ზუგდიდის მერია სასტუმროს ასაშენებლად მიწას ყიდის
ქალაქ ზუგდიდის მერია ზუგდიდში, მეორე საჯარო სკოლის წინ 1 201 კვადრატული მიწის ნაკვეთს აუქციონის წესით გაყიდის. მერიას საკრებულომ დღეს მისცა თანხმობა, რომ ფართის გასაყიდ ფასად განისაზღვროს 1 500 000 ლარი. ეკონომიკის, ურბანული განვითარებისა და ქონების მართვის კომისიის თავმჯდომარე თენგიზ ქოჩუას განცხადებით, პირი, რომელიც აუქციონის წესით შეიძენს აღნიშნულ ქონებას, ვალდებული იქნება ააშენოს საერთაშორისო ბრენდის სახელის მქონე არანაკლებ 120 ნომრიანი სასტუმრო და განახორციელოს მინიმუმ 20 მილიონი აშშ დოლარის ინვესტიცია. მისივე ინფორმაციით, სასტუმრო მისი არქიტექტურით აუცილებლად უნდა შეესაბამებოდეს დადიანების ისტორიულ მუზეუმს, პროექტი კი შეთანხმებული იყოს საქართველოს კულტურისა და ძეგლთა დაცვის სამინისტროსთან.
"უნდა ჰქონდეს არანაკლებ 600 კვმ ფართის დარბაზი, ღია და დახურული ტიპის, არანაკლებ 10 კაცზე გათვლილი 15 ერთეული შეხვედრების ოთახი. ასევე აუცილებელია არანაკლებ 100 ავტომობილზე გათვლილი ავტოსადგომის მოწყობა", - განაცხადა თენგიზ ქოჩუამ.
ამ პირობების შესრულება დაინტერესებულ მხარეს მოუწევს ორი წლის ვადაში. მასვე დაევალება დაასაქმოს 100-მდე ადამიანი.
იმერეთის გუბერნატორის ხელფასი გაორმაგდა
ორი ობლისა და ორი ბებიას შემზარავი გასაჭირი გურიაში
