16
მარტიდღის ზოგადი ასტროლოგიური პროგნოზი
რუბრიკის სტუმარია კინომსახიობი ნინო მუმლაძე, რომელიც ბევრი კინოროლის შემდეგ პოპულარულ ტელესერიალ "ჩემი ცოლის დაქალებში" გამოჩნდა.
- ნინო, ტელესერიალ "ჩემი ცოლის დაქალებში" სტომატოლოგის ამპლუაში მოგვევლინე, თანაც წონაც საკმაოდ დაგიკლია...
- წონა ხუთთვიანი დიეტის წყალობით დავიკელი... რაც შეეხება "ჩემი ცოლის დაქალებში" ჩემს გამოჩენას, სერიალის მესვეურებმა გადაწყვიტეს, ახალი მსახიობებიც დაემატებინათ, მათ შორის ჩემი პერსონაჟი, რომელიც გოცირიძეების იდეალურ ოჯახს ააფორიაქებდა და მაყურებელსაც ანერვიულებდა. ჩემი გმირი ძალიან თბილი, მზრუნველი, მხიარული გოგოა, არა ვულგარული, თუმცა სექსუალური. როგორც გადამღები ჯგუფის წევრებმა მითხრეს, ჩემი გმირის სახით სერიალში "ტკბილი ქალის" დამატება სურდათ...
- რომ არა მსახიობობა, რა პროფესიას აირჩევდა ნინო მუმლაძე?
- ხელოვანების ოჯახში გავიზარდე. 4 წლისა ვიყავი, დედამ ხელოვნების სკოლაში რომ შემიყვანა. ასევე, დავყავდი თეატრალურ წრეზე, მუსიკაზე, ბალეტზე, ხატვაზე და, თქვენ წარმოიდგინეთ, ყველა დარგში აღმომაჩნდა ნიჭი. ვინაიდან ამ ყველაფერს მსახიობობა ითავსებს - მუსიკალურიც უნდა იყო, პლასტიკურიც და სცენაზე დგომაც უნდა იცოდე, საბოლოოდ თეატრალურ ინსტიტუტში ჩავაბარე. დავამთავრე მუსიკალური ათწლედიც, ვოკალის ფაკულტეტი და კონსერვატორიაშიც ვაპირებდი ჩაბარებას, კარგადაც ვხატავდი... ასე რომ, მსახიობი რომ არ ვყოფილიყავი, ხელოვნების რომელიმე სფეროში ვიქნებოდი.
- წარმოიდგინე, შენი გმირის მსგავსად, შენც სტომატოლოგი ხარ და ცოლიან პაციენტს შეუყვარდი...
- და მე არ ვიცი, რომ ცოლიანია? როგორც კი ამას შევიტყობ, დიდ ტრაგედიას არ შევქმნი, ჩემი გმირისგან განსხვავებით, ჩვენი ურთიერთობა მხოლოდ ექიმი-პაციენტის ურთიერთობით შემოიფარგლება.
- რეალურ ცხოვრებაში თუ ყოფილა შემთხვევა, ცოლიან მამაკაცს შეყვარებოდი?
- სიმპათია ჰქონიათ, მაგრამ როგორც კი ეს შემიტყვია, მაშინვე გამიწყვეტია ურთიერთობა.
- წარმოიდგინე, კობა ხაბაზი საკუთარი ხელით აგებული ცათმფრენით მოგადგა და გთხოვს, რომ მასთან ერთად გაფრინდე...
- (იცინის) არ მგონია, მეყოს გამბედაობა, რომ ბატონი კობა ხაბაზის ხელით აგებული ცათმფრენით გავფრინდე. ფრენა მხოლოდ "ბოინგით" მიყვარს.
- რომელიმე ცნობილ ადამიანს თუ გამსგავსებენ?
- 13-14 წლისა ძალიან გამხდარი ვიყავი და გრძელი ხუჭუჭა თმა მქონდა. სწორედ იმხანად საქართველოში გადიოდა ტელესერიალი "კასანდრა". როგორც კი ქუჩაში გაშლილი თმით გამოვდოდი, ყველა კასანდრას მეძახდა (იცინის). სტუდენტობის პერიოდში ბევრს უთქვამს, სელმა ჰაიეკს ჰგავხარო. იმის მერე შევიცვალე და აღარავის მამსგავსებენ.
- რას გააკეთებდი, კულტურის მინისტრმა კინოსა და თეატრის სფერო რომ ჩაგაბაროს.
- პირველ რიგში, მსახიობების ანაზღაურების საკითხს მივხედავდი. მსახიობის შრომა მსოფლიოს უამრავ ქვეყანაში სათანადოდ არის დაფასებული, საქართველოში კი გაუფასურებულია. ამის მიზეზი არის ის, რომ ყოველთვის მოიძებნება მსახიობი, რომელიც კაპიკებზე მუშაობს. თუ როლზე უარს იტყვი, გეუბნებიან, შენ თუ არ გინდა, ამ ფასად სხვა ავიყვანთო და ზოგჯერ იძულებული ხარ, მწირ ანაზღაურებას დათანხმდე... გარდა ამისა, დავაარსებდი კინოსკოლებს, რომელიც დღეს საქართველოში არ არსებობს. პირველად რომ ამიყვანეს სერიალში, პროფესიონალი მსახიობი ვიყავი, მაგრამ კამერის წინ მუშაობა არ ვიცოდი. ამ დღეში უამრავი მსახიობია. გარდა ამისა, კინოს სჭირდება უამრავი რამის ცოდნა. მაგალითად, მანქანის მართვა, ცხენზე ჯდომა, ცურვა და ა.შ. რაც თეატრალურ ინსტიტუტში არ ისწავლება.
- წარმოიდგინე, ერთ-ერთი რეჟისორი გამტკიცებს მთავარი გმირის როლზე, რომელიც ფილმში უნდა გაშიშვლდეს...
- გააჩნია სცენარს, რეჟისორს, ფილმს და ა.შ. სიშიშვლე თუ მხოლოდ იმისთვის არის, რომ ამით ფილმის რეიტინგი აწიოს, რაც ხშირად ხდება უამრავ ქართულ თანამედროვე ფილმში, უარს ვიტყვი. მაგრამ თუ არის დრამატული ფილმი, სადაც სიშიშვლე არ აღიქმება გასაყიდ პროდუქტად და ეს ყველაფერი ესთეტიკურად არის გაკეთებული, რატომაც არა?
- საზოგადოების დიდ მოწონებას იმსახურებ, ეს გარეგნობის ბრალია თუ კიდევ სხვა ფაქტორის?
- ახალგაცნობილი მამაკაცები ცოტა მოშინაურების შემდეგ მეუბნებიან, შენი ღიმილი და თვალები მოგვწონსო, ისიც უთქვამთ, პირველ რიგში, დეკოლტეზე შემოგხედეო (იცინის).
- შეყვარებული თუ ხარ?
- ამ ეტაპზე არა.
- რას აჩუქებდი საქართველოს პრეზიდენტს?
- რა უნდა ვაჩუქო მიხეილ სააკაშვილს, არის ისეთ რამე, რაც არა აქვს?
ფსიქოლოგის დასკვნა
მარიამ ღონღაძე, ფსიქოლოგი: - მხიარული ადამიანია. იცის საკუთარი თავის ფასი. არის ერთგული და პრინციპული.
ესაუბრა ნინო მაისურაძე
ყოველკვირეული გაზეთი "ყველა სიახლე"
(გამოდის ოთხშაბათობით)
