ლიმაში მასწავლებელი მოსწავლეების თვალწინ მოკლეს - დანაშაულის უმძიმესი სტატისტიკა პერუში
ლიმაში, ღამის საათებში დედები მოსწავლეების სკოლის წინ შეიკრიბნენ და სამართლიანობის მოთხოვნით საპროტესტო აქცია გამართეს. მანიფესტაცია მოჰყვა ფაქტს, რომ მოსწავლეების თვალწინ მასწავლებელი მოკლეს, რაც პერუში ბანდიტური ძალადობის მკვეთრი ზრდის ყველაზე შოკისმომგვრელი მაგალითია.
ორშაბათს მომხდარი ინციდენტის ვიდეოკამერის ჩანაწერზე ჩანს, როგორ გარბიან შეშინებული ბავშვები სკოლის შენობაში, ხულიო სესარ პაჩეკოს სხეული კი სკოლის ჭიშკართან უსულოდ გდია. ის სიცოცხლეს იმ მკვლელმა გამოასალმა, რომელიც თავს იურიდიული დოკუმენტის მიმტანად ასაღებდა.
პერუში დანაშაული ისედაც გაზრდილია, განსაკუთრებით რეკეტისა და მკვლელობების ზრდა შეინიშნება. კრიზისმა ორდღიანი გაფიცვა გამოიწვია - ლიმას მუშახელმა აღშფოთება გამოხატა იმის გამო, რასაც ისინი კანონის ცუდ აღსრულებას, არაპოპულარული მთავრობის ცუდ ლიდერობასა და საძულველი კონგრესის მიერ ანტიკრიმინალური კანონმდებლობის განზრახ შესუსტებას უწოდებენ.
გაფიცვა ავტობუსებისა და მოტორიზებული რიკშო ტაქსის მძღოლებმა დაიწყეს. მათ მაღაზიის მფლობელები, ქუჩის გამყიდველები, ხელოვანები, დალაქები, რესტორნების მზარეულებიც კი შეუერთდნენ. მათგან ყველანი რეკეტული ბანდების სამიზნეები არიან, რომელიც მათ აიძულებთ, ყოველდღიური ან ყოველკვირეული გადასახადები გადაიხადონ, წინააღმდეგ შემთხვევაში კი ყუმბარის აფეთქებითა და სიკვდილით ემუქრებიან.
8 ოქტომბერს, 12 საათზე ნაკლებ დროში, ლიმაში შვიდი მკვლელობა მოხდა, მიუხედავად იმისა, რომ 14 რაიონში ორთვიანი საგანგებო მდგომარეობა იყო გამოცხადებული.
დანაშაულისა და ძალადობის სფეროს ექსპერტმა, ერიკა სოლისმა აღნიშნა, რომ გამოძალვა არა დიდი ეკონომიკური ტევადობის სექტორებისკენაა მიმართული, არამედ - პერიფერიებზე, რომელშიც სამართალდამცავი ორგანოები არ არიან წარმოდგენილნი ან მათ მიერ სათანადო კონტროლი არ ხორციელდება. მისივე თქმით, პრეზიდენტ დინა ბოლუარტეს რეაქცია "პრიმიტიული და თითქმის მთლიანად პოპულისტური იყო".
სტატისტიკა შემაშფოთებელია. სხვადასხვა სააგენტოს მონაცემების თანახმად, დაახლოებით 23 000 მაღაზიის მფლობელთა ნახევარი შანტაჟის მსხვერპლია, იხდიან რა თვეში $25-დან $1,000-მდე; სატრანსპორტო კომპანიებიდან, ათიდან შვიდი საშუალოდ $4,000-ს იხდის; 300 სამშენებლო ობიექტი შეაჩერეს ან ძალადობით დაემუქრნენ; 2011 წლიდან მოყოლებული კი პროფკავშირის 24 ლიდერია მოკლული.
პერუ ყოველწლიურად $1.6 მილიარდზე მეტს კარგავს შანტაჟის გამო - მისი ეროვნული მშპ-ს 0.7%-ს, ხოლო უსაფრთხოების ნაკლებობა ქვეყანას 3.5% უჯდება, რაც, ლიმას სავაჭრო პალატის მიხედვით, $9.28 მილიარდს შეადგენს.