სახალხო კრების წარმომადგენელი სოსო ჯაჭვლიანი შს სამინისტროს მცხეთის იზოლატორში შიმშილობს. ამის შესახებ "ინტერპრესნიუსს" ადვოკატმა შალვა ხაჭაპურიძემ აცნობა.
ადვოკატის განცხადებით მან სოსო ჯაჭვლიანი პირადად მოინახულა. მისივე თქმით, ჯაჭვლიანი სასტიკად არის ნაცემი, მიიჩნევს, რომ დააკავეს უკანონოდ და გათავისუფლების მოთხოვნით, პროტესტის უკიდურეს ფორმას, შიმშილობას მიმართავს.
სოსო ჯაჭვლიანი 26 მაისის ღამეს რუსთაველის გამზირზე დააკავეს. ის აქციის დაშლის ოპერაციის მიმდინარეობისას სხვა მომიტინგეებთან ერთად, კინოთეატრ "რუსთაველს" აფარებდა თავს. სამართალდამცველებმა ჯაჭვლიანი სწორედ "რუსთაველში" აიყვანეს.
ადვოკატ შალვა ხაჭაპურიძის განცხადებით, სპეცრაზმელებმა ჯაჭვლიანი კინოთეატრის შენობაში უმოწყალოდ ცემეს.