26
მარტიდღის ზოგადი ასტროლოგიური პროგნოზი
პარლამენტის თავმჯდომარეობის კანდიდატის დავით უსუფაშვილის განცხადებით, კონსტიტუციის შეცვლა გარდაუვალია. "კონსტიტუციის შეცვლა გარდაუვალია, იმიტომ, რომ კონსტიტუცია საოცრად დამახინჯებულია. ამ კონსტიტუციით მუშაობა არის უკიდურესად რთული. ამ კონსტიტუციით კონსტიტუციური წესრიგის დამყარება არის შეუძლებელი, იმდენად მორგებული იყო ის ერთი კონკრეტული ადამიანის გუნდის ინტერესებზე, მომავალზე, მათ გათვლებზე და იმდენად არ ითვალისწინებდა საერთო რეალობას", - განაცხადა დავით უსუფაშვილმა გადაცემა "პოლიტმეტრში".
მისივე ინფორმაციით, კონსტიტუცია კრიზისულ ვითარებაში უნდა დაეხმაროს საზოგადოებას, თუმცა ამჟამინდელი კონსტიტუცია ყოველ ნაბიჯზე ქმნის კრიზისულ ვითარებას.
"კონსტიტუცია იმისთვისაა საჭირო, რომ კრიზისულ ვითარებებში დაგვეხმაროს ვითარების განმუხტვისთვის. ეს კონსტიტუცია ყოველი ფეხის ნაბიჯზე კრიზისულ სიტუაციებს ქმნის და ახლაც ასეთი ვითარებაა, როდესაც ხალხმა გამოხატა თავისი პოზიცია, ხალხმა თქვა ძალიან მკაფიოდ, რომ ამ გეზს დაუჭეს მხარს, ესაა მთავრობა, ამათი პროგრამის შესრულება მინდა - სრულიად მკაფიოდ ითქვა ყველაფერი და ამასობაში კონსტიტუციით პრეზიდენტს დარჩა ძალიან სერიოზული ძალაუფლება. როდესაც ჩვენ ვსაუბრობთ გარდამავალი პერიოდის მგრძნობიარობაზე და ვდგამთ ნაბიჯებს, ჯგუფები ვხვდებით ერთმანეთს, ჩვენი წარმომადგენლები შედიან სამინისტროებში და უწყებებში, ჩვენ ვითვალისწინებთ ორ გარემოებას: ერთი იმას, რომ ხელისუფლება ჯერ კიდევ იმ ადამიანების ხელშია ვის წინააღმდეგაც ხალხმა მისცა ხმა და მეორე - კონსტიტუცია. მაგალითად, ახლა რაც წერია ამ კოსტიტუციაში, სააკაშვილს აძლევს ფორმალურ, იურიდიულ უფლებას სულაც არ გაითვალისწინოს, ის რომ ხალხმა დაუჭირა მხარი კოალიცია "ქართულ ოცნებას" და მის ლიდერ ბიძინა ივანიშვილს. ეს სააკაშვილის და ბოკერიას კეთილ ნებაზე კი არ უნდა იყოს დამოკიდებული - ხელს არ შეგიშლითო, კონსტიტუციით უნდა მიყვებოდეს ამ ლოგიკას", - აღნიშნა დავით უსუფაშვილმა.
დავით უსუფაშვილის თქმით, ახალი კონსტიტუციის შექმნას დრო სჭირდება და ნაჩქარევად არაფერი არ უნდა გაკეთდეს.
" ჩვენ არ გავიმეორებთ იმ შეცდომას, რაც მიხეილ სააკაშვილმა 2004 წელს გააკეთა. შეიქმნება საკონსტიტუციო კომისია, ამ კუთხით უკვე დიდი შრომაა გაწეული. ყველას მოვუხმობთ - მხოლოდ "ნაციონალებს" კი არა, იმ პოლიტიკოსებსაც მოვუხმობთ, რომლებიც პარლამენტში არ არიან შესული", - განაცხადა დავით უსუფაშვილმა.
