28
მარტიდღის ზოგადი ასტროლოგიური პროგნოზი
მეგი ვიბლიანი პოპულარული ტიკტოკერია, რომელსაც 100 ათასზე მეტი გამომწერი ჰყავს. სვანმა გოგონამ წლების წინ საქართველო დატოვა და ცხოვრება ჩინეთში დაიწყო, სადაც ოჯახიც შექმნა. გვანჯოუში ცხოვრების გამოცდილება, კულტურული განსხვავებები, ოჯახური ურთიერთობები და სოციალური ქსელების გავლენა – ეს ის თემებია, რომლებზეც მეგი გულწრფელად გვიყვება.
- როგორ შეეგუა ჩინურ სამზარეულოს, როგორ მოახერხა დიდი ოჯახის გარემოს შექმნა შორეულ ქვეყანაში და როგორია ქართველი ქალის ცხოვრება აზიაში? - მეგი თავისი გამოცდილებით გვიზიარებს:
- მეგი, როგორია ჩინეთში ცხოვრება, ყველაზე მეტად რა გაგიჭირდა ადაპტაციის პერიოდში?
- ალბათ საკვები... თავიდან ვერ ვეჩვეოდი, რომ ბრინჯი უნდა მეჭამა. უპურობა მიჭირდა ძალიან, ახლა უკვე მივეჩვიე და ძალიან შემიყვარდა ჩინური კერძები. ძალიან გემრიელია ბრინჯის პური, მაგას ვყიდულობ ხოლმე. ხშირად მეკითხებიან ხოლმე ჩემს დედამთილზე, როგორ ინარჩუნებს ფორმას, ახლა მოგიყვებით, ყოველდღე სვამს რძეს და საღამოს 6 საათის შემდეგ, საერთოდ არაფერს აღარ ჭამს. ოღონდ ასეა წლებია, ახალგაზრდობიდან. დილას არ საუზმობს, დღეში ორჯერ იკვებება და საღამოს არაფერს აღარ ჭამს. ყოველთვის ერთ წონაზეა.
- ერთად ცხოვრობთ?
- დიდ ოჯახში გავიზარდე, სახლში ყოველთვის ბევრი ვიყავით. გაბრიელი რომ გავაჩინე, ხედავდა ჩემს და-ძმებს, ჩემს მშობლებს, ბავშვი ისე მიეჩვია ყურადღებას, რომ დისკომფორტი ექმნება მარტოები რომ ვართ. სახლში სულ ვიღაც გვყავდა. ჩემს ქმარს ვუთხარი, რომ მის მშობლებს ჩვენთან ეცხოვრათ. ისინი ხან ვენჰაიზე მიფრინავდნენ, სადაც ზღვის ნაპირზე ბინა აქვთ, ხან სანიაზე და ხანაც ჰარბინში, ცოტა ხნით, რადგან იქ ძალიან ცივა. ზაკს ვუთხარი, რადგან გუანჯოუში ვარ ჩემი პროფესიის გამო, შენმა მშობლებმა ჩვენთან იცხოვრონ-თქო. ზაკის მამა ცუდად არის, ფილტვებზე პრობლემა აქვს და სულ გაციების შიში აქვს. ჩემი შეთავაზება ძალიან გაუხარდათ და გადმოვიდნენ საცხოვრებლად. არ სჯერათ ხოლმე რომ ჩემთვის ასე უფრო კომფორტულია. მიჩვეული ვარ, არ შემიძლია სახლში მარტო ვიყო.
- შენი და ზაკის გაცნობის ისტორია მოგვიყევი...
- განსაკუთრებული ისტორია არ გვაქვს, 2017 წლიდან ერთად ვართ. "ვიჩატზე“ დამამატა და სტიკერებს მიგზავნიდა ხოლმე. ერთხელ ცუდად გავხდი, მარჯვენა ყბა დამისივდა და წამლებს ვსვამდი. სადარბაზოსთან მოვიდა და ანტიბიოტიკი მომიტანა, მაშინ ვნახე პირველად ლაივში. 8 აგვისტოს გავხდით შეყვარებულები, როდესაც ჩემი დაბადების დღე მომილოცა. ვერც წარმომიდგენია ცხოვრება ზაკის გარეშე.
- გაბრიელთან ერთად ჩინეთში რომ დაბრუნდი, დედა და შენი და, მარიამი თან გამოგყვნენ...
- დედა სამი თვე დარჩა, ჩინეთთან ხომ უვიზო გვაქვს და საქართველოში დაბრუნდა. მარიამი ისევ ჩემთან არის, მინდა, რომ აქ ისწავლოს. აქაც დიდ ოჯახად ვცხოვრობთ. ჩემი დედამთილი საოცარი ქალია. რაც გაბის ეხება არასოდეს იღებს გადაწყვეტილებას ჩემს გარეშე, ყველაფერს მეკითხება. სასწაული კვების რაციონი შეუდგინა, გიჟდებიან ბავშვზე ბებია-ბაბუა.
ზაკი მამობამ ძალიან შეცვალა, კიდევ უფრო მეტად ვგრძნობ, რომ ვუყვარვარ. რაც შვილი შეგვეძინა, განსაკუთრებული დამოკიდებულება აქვს ჩემს მიმართ. ზოგადად ძალიან მადლიერი ადამიანი ვარ. ვთვლი, რომ ჩემს წინაშე არავინ ვალდებული არ არის. როდესაც სამყაროსგან რაიმეს ვიღებ, მადლიერი ვარ. პატარ-პატარა სიხარულებიც კი ძალიან მიხარია. უარყოფით რაღაცებს არც ვაქცევ ყურადღებას. ბევრი კარგი რამ ხდება ჩემს ცხოვრებაში ყოველდღიურად. ძალიან შემიყვარეს ზაკის მშობლებმა, ამით ძალიან ბედნიერი ვარ.
- სვანები განსაკუთრებულად ასოცირდებიან ტრადიციულობასთან, როგორ მიიღო მამამ ჩინელი სიძე?
- მამა ცოტა ისეა განწყობილი განქორწინების მიმართ. თუმცა როდესაც ზაკის შესახებ მოვუყევი პრობლემა არ ჰქონია.რაც შეეხება ჩინეთში გაშვებას, 17 წლიდან ვმუშაობ, ბევრი პასუხისმგებლობა ავიღე საკუთარ თავზე, ჩემი და-ძმები ჩემთვის შვილებივით არიან. თუ კი რამე შემოსავალი მაქვს და რამეს ვაკეთებ, ყველაფერში ჩემი და-ძმებიც სულ მყავს. მეუბნებოდნენ ხოლმე შვილი რომ გეყოლება სხვანაირად იქნებიო და ამ დროს არაფერი შეცვლილა.
- ზაკის რწმენაზე მინდა გკითხო, საქართველოში გადაღებულ ვიდეოზე წყალში შთაფვლა ჩანს, ყველას ეგონა, რომ მაშინ მოინათლა...
- სანამ ზაკს გავიცნობდი, ის უკვე მართლმადიდებელი იყო ქრისტიანი. ზრდასრულ ასაკში მიიღო გადაწყვეტილება და გაქრისტიანდა. დედა ჰყავს ათეისტი, მამა ბუდიზმის მიმდევარი. ჯვარს ატარებს, რომელსაც არასოდეს იხსნის. 19 იანვარს თბილისში ჩვენს ავჭალის ნათლისღების მამათა მონასტერში განბანა ხდება. უბანში ყველა იქ დადიან და ზაკიც წამოვიდა. ეს კადრი გადავიღე, როცა ზაკი ჩავიდა. მომსწრეები ვინც იყვნენ დაში დაუკრეს. უბრალოდ გვიან გამოვაქვეყნე ეს ვიდეო და თვლიდნენ, რომ ჩემს გამო მიიღო სარწმუნოება, ჯვარი არ დაგვიწერია და ვაპირებთ, მაგრამ გაბრიელი 40 დღეზე მოვნათლეთ.
- 100 ათასზე მეტი გამომწერი გყავს ტიკ-ტოკზე, რა გამოწვევების წინაშე გაყენებს პოპულარობა. ჩინელი გამომწერები თუ გყავს?
- ჩინური ტიკ-ტოკიც მქონდა, მაგრამ 80 ათასი გამომწერი მყავდა, ახლაც ვერ ვეგუები ყურადღების ცენტრში ყოფნას. მას შემდეგ რაც გამომწერების რიცხვი გაიზარდა და უამრავი ადამიანი მწერდა, გადავწყვიტე ჩემს ყოველდღიურობაზე მოვუყვე ადამიანს, ამის გამო, ზოგჯერ ძალიან გავილანძღები ხოლმე. არცერთ რეკლამაში არ მიმიღია საქართველოში მონაწილეობა, უფასოდაც წავიდოდი, ისე მაინტერესებს ჩვენთან როგორ ხდება ეს ყველაფერი.
- უარყოფითი კომენტარები ახსენე და ხშირად გაკრიტიკებენ ხოლმე ჩინელი მეუღლის გამო, ამ დროს ხაზს უსვამენ შენ სვანობას...
- არ ვიცი, რატომ მლანძღავენ. არ ვთვლი, რომ ვიმსახურებ, მაგრამ რა ვქნა. რადგან საჯაროდ გამოვიტანე ჩემი ოჯახის ამბები, ბუნებრივი არის რომ ზოგიერთ ადამიანს სიძულვილი ჰქონდეს და გამლანძღოს, მაგრამ ადამიანების დიდ რაოდენობას ვუყვარვარ და ნაკლები უარყოფითი ასატანია.
- ჩინეთში რას საქმიანობ?
- კომერციულ რეკლამებში მიღებენ, მაგრამ ასევე ჩემს მეგობართან ერთად ტანსაცმლის ბრენდი ჩავუშვი. ფრილანსერი ვარ, სააგენტოებთან არ ვმუშაობ. ზაკს თავისი ბარი აქვს, 2018 წელს უცხოელებისთვის გააკეთა.
