“წარმოუდგენელია, სიტყვებით გადმოსცე უდიდესი ტკივილი, რომელიც ოკუპირებულ სოფელ საბერიოში დატრიალებულმა ტრაგედიამ თითოეულ ჩვენგანს მიაყენა“ - ირაკლი კობახიძე

ირაკლი კობახიძე საქართველოს მთავრობის სახელით სამძიმარს და თანადგომას უცხადებს ოკუპირებული გალის რაიონის სოფელ საბერიოში ხანძრის შედეგად დაღუპული ბავშვების ოჯახს.

“წარმოუდგენელია, სიტყვებით გადმოსცე ის უდიდესი ტკივილი, რომელიც ოკუპირებული გალის რაიონის სოფელ საბერიოში დატრიალებულმა ტრაგედიამ თითოეულ ჩვენგანს მიაყენა.

საქართველოს მთავრობისა და პირადად ჩემი სახელით გულწრფელ სამძიმარს და თანადგომას ვუცხადებ ხანძრის შედეგად დაღუპული ბავშვების ოჯახს, ახლობლებს, მთელ ჩვენს საზოგადოებას”, - ნათქვამია ირაკლი კობახიძის განცხადებაში, რომელსაც საქართველოს მთავრობა ავრცელებს.

• ოკუპირებული აფხაზეთის გალის რაიონის სოფელ საბერიოში მომხდარ ტრაგედიასთან დაკავშირებით მწუხარებას სახელმწიფო მინისტრის აპარატი გამოთქვამს.

“ვუსამძიმრებთ დაღუპულთა ოჯახის წევრებსა და მათ ახლობლებს, თანადგომას ვუცხადებთ და ვიზიარებთ ამ უმძიმესი დანაკარგის განუზომელ ტკივილსა და უდიდეს ტრაგედიას”, - ნათქვამია მინისტრის აპარატის მიერ გავრცელებულ ინფორმაციაში.

ოკუპირებულ გალის რაიონ სოფელ საბერიოში, ერთ-ერთ სახლში ხანძარი გაჩნდა. როგორც ადგილობრივი მედია “აიაშარა“ ტელეგრამარხზე წერს, ხანძარი ჩოლარიების სახლში გაჩნდა. ცეცხლმა მთლიანი შენობა წუთებში მოიცვა, სადაც 5 მცირეწლოვანი ბავშვი იმყოფებოდა.

იხილეთ ასევე:

• ტრაგედია ოკუპირებულ გალში - სახლში გაჩენილ ხანძარს 5 ბავშვის სიცოცხლე ემსხვერპლა: რას წერს ადგილობრივი მედია
• “უფროსი 8 წლის იყო, უმცროსი 4 თვის - ბავშვების დედა საავადმყოფოში წევს, მამა მის სანახავად წავიდა“ - ტრაგედიის დეტალები: რა ხდება ცნობილი ოკუპირებულ გალში მომხდარ ხანძარზე, რომელსაც 5 ბავშვი ემსხვერპლა