21
აპრილიდღის ზოგადი ასტროლოგიური პროგნოზი
...პატარა, ფერადი მანქანა, სახელად ADvan გარაჟიდან სულ ცოტა ხნის წინ გამოვიდა და აპირებს, ძალიან ბევრი იმოგზაუროს, ყველა დაიმგზავროს და ყველას დაუმეგობრდეს. ეს არის ხუთი გოგოსა და ერთი ბიჭის მიერ დაარსებული სარეკლამო კომპანია, რომელმაც უნიკალური კონცეფციის წყალობით უკვე მოახერხა საზოგადოების ყურადღების მიქცევა.
"ჩვენი ძირითადი საქმიანობა კომპანიებისთვის ფოტო-ვიდეო გადაღებაა, ვცდილობთ ჩვენი პროდუქტი განსაკუთრებული და სხვებისგან გამორჩეული იყოს. იდეებზე ბევრს ვმუშაობთ. დიდები არ ვართ, ჩვენც "ედვენის" მსგავსად, სულ ახლახან გამოვჩნდით ბაზარზე, თუმცა ამის მიუხედავად, თითოეულ ჩვენგანს საკმაოდ დიდი გამოცდილება აქვს იმისთვის, რომ ხარისხიანი პროდუქტი შექმნას. ჩვენი გუნდით ვამაყობთ," - ამბობს ერთ-ერთი დამფუძნებელი ქეთევან ჯაოშვილი.
ზოგადად, ქართული სარეკლამო ბაზარი მაღალი ფასებით გამოირჩევა, რაც დამწყებ ბიზნესებს საკუთარი თავის წარმოჩენის საშუალებას არ აძლევს. ADvan ამ სტერეოტიპის დანგრევას ცდილობს და კლიენტებს მოქნილ ფასს სთავაზობს.
"დღეს ცნობადობა ფინანსურ რესურსთან ასოცირდება. თუ ფინანსური შესაძლებლობა არ გაქვს, ნიშნავს, რომ ფართო საზოგადოება ვერასდროს გაგიცნობს. ჩვენი ფასები სტარტაპებისთვისაც ხელმისაწვდომია. თუმცა, რა თქმა უნდა, დაბალი ფასში დაბალ ხარისხს არ ვგულისხმობთ. თითოეული იდეის მოფიქრებასა და მის სისრულეში მოყვანაზე მთელი გუნდი მთელ ძალასა და ენერგიას დებს, გვინდა ჩვენი დახმარებით ყველა სტარტაპ კომპანია მომავალში მსხვილ ბიზნესად იქცეს," - განმარტავს ქეთევან ჯაოშვილი.
სტარტაპი ამჟამად სამიზნე აუდიტორიის ნდობის მოპოვებაზე მუშაობს. მათი მთავარი სირთულეც ამ ეტაპზე სწორედ ესაა.
ADvan თიბისი ბანკის პროგრამა სტარტაპერის" მონაწილეა. პროგრამის ფარგლებში სტარტაპებზე მომზადებული სტატიების ვიზუალური მხარე სწორედ მათ ეკუთვნით. გუნდში ფიქრობენ, რომ პროგრამა "სტარტაპერთან" თანამშრომლობა მათი კომპანიისთვის ერთ-ერთ ყველაზე დიდი წინ გადადგმულ ნაბიჯია.
"დარწმუნებულები ვართ, რომ ამ პროექტით ძალიან დიდ გამოცდილებას მივიღებთ და ბევრს ვისწავლით. ჩვენ არ ვთვლით, რომ ზრდა რაღაც ეტაპზე სრულდება. ვემხრობით აზრს, რომ განვითარება უსასრულო პროცესია, ამიტომ ყოველთვის მზად ვიყავით და ვართ ახალ-ახალი გამოწვევებისთვის.
სტარტაპი, რომლის შექმნის ერთ-ერთი მიზანი ასევე სტარტაპების დახმარებაა, ქვეყანაში მეტი კომპანიის შექმნას და მეტი უნიკალურის იდეის განხორციელების მომხრეა.
"ვისურვებდით, მეტ ადამიანს ჰქონდეს შანსი, მისი ბიზნესი წარმატებული გახადოს. გვინდა, ყველამ დაიჯეროს საკუთარი შესაძლებლობების. მეორე მხრივ კი, მნიშვნელოვანია, რომ მეტი მსხვილი ბიზნესი დაინტერესდეს, ჩაერთოს და დაეხმაროს სხვებს თავიანთი მიზნების განხორციელებაში. ჩვენი გუნდი დამწყებ სტარტაპებს ვურჩევთ, რომ არასდროს თქვან უარი თავიანთ იდეაზე, არასდროს ჩაიქნიონ ხელი მის განხორციელებაზე, არასდროს შეეშინდეთ იმედგაცრუების და ყოველთვის დაიჯერონ, რომ ამ სამყაროში ყველაფერი, აბსოლუტურად ყველაფერი შესაძლებელია. ჩვენი ლოზუნგიც სწორედ ეს არის: თუ შეგიძლია წარმოდგენა, მის განხორციელებასაც აუცილებლად შეძლებ!" - ამბობს ქეთევან ჯაოშვილი.
ამჟამად გუნდში 8 ადამიანია. სამომავლოდ სტარტაპი გაფართოებას გეგმავს. გუნდში აცხადებენ, რომ მათი ფურგონის კარი შემოქმედებითი ადამიანებისთვის ყოველთვის ღია იქნება.
ნანა მღებრიშვილი
AMBEBI.GE
#სტარტაპერი #გვეამაყები
ფოტოების ავტორი: ADvan/ედვენი
