როდის გამოიდარებს და ჩადგება ქარი: სვეტლანა ნიორაძის პროგნოზი - "ბოლო დღეებში იყო ძალიან სერიოზული შემოჭრა ცივი და ნოტიო ჰაერის მასების..."
გარემოს ეროვნული სააგენტოს ცნობით, 29 ნოემბრიდან საქართველოში გამოიდარებს და ნალექი შეწყდება. დღისით დასავლეთ საქართველოში შედარებით დათბება, აღმოსავლეთ საქართველოში კი შენარჩუნებული იქნება ცივი ამინდი.
მათივე ცნობით, თბილისში 2 დეკემბრამდე უნალექო ამინდია მოსალოდნელი, ხოლო 2 დეკემბერს შესაძლოა მცირე წვიმა და ნისლი აღინიშნოს. ჰაერის ტემპერატურა დღისით +7, +9 გრადუსი დაფიქსირდება. დასავლეთ საქართველოში +15 გრადუსსაც ელოდებიან.
გარემოს ეროვნული სააგენტოს ჰიდრომეტეოროლოგიური პროგნოზების სამმართველოს უფროსი სვეტლანა ნიორაძე მოსალოდნელ ამინდებზე დეტალურად გვესაუბრა...
- ქალბატონო სვეტლანა, როდის მოვა თბილისში პირველი თოვლი, ნავარაუდევი იყო 27 ნოემბერს?
- თბილისის გარეუბნებში იყო თოვლი, მაგალითად ლოტკინზე, სხვა უბნებშიც... მცირე თოვლი იყო, მეტი არც იყო ნავარაუდევი. ჯერჯერობით თბილისში თოვლს არ ველოდებით.
- როგორი ამინდი იქნება უახლოეს დღეებში, ქარი ისევ იქნება?
- ხვალიდან მთელ საქართველოში გამოიდარებს. ხვალაც ქარია, ზეგიდან კი ქარიც ჩადგება. ორ დეკემბერს შესაძლოა თბილისში მოიღრუბლოს, მოსალოდნელია მცირე წვიმა და ნისლი. ეს, რაც ბოლო დღეებში ვნახეთ, იყო ძალიან სერიოზული შემოჭრა ცივი და ნოტიო ჰაერის მასების, რამდენიმედღიანი ძლიერი ნალექი მოვიდა როგორც დასავლეთ, ასევე აღმოსავლეთ საქართველოში... მთებში, მაღალ მთებში ყველგან თოვდა. ვიცით, რომ ბევრი საავტომობილო გზა ჩაიკეტა, ხვალიდან უკვე ნელ-ნელა შეზღუდვები მოიხსნება.
- "სეზონები თითქმის წაიშალა... შესაძლოა, დეკემბერ-იანვარში ტემპერატურამ მოიმატოს" - როგორი ზამთარი გველის საქართველოში?
- ზამთრის პროგნოზი ჯერ არ გვაქვს. გამორიცხული არაფერია, შეიძლება ცალკეულ დღეებში სითბო იყოს დეკემბერშიც, იანვარშიც, როგორც ყოველთვის ხდება. არაფერი უჩვეულო არ ხდება, უკვე ნოემბრის მესამდე დეკადაა და ნალექი არც უნდა გაგვიკვირდეს. ასევე შესაძლოა იანვარში სითბოც, რადგან იანვარში ბევრჯერ არის, რომ თბილა, კლიმატურ ნორმაზე მაღალი ტემპერატურაა. 2025 წლის იანვარი როგორი იქნება, ამის შესახებ არანაირი ინფორმაცია არ გვაქვს.
წაიკითხეთ ასევე: