29
მარტიდღის ზოგადი ასტროლოგიური პროგნოზი
მსოფლიოში სახელგანთქმული ქართველი სოპრანო თამარ ივერი სიდნეის ეწვია. ქართველმა ვარსკვლავმა ოპერის თეატრში საახალწლო გალა კონცერტზე მაყურებელი აღაფრთოვანა. ქალბატონმა თამარმა კონცერტზე მეც დამპატიჟა. შორეულ ავსტრალიაში, ოპერის თეატრის სცენაზე ჩვენი თანამემამულე რომ დავინახე, სიხარულისგან ცრემლი წამომივიდა. თამარ ივერმა ულამაზესი საახალწლო საღამო გვაჩუქა. ქართველ ვარსკვლავს სპეციალურად "ყველა სიახლისთვის" ექსკლუზიური ინტერვიუ ჩამოვართვი.
- ძალიან მიხარია, რომ ავსტრალიაში მოვხვდი. კოლორიტული ქვეყანაა და მიმაჩნია, რომ ერთ-ერთი მნიშვნელოვანი ცენტრია საოპერო სამყაროში. აღფრთოვანებამ მოლოდინს გადააჭარბა. ოპერის თეატრში მაყურებლების წინაშე წარვდექი ჯუზეპე ვერდის "ბალ-მასკარადით", შევასრულე ამელიას პარტია.
- თქვენს საოპერო მომღერლად ჩამოყალიბებაში, ალბათ, დიდი წვლილი მიუძღვის თქვენს მამას, ცნობილ ბარიტონს, ავთანდილ ჯავახიშვილს.
- ის, რომ დღეს საოპერო სცენაზე ვდგავარ, მართლაც მისი დამსახურებაა. ყოველდღიურად მასმენინებდა უდიდესი შემსრულებლების ნამღერს. ამ პერიოდში ჩამომიყალიბდა გემოვნება. ერთსა და იმავე არიას ვისმენდი 5 სოპრანოს შესრულებით და ვხვდებოდი, რომელ მომღერალს უკეთესი სუნთქვა ჰქონდა, რომელს - ხმის ტემბრი. ეს შედარების განცდა და გემოვნება მამამ ჩამომიყალიბა. ის ჩემი პირველი პედაგოგი და მრჩეველი იყო. კონსერვატორიაში რომ ვაბარებდი, ზუსტად იმ წელს გარდაიცვალა მამა და ეს დღემდე ცხოვრების უდიდეს ტრაგედიად მიმაჩნია. მახსოვს, ფარ-ხმლის დაყრას ვაპირებდი, მინდოდა ამ საქმიანობისთვის თავი დამენებებინა, რადგან ფრთებშეკვეცილ ფრინველად ვგრძნობდი თავს. საბედნიეროდ, კეთილმა ადამიანებმა და ჩემი ოჯახის წევრებმა დამარწმუნეს, რომ მამის სული ბედნიერი იქნებოდა, თუკი ვიმღერებდი. დედამ - მერი ყიფიანმა - ყველანაირად შემიწყო ხელი და დღემდე მეხმარება, რომ საკუთარი თავის რწმენა არ დავკარგო. ხშირად ავდივარ მამის საფლავზე და ვუყვები, სად რა წარმატება მქონდა. როდესაც სცენაზე ვდგავარ და ვმღერი, რატომღაც მგონია, რომ რომელიმე სკამზე მამა ზის და მისმენს.
- თქვენ ახლახან დაოჯახდით. მეუღლეზეც გვიამბეთ.
- ბედნიერი ვარ, რომ შევხვდი ადამიანს, რომელმაც ჩემი ცხოვრება გაიზიარა. ჩემი მეუღლე, მოჭიდავე რაულ ცხადაძე ტოსკანისა და ზემო ავსტრიის მხარის ჩემპიონია, იტალიაში დედასთან ერთად ცხოვრობდა, შემდეგ კი ჩემთან გადმოვიდა საცხოვრებლად, ავსტრიაში. რაული ძალიან კარგი ადამიანია. სადაც უნდა ვიყო გასტროლზე, ჩემომაკითხავს ხოლმე. ახლაც, სიდნეიში ჩემთან ერთადაა.
- სცენაზე რაიმე სახალისო ამბავი ხომ არ გადაგხდენიათ თავს?
- მახსოვს, პარიზის საოპერო თეატრის სპექტაკლში დედოფალ ელიზაბეტ ვალუას პარტიას ვმღეროდი, სცენარის მიხედვით პარტნიორს სცენაზე წერილი უნდა გადმოეცა ჩემთვის. გადმომცა კიდეც, გავშალე წერილი და რას ვხედავ? - ფურცელზე შიშველი მამაკაცის ფოტო არ არის გამოსახული?! რომ დავინახე, შევცბი. სიტყვებიც დამავიწყდა, მთელი ორკესტრი მე მიყურებდა, სად გავქცეულიყავი, არ ვიცოდი, თან ფურცელს ვმალავდი, ვინმეს რომ არ დაენახა. თურმე კოლეგამ გადაწყვიტა გახუმრება: ჟურნალიდან ამოუჭრია შიშველი მამაკაცის ფოტო და ჩემი რეაქცია აინტერესებდა. იმწამს კი გავბრაზდი, მაგრამ ახლა ამ ამბავზე მეცინება.
- საახალწლოდ როგორ ემზადებით?
- როგორც წესი, ყოველ ახალ წელს გასტროლზე ვარ და რომელიღაც ქალაქში ვმღერი. საახალწლო სუფრის მოსამზადებლად დრო არასოდეს მრჩება. საქართველოში როცა ჩავდივარ, ახალ წელს გემრიელ კერძებს მახვედრებენ ხოლმე. მე სალათებს ვამზადებ და მეგობრებს ვუმასპინძლდები. ძალიან მიყვარს ახალი წელი, ყოველთვის ამაღლებული განწყობით ვხვდები.
- ქართველ მაყურებელს თუ ექნება საშუალება, სიდნეის ოპერის თეატრში თქვენ მიერ წარმოდგენილი სპექტაკლის ჩანაწერი იხილოს?
- საქართველოში საპატრიარქოს ტელევიზიით უჩვენებენ ხოლმე ჩემს სპექტაკლებს. ასე რომ, ამ სპექტაკლის ჩანაწერსაც აუცილებლად გადავცემ, შესაბამისად, ქართველი მაყურებელიც ნახავს.
ვისარგებლებ შემთხვევით და სრულიად საქართველოს მოსახლეობას ახალ წელს მივულოცავ. იხარეთ, იმრავლეთ, იბედნიერეთ! მიყვარხართ ძალიან, თქვენი თამარ ივერი!
თათული ბართაია
სპეციალურად "ყველა
სიახლისათვის" სიდნეიდან
ყოველკვირეული გაზეთი "ყველა სიახლე"
(გამოდის ოთხშაბათობით)
