"პატრიარქმა თქვა, რომ არც ერთი მართლმადიდებელი არ დაესწროს პაპის მესას" - ვინ და რატომ ეწინააღმდეგება საქართველოში რომის პაპის ვიზიტს

30 სექტემბერს საქართველოს რომის პაპი ეწვევა. ორდღიანი ვიზიტის ფარგლებში ფრანცისკე I პრეზიდენტ გიორგი მარგველაშვილსა და კათოლიკოს-პარტრიარქ ილია მეორეს შეხვდება. ასევე გამართავს შეხვედრებს ადგილობრივ რელიგიურ თემებთან და კათოლიკური საქველმოქმედო ორგანიზაციების თანამშრომლებთან.

პირველ ოქტომბერს რომის პაპი ლიტურგიას აღავლენს მიხეილ მესხის სახელობის სტადიონზე, შემდეგ კი სვეტიცხოვლის ტაძარს ეწვევა. პონტიფიკოსის ვიზიტმა სასულიერო პირების ნაწილში არაერთგვაროვანი რეაქცია გამოიწვია. ზოგნი ამაში ცოდვას, ერესსა და პაპიზმს ხედავენ, ხოლო ნაწილი საგანგაშოდ არ მიიჩნევს სასულიერო პირის სტუმრობას.

21 სექტემბერს, თბილისში, ვატიკანის საელჩოს წინ მორწმუნეთა ჯგუფმა რომის პაპის საქართველოში სტუმრობის წინააღმდეგ "ლოცვითი დგომის აქცია" მოაწყვეს. აქციის მონაწილეების თქმით, საქართველოს მართლმადიდებლებისთვის პაპის ვიზიტი საფრთხეს შეიცავს.

თუმცა, ცოტა ხნის წინ, საქართველოს საპატრიარქომ გაავრცელა განცხადება, რომელშიც "ყოვლად მიუღებლად მიიჩნევს ამ ოფიციალურ ვიზიტთან დაკავშირებით საქართველოს მართლმადიდებელი ეკლესიის ზოგიერთი სასულიერო პირის მიერ საჯარო სივრცეში დაფიქსირებულ მკვეთრად უარყოფით განცხადებებს". საპატრიარქო აცხადებს, რომ რომის პაპი საქართველოში მისი უწმინდესობის მოწვევით ჩამოდის და ყველას სიმშვიდისკენ მოუწოდებს.

ჩვენ ვცადეთ გაგვერკვია, რა არგუმენტები აქვთ პაპი ფრანცისკეს ვიზიტის მოწინააღმდეგეებსა და მომხრეებს:

დეკანოზი მამა დავით (ისაკაძე): "რომის პაპის ვიზიტს ეწინააღმდეგება მთელი მორწმუნე საზოგადოება, როგორც სასულიერო პირები, ასევე ერისკაცები. ვინც ოდნავ მაინც განათლებულია, მან იცის პაპიზმის არსი და მნიშვნელობა, თუ რაოდენ დიდი საფრთხის მომტანია ჩვენი ქვეყნისთვის და ჩვენი ეკლესიისთვის. მე ჩემი გადასახედიდან გცემთ პასუხს, ჩემს გვერდით არის ბევრი სასულიერო პირი და ბევრი ერისკაცი.

ეკლესიას აქვს ერთი სწავლება და ცალსახაა, რომ ყველა ერესი მიუღებელია ჩვენთვის და განსაკუთრებით ისეთი დიდი ერესი, როგორიც პაპიზმია. ამას ხვდება ყველა ოდნავ განათლებული ადამიანი. როდესაც საქართველოში იოანე პავლე მეორე იყო ჩამოსული, პატრიარქმა პირდაპირ თქვა, რომ მართლმადიდებლები არ დაესწრონ მესას და ყველა ჩამოსვლაზე იგივეს ხომ არ იტყვის?! პატრიარქმა თქვა, რომ არც ერთი მართლმადიდებელი არ დაესწროს პაპის მესას. გარდა მესის ჩატარებისა, პაპი აპირებს სვეტიცხოველში მისვლას, რაც საეკლესიო კანონმდებლობის საფუძველზე დაუშვებელია. სჯულის კანონი კრძალავს მწვალებლის შესვლას მართლმადიდებლურ ეკლესიაში.

- რომის პაპი ჩამოდის ათწლეულში ერთხელ....

- დიახ და როცა ჩამოვიდა, მაშინ გააკეთა კიდეც განცხადება და ახლაც ვფიქრობ, რომ გაკეთდება განცხადება. (იხ. საპატრიარქოს განცხადება)

- ეს თქვა დიახ, 20 წლის წინ, როცა იოანე-პავლე მეორე იყო ჩამოსული, შეიძლება ბევრს არც ახსოვს და ბევრმა არც იცის...

- რა მნიშვნელობა აქვს თარიღს, მთავარია, რომ თქვა და ახლაც, მე რამდენადაც ვიცი, განცხადება გაკეთდება....

- რამდენადაც ცნობილია, რომის პაპი ისე არსად ჩადის, თუ უმაღლესი სასულიერო იერარქის მიწვევა არ აქვს, ანუ ის მოიწვია საქართველოს კათალიკოს პატრიარქმაც...

- პაპი მოიწვია პრეზიდენტმა, პატრიარქთან შეუთანხმებლად და მერე უკვე უხერხულ მდგომარეობაში ჩააყენეს საპატრიარქო და იძულებული გახადეს, რომ მათაც გაეგზავნათ მოწვევა.

- სვეტიცხოველში უამრავი ტურისტი შედის, ყველა მართლმადიდებელი ხომ არ არის?!

- ტურისტი შედის როგორც ღირსშესანიშნაობის მოსანახულებლად, მაგრამ ისეთი დონის ერეს იერარქი, როგორიც რომის პაპია, იქ არ მიდის მოსანახულებლად. პროგრამაში პირდაპირ წერია, რომ უნდა აანთოს სანთელი და მიმართოს საზოგადეობას, ანუ კიდევაც ილოცებს და კიდევაც იქადაგებს, რაც კატეგორიულად დაუშვებელია.

- საქართველოში საკმაოდ ბევრი კათოლიკეა და რატომ არ აქვთ უფლება, რომ მოუსმინონ საკუთარ სულიერ ლიდერს?

- ნახონ თავიანთ ეკლესიაში, "ლოკომოტივის" სტადიონზე მესის ჩატარება არის პროზელიტიზმი (მისწრაფება თავის სარწმუნოებაზე სხვების მოქცევისაკენ ლ.გ.) და სხვა არაფერი, რომელსაც რომ ვკითხოთ, ემიჯნებიან კათოლიკეები.

- ქვეყანაში ბევრი კათოლიკეა და "ლოკომოტივზეც" ალბათ იმიტომ ტარდება, რომ ეკლესიაში ვერ დაეტევიან

- არსებობს მეგაფონები და იმით მოისმინონ

- მეგაფონითაც პროზელიტიზმი გამოვა, რადგან კათოლიკური ეკლესიის გარშემო ბევრი მართლმადიდებელი ცხოვრობს...

- ვგულისხმობ ისეთ მეგაფონს, რომელიც ეკლესიის შემოგარენში მოასმენინებს და არა მძლავრს, როგორიც სტადიონებზეა.

- სასულიერო პირთა ნაწილი პაპის ვიზიტში არაფერს ხედავს საგნგაშოს

- ეს არიან სასულიერო პირთა ის ნაწილი, რომელიც ლიბერალურად აზროვნებს და მათთვის ეკლესიის საზღვრები დიდი ხანია მოშლილია. ჩვენ მათ ცხვრის ტყავში გახვეულ მგლებს ვუწოდებთ.

დეკანოზი მამა პეტრე (კვარაცხელია): "მე ვიზიარებ მხოლოდ საპატრიარქოს პოზიციას და მხოლოდ მას ვეყრდნობი. პირადად ჩემთვის არცერთ შემთხვევაში არაა პაპის ვიზიტი საფრთხის შემცველი, ვინაიდან მის ვიზიტზე არაა დამოკიდებული ჩემი რწმენა შეირყევა, თუ არა. მე არასოდეს არ მიქმნის საფრთხეს ვინმეს ჩამოსვლა ან არჩამოსვლა. ვფიქრობ, რომ ასეთი განგაში არაა სწორი და ამით შეუძლებელია ვინმემ რწმენა დაიცვას. თუ ჩვენ გვინდა სარწმუნოება დავიცვათ, ეს უპირველესად საკუთარი ცხოვრების წესით უნდა გავაკეთოთ. მუშტი-კრივით ან რაიმე ფორმის შეტაკებით, არა მგონია მართლმადიდებლობა დავიცვათ. თუ რომელიმე პიროვნების რელიგია ჩემზე მოახდენს გავლენას, ეს არავითარ შემთხვევაში არ ნიშნავს იმას, რომ ეს რელიგია ჭეშმარიტია. ეს იქნება ჩემი ბრალი, რადგან მე ვყოფილვარ სუსტი.

გასათვალისწინებელია შემდეგი გარემოებაც, საქართველო არის მართლმადიდებელი სახელმწიფო, თუმცა ჩვენ გვიწევს თანაცხოვრება სხვადასხვა რელიგიის ადამიანებთან და ჩვენ მათ ანგარიში აუცილებლად უნდა გავუწიოთ, მიუხედავად იმისა, ეს მოსწონს თუ არა ვინმეს. კათოლიკეები, საუკუნეების მანძილზე ცხოვრობენ ჩვენთან, მათ ძალიან ბევრი ეროვნული საქმე აქვთ გაკეთებული ჩვენი ქვეყნისთვის და ამ ყველაფრის არდანახვა არის ძალიან დიდი დანაშაული და რატომ უნდა შევუშალოთ ამ ადამიანებს ხელი, შეხვდნენ საკუთარ სულიერ წინამძღვარს?! საზოგადოებამ არ უნდა შეუქმნას პრობლემა, რადგან ისინი საკუთარი რელიგიის მამამთავარს ხვდებიან და ჩვენ არ გვაქვს უფლება, ამაში ხელი შევუშალოთ.

- მამა პეტრე, რამდენად სწორია რომის პაპის ვიზიტი სვეტიცხოველში? ისინი, ვინც პაპის ვიზიტს ეწინააღდეგებიან, მიიჩნევენ რომ ეს არის ერესი.

- ისეთ დიდ ტაძრებში, როგორიცაა სამება, სიონი, სვეტიცხოველი და სხვა, მომლოცველების უმეტესობა არის არამართლმადიდებელი, ისინი სვეტიცხოველს ათვალიერებენ როგორც ისტორიულ ძეგლს და ეს არავითარ პრობლემას არ ქმნის. რაც შეეხება რომის პაპის სვეტიცხოველში ვიზიტს, ამ დროს არც წირვა ტარდება, არც ერთობლივი ლოცვა აღევლინება და არც საკურთხეველში შედის, უბრალოდ, ის მოინახულებს ისტორიულ ძეგლს. გასათვალისწინებელია ისიც, რომ პაპი მხოლოდ თავისი ნებით და მარტო არ ჩავა სვეტიცხოველში, მას აუცილებლად აქვს გავლილი კონსულტაციები საპატრიარქოსთან და უწმინდესთან, სწორედ იმ ხალხთან, ვინც ყველა ჩვენთაგანზე უკეთ იცის, რა როდის უნდა გააკეთონ. ამიტომ ასეთი აჟიტირებული მიდგომა და საუბარი, მგონი რომ არასწორია და ამით ე.წ. მართლმადიდებლები უფრო მეტად ვავლენთ, რომ მართლმადიდებლობა ჩვენთვის ძალიან გაუგებარი რელიგია ყოფილა.

შეგახსენებთ, რომ საპატრიარქომ ცოტა ხნის წინ გაავრცელა განცხადება, რომელშიც "მიუღებლად მიიჩნევს ამ ოფიციალურ ვიზიტთან დაკავშირებით საქართველოს მართლმადიდებელი ეკლესიის ზოგიერთი სასულიერო პირის მიერ საჯარო სივრცეში დაფიქსირებულ მკვეთრად უარყოფით განცხადებებს". საპატრიარქო აცხადებს, რომ რომის პაპი საქართველოში მისი უწმინდესობის მოწვევით ჩამოდის და ყველას სიმშვიდისკენ მოუწოდებს.

"როგორც ცნობილია, საქართველოს პრეზიდენტის და სრულიად საქართველოს კათოლიკოს-პატრიარქის მოწვევით, ა.წ. 30 სექტემბერს ჩვენს ქვეყანას ესტუმრება მისი უწმინდესობა, რომის პაპი ფრანცისკე I, თანმხლებ პირებთან ერთად. საქართველოს საპატრიარქო პატივისცემით მიესალმება სტუმარს და იმედოვნებს, რომ მისი ჩამოსვლა ხელს შეუწყობს მრავალმხრივი ურთიერთობების გაღრმავებას და რეგიონში მშვიდობის განმტკიცებას. ამასთან, ვაცხადებთ, რომ ყოვლად მიუღებლად მიგვაჩნია ამ ოფიციალურ ვიზიტთან დაკავშირებთ საქართველოს მართლმადიდებელი ეკლესიის ზოგიერთი სასულიერო პირის მიერ საჯარო სივრცეში დაფიქსირებული მკვეთრად უარყოფითი განცხადებები და მათაც და საერთოდ ყველას მოვუწოდებთ სიმშვიდისაკენ. შევნიშნავთ იმასაც, რომ ჩვენს და რომის კათოლიკურ ეკლესიას შორის შუა საუკუნეებიდან შეწყვეტილია ლოცვით-ევქარისტიული კავშირი და ვიდრე არსებობს დოგმატური სხვაობები, საეკლესიო სამართლის მიხედვით, მართლმადიდებელი მორწმუნეები არ იღებენ მონაწილეობას მათ მსახურებაში. ბუნებრივია, პაპი მესას კათოლიკებისათვის ატარებს და ეს არ შეიძლება ჩაითვალოს პროზელიტიზმის გამოვლინებად, როგორც ამას ზოგიერთები მიიჩნევენ", - ნათქვამია საპატრიარქოს განცხადებაში.

ლადო გოგოლაძე

AMBEBI.GE