22-23 აგვისტოს ბათუმი ელექტრონული მუსიკის ფესტივალს "BATUMI SUMMER SET 2013" მასპინძლობდა.
ორი დღის განმავლობაში მელომანების წინაშე ცნობილი უცხოელი მუსიკოსები და ქართველი არტისტები ელექტრონული მუსიკით წარდგნენ.
ფესტივალის პარალელურად "მედია პალიტრამ" მელომანებსა და ბათუმში მყოფ ტურისტებს ერთგარი საჩუქარი მოუმზადა. კერძოდ, თეთრ კაბებში გამოწყობილმა პრომო გოგოებმა, დამსვენებლებსა და მელომანებს სამახსოვროდ სათვალეები გადასცეს, რომელზეც "მედია პალიტრის" ლოგოებია გამოსახული.
"BATUMI SUMMER SET 2013" ფინალური კონცერტი და დახურვის ცერემონიალი 24 აგვისტოს უნდა გამართულიყო, თუმცა ძლიერი წვიმის გამო დაგეგმილი ღონისძიებები გადაიდო. როგორც ფესტივალის პიარ-მენეჯერმა ნიკა დვალიძემ განაცხადა, ძლიერმა წვიმამ დააზიანა სცენა და საფესტივალო ქალაქი. მისი თქმით, ყველა მელომანს, რომელსაც ფინალური კონცერტისთვის ბილეთები ჰქონდა შეძენილი, შეუნარჩუნდებათ და ფესტივალის მესამე დახურვის ცერემონიალი სექტემბრის თვეში გაიმართება.