მნიშვნელოვანი ინფორმაცია
27
მარტიდღის ზოგადი ასტროლოგიური პროგნოზი
ხუთშაბათი, მთვარის ოცდამერვე დღე დაიწყება 06:51-ზე, მთვარე თევზებშია
ამ დღეს დაწყებული საქმეები წარმატებულად სრულდება. კარგი დღეა ფინანსური საკითხის მოსაგვარებლად; საყიდლებისთვის. შემოქმედებითი საქმიანობა წარმატებას მოგიტანთ. მოერიდეთ ურთიერთობის გარჩევას გარშემო მყოფებთან. კარგი დღეა სამსახურის, საქმიანობის შესაცვლელად. სასიამოვნო ემოციებს შეგძენთ ხანმოკლე მგზავრობა, ხანგრძლივი მოგზაურობა სხვა დღისთვის გადადეთ. კარგი დღეა ფიზიკური ვარჯიშებისთვის, საოჯახო საქმეების შესასრულებლად. მოერიდეთ ჭარბი საკვების მიღებას. აგრეთვე, არასასურველია სმა და მოწევა. მოერიდეთ ხის მოჭრას, ყვავილების მოწყვეტას. ყურადღება მიაქციეთ არტერიულ წნევას. გაუფრთხილდით თავს, არ გადაღალოთ ტვინი. არ გირჩევთ ოპერაციის ჩატარებას ღვიძლზე, ფეხებზე. არ გადაღალოთ, ჩაიცვით მოსახერხებელი ფეხსაცმელი. კარგია ტერფების მასაჟი.
მნიშვნელოვანი ინფორმაცია
მკითხველის რჩევით
კვირის კითხვადი სტატიები
თვის კითხვადი სტატიები
ასევე დაგაინტერესებთ
"სერიალებს ვახმოვანებ, მაგრამ არ ვუყურებ"
23:07 / 28-09-2013
ყველამ იცის, რომ მსახიობისთვის წიგნთან სიახლოვე აუცილებელია. ეს არის პროფესია, რომლისთვისაც ლიტერატურა ისევე აუცილებელია, როგორც ცოცხალი არსებისათვის წყალი ან ჰაერი. რუსთაველის თეატრის მსახიობი ნინო თარხან-მოურავი გამოგვიტყდა, რომ უდროობის გამო ბევრს ვეღარ კითხულობს, თუმცა წიგნი მისი ცხოვრების განუყოფელი ნაწილია:
- ძალიან ბევრი მწერლის შემოქმედება მიყვარს, თუმცა ალბათ დამეთანხმებით, რომ ბავშვობის შთაბეჭდილებები სულ სხვაა, ამიტომ ჩემთვის განსაკუთრებით მნიშვნელოვანი ქმნილებაა "ტომ სოიერის თავგადასავალი", რომელიც სულ პატარამ წავიკითხე. ბავშვობაში ძალიან მიყვარდა დოსტოევსკი, ვგიჟდებოდი რუსულ კლასიკაზე, შემდეგ წავიკითხე ბულგაკოვის "ოსტატი და მარგარიტა" და ის გახდა ჩემთვის ყველაზე საყვარელი წიგნი. ძალიან მიყვარს ქართველი მწერლები და პოეტები, განსაკუთრებით კი, ოთარ ჭილაძე, რომლის ლექსებიც არც ისე დიდი ხნის წინ აღმოვაჩინე და უეცრად მოვიხიბლე. ყველაფერი მომწონს, რაც კარგია, ამიტომ, ქართული პოეზიაც და პროზაც ძალზე ახლობელია ჩემთვის. ქართველ მწერლებს შორის პირველ რიგში დავასახელებდი კონსტანტინე გამსახურდიას და ნოდარ დუმბაძეს. მომწონს ლაშა ბუღაძის შემოქმედებაც. უცხოელ მწერლებს შორის კი იმდენი რჩეული მყავს, რომ ყველას ჩამოთვლა გამიჭირდება.
- როგორც ვიცი, ძალიან დაკავებული ხართ, ეს ხელს არ გიშლით წიგნის კითხვაში?
- ძალიან მინდა ბევრი რამ წავიკითხო, მაგრამ უკვე დრო არ მყოფნის. ერთ-ერთ ინტერვიუში უკვე ვთქვი და თქვეთანაც გავიმეორებ: მას შემდეგ, რაც ტელევიზიაში გახმოვანება დავიწყე, დღეში ხანდახან 190 გვერდის წაკითხვა მიწევს და სახლში მისვლისას უკვე კითხვის თავი აღარც მაქვს.
- თქვენ ითამაშეთ ოფელია შექსპირის "ჰამლეტში". რამდენად რთულია ასეთ დიდ კლასიკოსთან შეხება და მისი გმირის განსახიერება?
- გამოგიტყდებით, რომ ოფელია არ ყოფილა ჩემთვის საოცნებო და საინტერესო როლი. რაც შეეხება სირთულეს, ყველაფერი რთულია, მით უმეტეს, შექსპირის თამაში, რადგან ის უდიდესი კლასიკოსია, მაგრამ თუ კარგი რეჟისორი გხელმძღვანელობს და თვითონაც გონებაგახსნილი ხარ, ნებისმიერი სირთულის დაძლევა შეიძლება.
- თავის დროზე დავით კლდიაშვილის პერსონაჟებიც განასახიერეთ. რას გვეტყოდით ამის თაობაზე?
- კლდიაშვილი არაჩვეულებრივი მწერალია, რომელიც ძალიან მიყვარს. მის პერსონაჟებზე მუშაობა ჩემთვის ძალიან სახალისო იყო. ეს ხდებოდა ჯერ კიდევ მაშინ, როცა თეატრალურ ინსტიტუტს ვამთავრებდით. არაჩვეულებრივი პედაგოგები და ჯგუფელები მყავდა, საოცარი ხალისითა და თავდავიწყებით ვმუშაობდით და ვერ ვიტყვი, რომ რაიმე გამირთულდა. ეს იყო ჩემი ცხოვრების საუკეთესო წლები, რომელთანაც ულამაზესი მოგონებები მაკავშირებს. რაღაც დიდი სინათლე ახლდა თან იმ პერიოდს.
- როგორც ვიცი, თქვენი მეუღლე, თემურ ჭიჭინაძე, სტუდენტობის დროს გაიცანით და ცხრა წლის შემდე აღმოაჩინეთ, რომ ერთმანეთი გიყვარდათ. შეიძლება ცხრა წელი იცნობდე ადამიანს და ვერ ხვდებოდე, რომ ის შენი ცხოვრების თანამგზავრია?
- რატომაც არ შეიძლება? მე მგონი უკეთესიცაა, ადამიანს დიდხანს იცნობდე, ნელ-ნელა დაინახო მისი დადებითი თუ უარყოფითი თვისებები და გვიან აღმოაჩინო, რომ გიყვარს. ყველაფერი შეიძლება: შეიძლება ადამიანი ერთი ნახვით შეგიყვარდეს, შეიძლება - წლების შემდეგ, რადგან ამქვეყნად ყველაფერი ხდება.
- გიორგი სააკაძის შთამომავალი ხართ და თქვენმა წინაპრებმა გვარი "თარხნიშვილად" გადაიკეთეს.
- დიახ, რადგან რევოლუციის პერიოდს შეეწირა ჩემი დიდი ბებია - ის მოკლეს. ბაბუაჩემის უფროსმა ძმამ გვარი სასწრაფოდ ყველას გადაუკეთა, რომ მთელი გვარი არ ამოეწყვიტათ. რა თქმა უნდა, ეს თავდაცვის მიზნით მოხდა, მერე კი ყველამ დავიბრუნეთ ჩვენი გვარი. ეს იყო ტრაგიკული პერიოდი არა მარტო თარხან-მოურავების, არამედ მთელი საქართველოს ისტორიაში. ქართველი თავად-აზნაურების ტრაგედია ჩვენს მწერლობაში ჯერ კიდევ არ ასახულა ისე მძაფრად, როგორც მაგალითად ბულგაკოვის "თეთრ გვარდიაშია" ნაჩვენები. ვისაც ეს ნაწარმოები წაუკითხავს, იცის, რა მძიმე პერიოდი იყო.
- თანამედროვე ეპოქასაც შევეხოთ. ბოლო ხანებში ჩვენში ძალიან პოპულარული გახდა თურქული სერიალები და მათი გმირები. ხშირად ისმის კითხვა - რატომ გიჟდებიან ქართველი ქალები ამ სერიალების პერსონაჟებზე, - იქნებ იმიტომ, რომ ქართველ მამაკაცებს აღარა აქვთ ის ვაჟკაცური თვისებები, რომელიც მათ აქვთ?
- შეიძლება უცნაურად მოგეჩვენოთ - სერიალებს ვახმოვანებ, მაგრამ არ ვუყურებ: იმდენად სულსწრაფი ადამიანი ვარ, რომ რაღაც ამბის გაგებას 185 სერიაზე ნამდვილად ვერ გავჭიმავ, მოთმინება არ მეყოფა. ამ თვისების გამო სქელტანიანი წიგნებიც კი წამიკითხავს ერთ ღამეში. რატომ მოსწონთ ქართველ ქალებს სერიალების გმირები? - ამ კითხვაზე კითხვითვე გიპასუხებთ: განა ისინი არ ზრდიან ქართველ მამაკაცებს? ყველაფერი ხომ მათზეა დამოკიდებული? შეიძლება ძალიან ხმამაღალი და პრეტენზიული ნათქვამია, მაგრამ შვილებისადმი დამოკიდებულება, მათი აღზრდის ხერხები უნდა შევცვალოთ. ალბათ რაღაც ჩვენშიც უნდა გამოვასწოროთ, იდეალების ძებნის მაგივრად ისინი ჩვენვე უნდა შევქმნათ და გავზარდოთ. ხომ შეიძლება მოვაქციოთ ჩვენს გვერდით მყოფი ადამიანი ისეთ პირობებში, რომ მან თვითონ მოინდომოს, გახდეს იდეალური? ალბათ ამ სერიალებიდანაც შეიძლება რაღაცის სწავლა, მაგრამ მე მაინც წიგნისა და მაღალმხატვრული ხელოვნების მომხრე ვარ. თუმცა, სერიალებშიც არის ძალიან ბევრი საინტერესო მსახიობი, მეც ხშირად გამომიყენებია ეს ჟანრი, როგორც ტრენაჟორი და თუ ჩვენს ირგვლივ რაიმე არ მოგვწონს, ამის თავიდათავი ისევ ჩვენში უნდა ვეძებოთ, კომპიუტერი და სერიალი აქ არაფერ შუაშია.
ხათუნა ჩიგოგიძე
ყოველკვირეული გაზეთი "ყველა სიახლე"
(გამოდის ოთხშაბათობით)
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
სალომე ზურაბიშვილი საზოგადოებას 31 მარტს დაანონსებულ აქციაზე მისვლისკენ მოუწოდებს - რა პასუხი აქვს "ქართულ ოცნებას"
კვირის კითხვადი სტატიები
მნიშვნელოვანი ინფორმაცია
მკითხველის რჩევით
