ეკა ბესელია - ამნისტიის კანონით ციხეებს მინიმუმ 3 000-ზე მეტი პატიმარი დატოვებს
ამნისტიის კანონით სასჯელაღსრულების დაწესებულებებს მინიმუმ 3 000-ზე მეტი პატიმარი დატოვებს, - ამის შესახებ ჟურნალისტებს საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელიამ განუცხადა.
მისი თქმით, პირველ ეტაპზე გათავისუფლდებიან პოლიტპატიმრები, ხოლო შემდეგ სხვა მსჯავრდებულები.
"კანონის აღსრულება დამოკიდებულია იმაზე, თუ როდის გამოქვეყნდება. კანონი გამოქვეყნდება პრეზიდენტის ხელმოწერის შემდეგ და ძალაში შედის გამოქვეყნებისთავანავე. კანონის ძალაში შესვლიდან ერთ კვირიან ვადაში თავისუფლდებიან პოლიტპატიმრები, ხოლო 2 თვეა მაქსიმალური ვადა, როდესაც ამნისტიის აღსრულება უნდა მოხდეს ყველა დანარჩენი პატიმრის მიმართ. რამდენიმე ათასი პატიმარი გათავისუფლდება. ზუსტი ციფრის თქმა ძნელია, რადგან რამდენიმე მუხლია, რომელსაც აქვს წინაპირობა და ეს წინაპირობები უნდა დადგეს იმისთვის, რომ გათავისუფლება მოხდეს. მინიმუმ შემიძლია გითხრათ, რომ ეს არის 3000-ზე მეტი ადამიანი. სასჯელი გაუნახევრდება ასევე რამდენიმე ათას პატიმარს. რაც შეეხება სასჯელის შემცირებას 1/4 -ით - ის დაახლოებით 15 700 პატიმარს შეეხება. მთლიანობაში არც ერთი პატიმარი არ რჩება, რომელსაც ამნისტია სხვადასხვა ფორმით არ შეეხება", - განაცხადა ბესელიამ.
მისივე ინფორმაციით, საქართველოს პრეზიდენტს კანონზე ხელი მოწერილი ამ დროისთვის არ აქვს.
დაპირისპირება თბილისის ცენტრში - რამდენიმე მამაკაცი ფიზიკურად გაუსწორდა
"სათამაშო ბიზნესი "ქართულ ოცნებაში" ე.წ. შავ სალაროს ავსებს" - ვინ მფარველობს ონლაინკაზინოებს?
