც მოასწრო, მერე კი სამშობლოში დაბრუნდა, სადაც პრეზიდენტად აირჩიეს. ელენს ქმარიც ჰყავდა, თუმცა ის პრეზიდენტის პოსტზე ელენის ერთ-ერთმა წინამორბედმა (ვის ხელისუფლებაშიც ელენი მინისტრი იყო) მოკლა.
ანგელა მერკელი, გერმანიის კანცლერი
ეს გერმანელი რკინის ლედი, როგორც ხანდახან უწოდებენ ანგელა მერკელს, პირველი ქალი გახდა გერმანიის კანცლერის პოსტზე. გვარი მერკელი მას პირველი ქმრისგან ერგო - ულრიხ მერკელისგან, რომელიც მოსკოვში სწავლის პერიოდში გაიცნო. სხვათა შორის, რუსულად შესანიშნავად ლაპარაკობს და თავის დროზე რუსულ ენაში გამართულ ოლიმპიადებშიც იმარჯვებდა. ანგელა განათლებით ფიზიკოსია, პოლიტიკაში კი ქრისტიან-დემოკრატთა პარტიაში აქტიური მოღვაწეობის წყალობით მოხვდა.
ჰელმუტ კოლის ფავორიტმა მერყეობის გარეშე აქცია ზურგი თავის მფარველს, როცა კოლი ფინანსურ სკანდალში გაეხვია, მოგვიანებით კი პარტიის მეთაურობაც თავადვე იკისრა. ახლა ფრაუ კანცლერი გათხოვილია - მეორედ. მისი ქმარი ქიმიკოსი იოაჰიმ ზაუერია, რომელსაც ხანდახან ირონიულად "ჰერ მერკელს" უწოდებენ. მაგრამ ნუთუ ეს უბედურებაა, როცა შენი ცოლი ყველაზე გავლენიანი პოლიტიკოსი ქალია ბოლო სამი წლის განმავლობაში, ჟურნალ "ფორბსის" მონაცემებით.
ტარია ჰალონენი, ფინეთის პრეზიდენტი
ტარია ჰალონენი პირველი ქალია ამ ქვეყანაში პრეზიდენტის პოსტზე, მაგრამ იმდენად პოპულარულია, რომ მეორე ვადითაც აირჩიეს, ეს კი ყველა მამაკაცს როდი ძალუძს.
ტარია მშენებლისა და დიასახლისის ოჯახში დაიბადა. სკოლის დამთავრების შემდეგ გადაწყვიტა, რომ სწავლა არ იყო აუცილებელი და მუშაობა დაიწყო. თუმცა 22 წლისამ მაინც ჩააბარა უნივერსიტეტში, 25-ისამ კი იურისტის დიპლომი მიიღო. მოგვიანებით, როცა უკვე ცნობილი პოლიტიკოსი გახდა, პარლამენტის დეპუტატი, სოციალური საკითხების მინისტრი, იუსტიციის მინისტრი და საგარეო საქმეთა მინისტრი, აღიარებდა, რომ იურისპრუდენცია მაინც მისი საყვარელი საქმეა.
ტარია ცნობილია, როგორც სქესობრივი უმცირესობების უფლებების აქტიური დამცველი და ურწმუნო ფემინისტი, მაგრამ იმავდროულად მოსიყვარულე დედა და ცოლი. ტარიას ქმარი, პენტი არაიარვი, მისი ყოფილი მეზობელია. წყვილს არაფერმა შეუშალა ხელი, ოფიციალური რეგისტრირების გარეშე ეცხოვრათ მთელი 16 წელი, თუმცა მაღალმა პოსტმა, რომელიც ტარიამ დაიკავა, მას თავისი მოვალეობები დააკისრა - ხელის მოწერა მაინც მოუხდათ. აქამდე კი პრესაში დიდხანს მსჯელობდნენ, როგორ მოეხსენიებინათ მისი თანამეცხედრე: "ცხოვრების მეგზური" თუ "პრეზიდენტის მამაკაცი".
პრატიბხა პატილი, ინდოეთის პრეზიდენტი
ინდოეთი საპარლამენტო რესპუბლიკაა და პრეზიდენტს იქ უმთავრესად ცერემონიული ხასიათის როლი ენიჭება, თუმცა ეს სულაც არ ნიშნავს იმას, რომ ქალისთვის იოლია ამ პოსტის დაკავება. პრატიბხა პატილი ინდოელი ქალების ნამდვილი იმედია. კვლევის თანახმად, ამ ქვეყანაში სქესობრივი ნიშნით დისკრიმინაცია ხომ კვლავ სერიოზულ პრობლემად რჩება.
ინდოეთში აღმასრულებელი ხელისუფლების სათავეში ერთხელ უკვე იყო ქალი - ლეგენდარული ინდირა განდი, რომელიც პრემიერ-მინისტრი გახლდათ. პრატიბხამ 72 წლის ასაკში დაიკავა პრეზიდენტის პოსტი. თავის კოლეჯში ყოფილი სილამაზის დედოფალი, პრაქტიკოსი ადვოკატი იყო და 27 წლისა დაინტერესდა პოლიტიკით. პრეზიდენტობამდე სამი წლით ადრე შტატის გუბერნატორად აირჩიეს. ოჯახური ცხოვრების დაწყობაც მოასწრო: ინდოელ პოლიტიკოსს გაჰყვა ცოლად და ქალ-ვაჟი გააჩინა.
მერი მაკელისი, ირლანდიის პრეზიდენტი
მერი მაკელისი ყველაფერში ფრიადოსანია: სკოლა უმაღლესი შეფასებებით დაამთავრა, ბელფასტის სამეფო უნივერსიტეტში ჩააბარა, სადაც იურისტის დიპლომი მიიღო, უკვე 24 წლისა კი დუბლინის პრესტიჟულ უნივერსიტეტში ყველაზე ახალგაზრდა პროფესორი გახდა. პოლიტიკურ პარტიაში გაწევრებულმა პირველი ნაბიჯები გადადგა ამ არენაზე. მორწმუნე კათოლიკე აქტიურად გამოდიოდა აბორტების, ჩასახვის საწინააღმდეგო საშუალებებისა და განქორწინებების აკრძალვის მოთხოვნით, ასევე აქტიურად ემხრობოდა ირლანდიის გაერთიანებას.
დღეს ის სახალხო რჩეულია, რომელმაც ამ ქვეყნის ისტორიაში მაქსიმალური ხმების რაოდენობით გაიმარჯვა და მეორე ვადითაც აირჩიეს. გარდა ამისა, ქვეყნის ინტერესების გათვალისწინებით მაკელისმა საკუთარი ინიციატივით 10 პროცენტით დაიკლო ხელფასი. მერის ქმარი და სამი შვილი ჰყავს.
დალია გრიბაუისკაიტე, ლიტვის პრეზიდენტი
ამ ქალბატონმა, ისევე როგორც ზემოთ ჩამოთვლილებმა, თავისებური პოლიტიკური რეკორდი დაამყარა: მისი შემთხვევა მეორეა ლიტვის ისტორიაში, როცა პრეზიდენტი ხმის მიცემის პირველივე ტურზე აირჩიეს. ქალის მმართველობის სახალხო მხარდაჭერა აშკარაა.
განათლებით დალია ეკონომისტია, ლენინგრადში სწავლობდა და "როტ-ფრონტის" ბეწვეულის ფაბრიკაში მუშაობდა. ვინ იფიქრებდა, რომ გარკვეული დროის შემდეგ ლიტვის ხელისუფლებაში რამდენიმე ვიცე-მინისტრის პოსტს დაიკავებდა. მას მერე, რაც ლიტვა ევროკავშირში გაწევრდა, დალია
ევროკომისიის წევრი გახდა. 2008 წელს "წლის ქალად" აღიარეს ლიტვაში, უკვე 2009 წელს კი პრეზიდენტად აირჩიეს. ის ნამდვილი პოლიგლოტია: ფლობს ლიტვურ, ინგლისურ, რუსულ, პოლონურ და ფრანგულ ენებს. არც სიმკაცრესა და ძალაუფლებაში სჭირდება ვინმეს დახმარება: კარატეს შავი ქამრის მფლობელია. და ის ერთადერთი ქალია ჩვენს რეიტინგში, რომელიც გათხოვილი არ ყოფილა.
ჟურნალი "რეიტინგი"
(გამოდის ორშაბათობით)
