10 ოქტომბერს საინფორმაციო სააგენტო "ინტერპრესნიუსმა" გაავრცელა საჯარო რეესტრის ინფორმაცია იმის შესახებ, რომ googleMAP-ის მსოფლიო რუკაზე საქართველო თეთრ ლაქას აღარ წარმოადგენს.
ვფიქრობთ, ეს სიახლე მართლაც მნიშვნელოვანია. googleMAP-ის მონაცემების გამოყენება მრავალმხრივ შეიძლება. გუგლის რუკა, უპირველესად, ტურისტებისთვის არის მნიშვნელოვანი ატრიბუტი. ტურიზმის განვითარება კი მოგეხსენებათ, ჩვენი ქვეყნის უმთავრეს პრიორიტეტად ითვლება...
რაც უფრო მნიშვნელოვანია გუგლზე საქართველოს დეტალური რუკის არსებობა, მით უფრო გულსატკენია ზემოხსენებულ რუკაზე აღმოჩენილი შეცდომები.
რამდენიმე უხეში შეცდომა "ამბები.გე"-ს რედაქციამაც აღმოაჩინა. მაგალითად, თბილისი-სენაკი-ლესელიძის მაგისტრალს სოფელ იგოეთთან რამდენიმეკილომეტრიანი წყვეტა აქვს (სურ.1). საკმაოდ დიდი სოფელი, ნატახტარი (დიდი საწარმოების რაოდენობის მიხედვით უმნიშვნელოვანესი სოფელი საქართველოში) საერთოდ არ არის რუკაზე დატანილი (სურ.2). ალბათ, ამიტომაც არის შეცდომით აღნიშნული ნატახტარი-წილკანი-მუხრანის გზა და ნატახტარის ნაცვლად, ნატანები წერია (სურ.2). არადა ნატანები ამ ადგილიდან სამასი კილომეტრით არის დაშორებული და გურიაში მდებარეობს.
რუკაზე არ არის აღნიშნული და საერთოდ არ იძებნება საქართველოს ერთ-ერთი ყველაზე პერსპექტიული ტურისტული ცენტრი - გუდაური (სურ.3)
არის შეცდომები დედაქალაქის ქუჩების აღნიშვნაშიც. ტურისტებისთვის საინტერესო ძველ თბილისში მდებარე ლესელიძის ქუჩის ნაწილს, ვერცხლის ქუჩა აწერია (სურ.4)
საბედნიეროდ, ამ შეცდომების გამოსწორება ძნელი არ უნდა იყოს. ჩვენი მიზანიც სწორედ ეს არის. გვინდა შესაძლებლობის ფარგლებში ჩვენი წვლილი შევიტანოთ ამ მართლაც საჭირო საქმეში და საჯარო რეესტრის შესაბამის სამსახურს არსებული უზუსტობების შესახებ შევატყობინოთ.
ამისთვის მკითხველს მოვუწოდებთ, გადახედოთ googleMAP-ზე თქვენთვის ცნობილ ტერიტორიებს, ქუჩებს, ქალაქებს, სოფლებს. აღმოაჩინეთ შეცდომები და მოგვწერეთ კომენტარები ამ პუბლიკაციის ქვეშ. ჩვენ ყველა შეცდომას გადავამოწმებთ და რუქის შემქმნელებს შევატყობინებთ.
იმედია, მალე ერთად შევძლებთ ყველა პრობლემის აღმოჩენას და აღმოფხვრას.
ps. "ამბები.გე"-ზე გამოქვეყნებულ ჩვენს სტატიას საჯარო რეესტრი უკვე გამოეხმაურა. საჯარო რეესტრის ეროვნული სააგენტოს ოფიციალურ ვებგვერდზე მალე სპეციალური ბმული განთავსდება, რომელზეც ნებისმიერ პირს საშუალება ექნება, რუკაზე ხარვეზის ან უზუსტობის აღმოჩენის შემთხვევაში, ხარვეზი დააფიქსიროს და ინფორმაცია საჯარო რეესტრის ეროვნულ სააგენტოს მოაწოდოს.