ნოემბრის მნიშვნელოვანი ასტროლოგიური მოვლენები: რას გვიმზადებენ პლანეტები

ოქტომბერში მზისა და მთვარის დაბნელებები და დაბნელებების დერეფანი გავიარეთ. თუმცა, არც ნოემბერი გველოდება მშვიდი. არის მომენტები, რომლებიც უნდა გავითვალისწინოთ. თუნდაც ის, რომ პირადი პლანეტები აქტიურად გადაადგილდებიან ერთი ნიშნიდან მეორეში და აქტიურად ქმნიან ერთმანეთთან ასპექტებს. ან “ვია კომბუსტას“ პერიოდი... თუმცა, მივყვეთ თანმიმდევრულად. მზე ახლა მორიელშია; გილოცავთ, მორიელებო, თქვენი დრო დადგა, გააქტიურდით, რათა გაიუმჯობესოთ ცხოვრების სხვადასხვა სფერო. მორიელი არის ტრანსფორმაციის, ევოლუციის, კრიზისის, ექსტრემალური სიტუაციების, ტრანსმუტაციის ნიშანი. განაგებს საქმიანი და სასიყვარულო პარტნიორების ფულებს, ბიზნესს, ინვესტიციებს, საბანკო ანგარიშებს, კრედიტებსა და გადასახადებს.

4 ნოემბერს თევზებში მყოფი სატურნი დერექტულ ფაზაში გადადის 2024 წლის 29 ივნისამდე. გაძლიერდება კონტროლი, თვითდისციპლინა, დაგეგმარება, მთავარია საქმეზე ორიენტირება. ეს ყველაფერი საშუალებას მოგცემთ გაიუმჯობესოთ საქმეებიც (კარიერა, ბიზნესი) და ურთიერთობებიც. მუშაობისას გირჩევთ დაიცვათ დედლაინი. სატურნი ნოემბრის განმავლობაში სამ მნიშვნელოვან ასპექტს ქმნის მორიელში მყოფ პლანეტებთან: მერკურთან 10 ნოემბერს, მზესთან 23-ში და მარსთან 25-ში. სატურნი ეს არის შეზღუდვა, შიშები, კანონი, კონტროლი. ამ დღეებში და პლუს/მინუს 3 დღე განსაკუთრებით ვიგრძნობთ სატურნის გავლენას. 10-ში შეიძლება შეგეზღუდოთ კომუნიკაცია გარშემო მყოფებთან. იყავით ფრთხილი საბუთებთან, დოკუმენტებთან მუშაობისას. გაჭიანურდება საჭირო ინფორმაციის, დოკუმენტის მიღებას. იყავით ფრთხილი საქმიანი შეხვედრებისას. შეიძლება სირთულეები წარმოიშვას მოლაპარაკებებისას, გამოწერილი ნივთების მიღებისას. 23 ნოემბერს შეიძლება შეგეზღუდოთ თავისუფლება ან იგრძნოთ, რომ ვიღაც გაკონტროლებთ, გიწესებთ შეზღუდვებს. შეიძლება გართულდეს ურთიერთობა ასაკით ან თანამდებობით უფროს ადამიანთან. სასურველია, დროულად დაასრულოთ საქმეები. იყოთ კორექტული და ანგარიშიანი. 25-ში როცა, სატურნს დაძაბული ასპექტი ექნება მარსთან, შეიძლება იგრძნოთ გადაღლილობა, ძალისა და ენერგიის ნაკლებობა. ან რაღაც მიზეზის გამო შეგეზღუდოთ ფიზიკური აქტიურობა, ვარჯიში. მოერიდეთ გადატვირთვას, ნუ აიღებთ საკუთარ თავზე ზედმეტ ვალდებულებას.

ვენერას ჰარმონიული პერიოდი გველოდება 8 ნოემბრიდან 4 დეკემბრის ჩათვლით. სასწორში მყოფი ვენერა ჰარმონიული და ესთეტიკურია. მომართულია ყველგან და ყველაფერში სილამაზის დანახვაზე. ამ პერიოდში დარეგულირდება ურთიერთობები საყვარელ ადამიანებთან, კლიენტებთან. შეძლებთ მოლაპარაკებების გამართვას, საკუთარი პრეტენზიების დიპლომატიურად გაჟღერებას. იყავით მომართული პარტნიორის გაბედნიებაზე; მოუწყვეთ რომანტიკული პაემნები და საღამოები; გაანებივრეთ საჩუქრებითა და სიურპრიზებით. მაგრამ 4 ნოემბერს ვენერა უპირისპირდება ბუნდოვანებისა და ილუზიების მქონე ნეპტუნს და იყავით ფრთხილი, რომ რომანტიკულ განწყობაზე მყოფმა დაუფიქრებელი და დამაზიანებელი ნაბიჯი არ გადადგათ. აკონტროლეთ ემოციურობა, მოერიდეთ მელანქოლიურობას, ფანტაზიებში გადავარდნას. შეიძლება იმედი გაგიცრუოთ საყვარელმა ადამიანმა, ვერ მიიღოთ სასურველი თანხა. სამაგიეროდ, კარგი პერიოდია შემოქმედებითი იდეების განხორციელებისთვის. პლუს/მინუს 3 დღე არ ენდოთ ახალგაცნობილებს, მოერიდეთ უსიამოვნებას და პრეტენზიულობას საყვარელი ადამიანისადმი. არ შეიძინოთ ლამაზი, ძვირად ღირებული ნივთები.

მერკური მშვილდოსანში იქნება 10 ნოემბრიდან 1 დეკემბრამდე. ადამიანებში მოიმატებს ოპტიმისტური განწყობა, ცნობისმოყვარეობა, ზოგიერთი გადაწყვეტს, სწავლის გაგრძელებას, ცოდნის გაღრმავებას, გახშირდება მიმოსვლა ახლო და შორ მანძილზე. ადამიანები მეტად ფილოსოფიურად დაიწყებენ მსჯელობას ყველაფერზე. კარგი დროა დიპლომის დასაწერად ან დასაცავად. მოამზადეთ დოკუმენტები, თუ აპირებთ უცხოეთში გამგზავრებას ან იურიდიული საკითხები. 4 ნოემბერს მერკური დაუპირისპირდება კუროში მყოფ მოულოდნელობების პლანეტა ურანს. ამიტომ იყავით ფრთხილი და დაკვირვებული და განსაკუთრებით პარტნიორებთან და ფულთან მიმართებაში. არ გირჩევთ, ძვირად ღირებული ნივთების შეძენას, განსაკუთრებით ელექტრიონივთებს, ნუ გააფორმებთ ხელშეკრულებებს. ზოგადად, ასეთი ასპექტის დროს ადამიანთან მოლაპარაკებაც კი სათუა. პარტნიორებს არ ესმით ერთმანეთის და ყველა საკუთარი უპირატესობის დამტკიცებას ცდილობს. მერკურთან დაკავშირებით საინტერესო დღეებია 7 და 27 ნოემბერი. ამ დღეებში კარგია ხატვა, სათავგადასვალო წიგნების წაკითხვა, მაგრამ არ გირჩევთ ხელშეკრულებების გაფორმებას, ნუ ენდობით ახალგაცნობილებს. იზრდება ბუნდოვანება და ადამიანების მოტყუების, ილუზიებში გადავარდნის ალბათობა. არსად არაფერი დაკარგოთ ან დაგრჩეთ. თუ აუცილებელი არაა, არ გირჩევთ ინტელექტუალურ საქმიანობაში ჩართვას.

ახალმთვარეობა გველოდება მორიელში 13 ნოემბერს 13:28-ზე მორიელის 21-ე გრადუსში. ამ დღეს მზეც და მთვარეც მორელის ნიშანშია და მათ გვერდითაა მარსი - აგრესიისა და ომის ღმერთი. ემოციური და ტრანსფორმაციული დღეა. შეიძლება გადაწყვიტოთ საკუთარი თავის განახლება, ბრძოლა სასურველის მისაღწევად. მანდვეა მერკურიც. გაფრთხილდით, რომ არ აჰყვეთ პროვოკაციებს. ცუდად ნათქვამ სიტყვას არ მოჰყვეს ხელჩართული ბრძოლა. თავადაც ფრთხილად იყავით სიტყვებსა და გამონათქვამებში. აგრეთვე, გაფრთხილდით მჭრელ და აალებად ნივთებთან. ამასთან, ახალმთვარეობის დღეს მარსი ურანს უპირისპირდება და გამორიცხული არაა, მოხდეს ტექნიკური ავარიები, აფეთქებები, მოუფრთხილდით ელექტრონივთებს. ახალმთვარეობის დღეებში პლუს/მინუს 3 დღე არ დანიშნოთ საქმიანი შეხვედრები, რადგან ასეთი ასპექტის დროს მოლაპარაკება ფაქტიურად შეუძლებელია. ადამიანები ავლენენ აგრესიას და ემოციურობას. უფრო მეტიც, თუ შეთანხმებას მიაღწევთ, მომავალში, ის აუცილებლად გადაიხედება და შეიცვლება. იყავით ჰარმონიული საკუთარ თავთან. არ გირჩევთ არსებული კავშირების გაწყვეტას, კონფლიქტების წარმოქმნას, ნუ დაძაბავთ ურთიერთობას იმ კოლექტივში, რომელის წევრიც ხართ, არ გირჩევთ უსიამოვნებას მეგობრებთან. ამასთან, გასათვალისწინებელია ისიც, რომ ახალმთვარეობის მოვლენებზე გავლენა რამდენიმე დღის განმავლობა გაჰყვება და ეცადეთ, იყოთ ფრთხილი. ამავე დღეს (პლუს/მინუს 3 დღე) მზეს ურანი უპირისპირდება. მოუფრთხილდით ჯანმრთელობას; განსაკუთრებით გულ-სისხლძარღვოვან სისტემას. მოიმატებს ფეთქებადობა, მოხდება მკვეთრი ცვლილებები, გაიზრდება აგრესიულობა, ნერვიულობა, რევოლუციურობა, აფეთქებები. მოგინდებათ ყველაფერი მოძველებულის წინააღმდეგ გალაშქრება, მაგრამ შეიძლება ახალიც ვერაფერი შექმნათ. ამიტომ, ფრთხილად გაატარეთ ეს პერიოდი; ცვლილებები და საბოლოო გადაწყვეტილებები რთული დღეების გასვლის შემდეგ მიიღეთ.

13-შივე სელენა (თეთრი მთვარე) კუროში გადავა, სადაც დარჩება 2024 წლის 13 ივნისამდე. სელენა კუროში ყოფნისას გაააქტიურებს იმ თვისებებს, როგორიცაა მოთმინების უნარი, მიზანდასახულობა, საკუთარი მიზნისთვის მოგვიწევს ნელა, დინჯად, მაგრამ დაკვირვებულად სვლა. უნდა ვიყოთ მომართული მშენებლობაზე და არა დანგრევაზე. რაღაც უნდა შევქმნათ ამ მატერიალურ სამყაროში. მოხდება ღირებულებების გადაფასება. მიხვდებით, რისთვის და რა მიმართულებით უნდა განვითარდეთ, სად უნდა დააბანდოთ ფული. გაუმართლებს მას, ვინც შრომობს და აფასებს როგორც საკუთარ, ისე სხვისი შრომის ნაყოფს. საუკეთესო პერიოდია სამიწათმოქმედო სექტორის განვითარებისთვის. პატარა მიწის ნაკვეთის დამუშავებაც კი მოხდება. განვითარდება კვების მრეწველობაც. მოგინდებათ გემრიელი კერძების მომზადება. შეიძლება მომრავლდეს კვების ობიექტები ან თავად გადაწყვიტოთ ტრადიციული სამზარეულოს გახსნა. ზოგადად, სარესტორნო ბიზნესი განვითარება და წარმატება ელის. ადამიანებს მეტად მოუნდებათ ბუნების დაცვა. მზის, წყლისა და ქარის ენერგიების გამოყენება უფრო აქტუალური გახდება. უფრო მომრავლდება დენზე მომუშავე მანქანების რაოდენობა, რათა ეკოლოგია გაუმჯობესდეს.

“დამწვარი გზა“ ან „ვია კომბუსტას“ პერიოდი გველოდება 16-22 ნოემბრის შუალედში. ამ პერიოდშივეა გველმჭერის დრო, რომელსაც შეცდომით ზოდიაქოს მეცამეტე ნიშანს ეძახიან და სინამდვილეში ზოდიაქოს ზედა ნიშანია (უმაღლეს ასტროლოგიურ ნიშნებზე სტატია დევს საიტზე და შეგიძლიათ გაეცნოთ). რითაა ეს პერიოდი გამორჩეული: როგორც უკვე აღვნიშნე, მორიელი ტრანსფორმაციული ნიშანია და სანამ გადავა მშვილდოსანში ერთგვარი განმწმენდი გზა უნდა გაიაროს. გველმჭერის პერიოდი არის მორიელის ბოლო და მშვილდოსნის პირველი 7 გრადუსი. ეს არის დრო, რომ მოვახდინოთ შინაგანი ცვლილებები, გავიწმინდოთ და გავთავისუფლდეთ იმ ყველაფრისგან, რაც გვაფერხებს, გვიქმნის ილუზიებს. იყავით ფრთხილი და დაკვირვებული. მოერიდეთ ამბიციურობასა და ამპარტავნებას.

მზე მარსის შეერთება მოხდება 18 ნოემბერს და ამავე დღეს დაიწყება მზე-მარსის ორწლიანი ციკლი, რომელიც გასტანს 2026 წლის 9 იანვრამდე. 18-ში უდიდესი ენერგია მოდის კოსმოსიდან და ეცადეთ, მიმართოთ იგი დადებითი საქმეებისადმი. ფრთხილად ემოციებთან. არაა გამორიცხული, აფეთქებები და ძალების გამოვლენა. ზოგიერთს შეიძლება მოუნდეს საკუთარი თავის, ძალის გამოვლინება. ფრთხილად ფეთქებად, აალებად და მჭრელ საგნებთან შეხებისას. იყავით ფრთხილი და გააზრებული, მოერიდეთ ძალის გადამეტებას საჭესთან. 24 ნოემბერს კი მარსი მშვილდოსანს ესტუმრება, სადაც დარჩება 2024 წლის 4 იანვრამდე. მარსი იუპიტერის ნიშანს სტუმრობს, იუპიტერი არის გაფართოება, მარსი - ომი და აგრესია და არაა გამორიცხული, ზოგიერთმა აგრესიული ქმედებით მოინდომოს ტერიტორიების, ძალაუფლების გაფართოება. არაა გამორიცხული უსიამოვნებები და ბრძოლა გავლენებისთვის, უცხოელ პარტნიორებთან, საერთაშორისო პოლიტიკასთან.

მზე მშვილდოსანში გადავა 22 ნოემბერს (22 დეკემბრამდე) და დარჩება ერთი თვის განმავლობაში. ახლა მარსი მორიელშია, თავის ნიშანში (გადავიდა 12 ოქტომბერს). მორიელში მარსი სრულად ავლენს თავის თავს. შეუძლია თავად შექმნას კრიზისული სიტუაციები და თავადვე გამოასწოროს. მორიელისეული მარსი მებრძოლი და მზაკვრულია, მაგრამ თქვენ გირჩევთ, ნაკლებად გამოავლინოთ ასეთი თვისებები. ახლა უმჯობესია, რთული საკითხების მოგვარება. ბევრი სამუშაოს შესრულება. არ აჰყვეთ პროვოკაციებს, ნუ მისცემთ ადამიანებს უფლებას თქვენი ძალა თავისი ბოროტო საქმეებისთვის გამოიყენონ. ამ პერიოდში ვარჯიშშიც ზომიერება გმართებთ. მზის მშვილდოსანში გადასვლის შემდეგ მოიმატებს სულიერი განვითარების დონე, ადამიანებს მოუნდებათ ახლის შესწავლა, ცნობიერების გაფართოება. შეიძლება გაემგზავროთ უცხოეთში სამოგზაუროდ ან სასწავლებლად გამგზავრება.

დაბოლოს, სავსემთვარეობას ველოდებით 27 ნოემბერს ტყუპის მეხუთე გრადუსში, 13:17-ზე. დაძაბული დღეა, ემოციები პიკზეა. გარდა იმისა, რომ მზე და მთვარე ერთმანეთის ოპოზიციურ ნიშნებშია, აქტიურია მზე-მარსის ასპექტიც, აგრეთვე, რთული კონფიგურაციაა სატურთან და ლილიტთან. რამაც შეიძლება მოგვიტანოს დაძაბულობა და აგრესიულობა, ბრძოლა ძალაუფლებისა და ლიდერობისთვის. შეიძლება დაპირისპირება მოხდეს მორალსა და მსოფლმხედველობაზე აზრთა სხვადასხვაობის გამო. გირჩევთ, სანამ რამეს იტყვით, შვიდჯერ დაფიქრდეთ და ემოციების საკონტროლოდ ჩაიტაროთ სუნთქვითი ვარჯიშები. ურთიერთობაში მეტად გამოავლინეთ დიპლომატიურობა. მოერიდეთ თვითმოტყუებას და სხვების გაცურებას. არ გადავარდეთ ილუზიებში. აკონტროლეთ ხარჯი. სიფრთხილე გმართებთ სავსემთვარეობის დღეებში პლუს/მინუს 3 დღე. არ გირჩევთ ხელშეკრულებების გაფორმებას, საქმიანი შეხვედრების დანიშვნას. გადაამოწმეთ ყველა მიღებული ინფორმაცია და ისიც, რასაც გასცემთ.

ბედნიერ ნოემბერს გისურვებთ!