16
აპრილიდღის ზოგადი ასტროლოგიური პროგნოზი
ბათუმის ცენტრში, "ჭაჭის თაუერის" მიმდებარე ტერიტორიაზე გარემოვაჭრეების 21 უსახური ჯიხური ჩაიდგა. ჯიხურები, სადაც ძირითადად, სამკაულებსა და სუვენირებს ყიდიან, გარემოვაჭრეებმა თვითნებურად დაამზადეს და ბათუმის ცენტრში სხვადასხვა ადგილზე განათავსეს. ბათუმის მერიამ საბაგიროს ტერიტორიასა და გოგებაშვილის ქუჩაზე განთავსებული ჯიხურები რამდენიმე დღის წინ, "ჭაჭის თაუერის" გვერდით დადგა.
მერიის ამ გადაწყვეტილებაზე ადგილობრივები უკმაყოფილებას გამოთქვამენ და აღნიშნავენ, რომ სავაჭრო ობიექტები უსახურია და ქალაქის იერსახეს ამახინჯებს. ბათუმელები აცხადებენ, რომ ბათუმის მერიამ ჯიხურები ან უნდა აიღოს, ან იერსახე შეუცვალოს.
ჯიხურების გადატანასთან დაკავშირებით უკმაყოფილება გამოთქვეს ასევე, სავაჭრო ობიექტების მეპატრონეებმაც. მათ დღეს ქუთაისში, პარლამენტის შენობასთან აქცია გაიმართეს და პარლამენტის თავმჯდომარესთან შეხვედრა მოითხოვეს. მოვაჭრეების თქმით, ბათუმის მერიამ ქალაქში საბაგიროს ტერიტორიაზე ვაჭრობა აუკრძალა. მოვაჭრეებმა უკმაყოფილება გამოხატეს შეთავაზებულ ალტერნატიულ ფართზე და საბაგიროს ტერიტორიაზე დაბრუნება მოითხოვეს.
აღნიშნულ საკითხთან დაკავშირებით განმარტებები გააკეთა ბათუმის მერიამ. როგორც ბათუმის მერიის ადმინისტრაციული ზედამხედველობის განყოფილების უფროსმა თენგიზ მესხიძემ განაცხადა, ჯიხურები "ჭაჭის თაუერის" მიმდებარედ გარემოვაჭრეებთან შეთანხმების საფუძველზე გადაიტანეს. მისივე განმარტებით, გოგებაშვილის ქუჩაზე ტროტუარებზე განლაგებული ჯიხურები ქალაქის იერსახეს ამახინჯებდა, ხოლო ტურისტებს გადაადგილებაში უშლიდა ხელს. თენგიზ მესხიძის განმარტებით, წელს სტუდენტები აღნიშნულ ჯიხურებს სხვადასხვა ფერად შეღებავენ, ხოლო მომავალ წელს უსახურ ჯიხურებს მერია ჰოლანდიური ტიპის ჯიხურებით ჩაანაცვლებს:
"გოგებაშვილის ქუჩაზე ჯიხურები განთავსებული იყო თავიდანვე უნებართვოდ. ბათუმის მერიის მიერ გამოყოფილ ადგილზე მოხდა ამ ჯიხურების გადატანა გარემოვაჭრეებთან შეთანხმების საფუძველზე. ისინი არ წავიდნენ წინააღმდეგნი გადატანის გამო, რადგან ეს ადგილი 200 მეტრითაა დაშორებული იმ ტერიტორიასთან, სადაც ადრე ვაჭრობდნენ. გოგებაშვილის ქუჩაზე ტროტურაზე განლაგებული ჯიხურები იყო მიუღებელი, რადგან იყო უსახური და ასევე დამსვენებლებს გადაადგილებაში უშლიდა ხელს. გარემოვაჭრეები აპროტესტებენ მხოლოდ იმას, რომ ერთად რომ ვიქნებით ყველანი, ვერ ვივაჭრებთო. ვფიქრობ, ერთად რომ იქნებიან, კონკურენციაც იქნება და მეტი ვაჭრობაც. სტუდენტებთან დასრულდა მოლაპარაკება და მერიის საღებავებით შეიღებება ეს ჯიხურები. მომდევნო წელს კი ჩანაცვლდება ახალი ჰოლანდიური ტიპის ჯიხურებით ბათუმის იერსახესთან შესაბამისობაში", - აღნიშნა თენგიზ მესხიძემ.
ნინო ხოზრევანიძე
AMBEBI.GE
