"ჩემთვის ახალი ცხოვრება დაიწყო" - ფინალისტების ემოციები "X ფაქტორის" დასრულების შემდეგ
"X ფაქტორის" მეოთხე სეზონი "რუსთავი 2"-ზე გრანდიოზულად დასრულდა. ხმების 57 პროცენტი ბათუმელმა აბიტურიენტმა სანდრო კურცხალიძემ მიიღო. გამარჯვება მისთვის იმდენად მოულოდნელი აღმოჩნდა, რომ ძირს დაჯდა და წარმატებას მხოლოდ მაშინ მიხვდა, როდესაც გულშემატკივრები შემოეხვივნენ.
პროექტის ფინალში გამარჯვებისთვის სანდრო კურცხალიძე, გრიგოლ ყიფშიძე და ჯგუფი "mix2ra" იბრძოდნენ. ყველას ეგონა პროექტს უნიჭიერესი 11 წლის გრიგოლ ყიფშიძე მოიგებდა, მაგრამ მისი მხარდამჭერების პროგნოზი არ გამართლდა.
გრიგოლ ყიფშიძე: უბედნიერესი ადამიანი ვარ, არ ვიყავი ჩემს გამარჯვებაში დარწმუნებული, წარმოდგენა არ მქონდა რა მოხდებოდა და მინდა გითხრათ, მართლა გულით გამეხარდა სანდროს გამარჯვება. "იქს ფაქტორი" ჩემთვის დიდი გამოცდილება იყო, რომელმაც ხალხის სიყვარული მომცა.
18 წლის სანდრო კურცხალიძე "X ფაქტორის" კასტინგზე მეგობარს გაყვა და პროექტში ბედი შემთხვევით მოსინჯა, ამან კი წარმატება მოუტანა.
- მართლა არ ველოდი გამარჯვებას, როცა ჩემი სახელი გამოაცხადეს, შოკში ჩავვარდი. კინაღამ გული წამივიდა სცენაზე, ვერ აღვწერ რა დამემართა. ჩემი ბედი ჩემმა მხარდამჭერებმა გადაწყვიტეს. მადლობის მეტი არაფერი მეთქმის. ახლა თავში არეული მაქვს ყველაფერი, საით წავიდე არ ვიცი. ჩემთვის ახალი ცხოვრება დაიწყო. ჯერ დავისვენებ, ამ ზაფხულს ძალებს აღვიდგენ და შემოდგომიდან დავიწყებ მუშაობას.
- ცნობილია, რომ ეროვნულ გამოცდებს აბარებ...
- მე სკოლა "X ფაქტორში" მონაწილეობის დროს დავამთავრე და გამოცდებისთვისაც ვემზადებოდი. ოჯახის გადაწყვეტილებით საზღვაო აკადემიაში ვაბარებ და აქედან პირდაპირ ბათუმში მივდივარ. დღეს 2 საათზე მაქვს გამოცდა და ვნახოთ რა მოხდება. მამა მყავს მეზღვაური და მეც მის გზას მივყვები. სამწუხაროდ, ის ახალი წასულია ზღვაში, ვერ დაესწრო ჩემს წარმატებას და არც იცის, რომ გავიმარჯვე პროექტში.
"X ფაქტორის" წლევანდელი სეზონი ჟანრობრივი თვალსაზრისით გამორჩეული იყო. უპრეცედენტო იყო ის ფაქტიც, რომ პროექტი ფინალში მუსიკალური ბენდი მოხვდა. ჯგუფი "mix2ra" პროექტი გამარჯვებისთვის 13 კვირა წარმატებით იბრძოდა, თუმცა საბოლოოდ არ გაუმართლათ.
თამარ ბოჭორიშვილი
სალომე ჭაჭუა უცხოეთში მიემგზავრება - რომელი ქვეყნის "ცეკვავენ ვარსკვლავებში" გამოჩნდება მოცეკვავე
"სადაც არ უნდა ყოფილიყო, ყოველთვის სახლში ბრუნდებოდა... თბილისში..." - რას წერს გენიალურ კომპოზიტორზე ხელოვნებათმცოდნე
