ჯორჯ ბუშის ქალიშვილის ქორწილს 20 ადამიანი დაესწრო

აშშ-ს ყოფილი პრეზიდენტის ჯორჯ ბუში უმცროსის ქალიშვილი ბარბარა ბუში დაოჯახდა. მისი რჩეული სცენარისტი ქრეიგ კოინია.

საქორწინო ცერემონია კვირას, მაინში, ბუშების საზაფხულო რეზიდენციის ეზოში გაიმართა და მას წყვილის ოჯახის 20 წევრი ესწრებოდა. წვეულება რომანტიკულ და ოჯახურ გარემოში ჩატარდა, ბუშების სახლის ეზო ოკეანეს გადაჰყურებს და წვეულების სტუმრები ხელმოწერის ცერემონიის პარალელურად ულამაზესი ხედებითაც ტკბებოდნენ.

36 წლის პატარძალი მამამ მიაცილა ხელმოწერის ადგილამდე. წყვილმა ფიცი ოჯახის წევრების თვალწინ წაიკითხა. ცერემონიას ესწრებოდა 94 წლის ჯორჯ ბუში უფროსიც.

პატარძალს დიზაინერ ვერა ვონგის კაბა ეცვა.

წყვილი გასული წლის ნოემბერში "ბრმა პაემანზე" მეგობრებმა შეახვედრეს ერთმანეთს. მათი სიყვარული მალევე განვითარდა, თუმცა დაქორწინებამდე ბარბარა და ქრეიგი საიდუმლოდ ინახავდნენ ამბავს.

როგორც ბარბარა PEOPLE-თან ინტერვიუში ყვება, მათი ნიშნობაც ძალიან რომანტიკული იყო. ქრეიგმა ბარბარას ზაფხულში, ბუშების საზაფხულო რეზიდენციაში ყოფნის დროს ზუსტად იმ ადგილას სთხოვა ხელი, სადაც 75 წლის წინ ბარბარას ბებია და ბაბუა - ჯორჯ ბუში უფროსი და ბარბარა ბუში დაინიშნენ.