"ბეჭდების მბრძანებლის" ტრილოგიის დაბრუნება დიდ ეკრანებზე: 26 სექტემბერს "კავეას" კინოთეატრში დახურული ჩვენება გაიმართება

„ბეჭდების მბრძანებლების“ გულშემატკივრებს ეძლევათ შესაძლებლობა, დიდ ეკრანებზე ნახონ პიტერ ჯექსონის საკულტო ფენტეზი-ტრილოგია, რომელიც პირველად 2001 წელს გამოჩნდა ეკრანებზე და უამრავი ადამიანის გული, მთელი მსოფლიოს მასშტაბით დაიპყრო.

26 სექტემბრიდან, ტრილოგიის სამივე ნაწილი მიყოლებით იქნება წარმოდგენილი „კავეას“ კინოთეატრებში. ეს ერთგვარი კინო-მარათონია, სადაც მაყურებელს სურვილისამებრ შეეძლება მთელი დღის კინოთეატრში გატარება, ან ფილმების ნახვა ერთი კვირის მანძლზე, სასურველ დროს.

ძველი ფილმების კინოთეატრებში დაბრუნება ბოლო პერიოდში საკმაოდ აქტუალური გახდა. მსოფლიოს ამ არაჩვეულებრივ ტენდენციას ფეხს უწყობს „კავეაც“, რომელსაც სურს გაახაროს თავისი მაყურებელი და გამორჩეული ფილმები დიდ ეკრანებზე დააბრუნოს.

„26 სექტემბერს, „კავეა გალერეაში“ დახურული ჩვენება მოეწყობა, გამომცემლობა „პალიტრა L”-თან ერთად, რომელსაც გამოცემული აქვს ჯორჯ მარტინის ტრილოგია ქართულ ენაზე და ფილმის ჩვენების პარალელურად, წარმოდგენილი იქნება წიგნების გამოფენა-გაყიდვაც. დახურულ ღონისძიებაზე მოვიწვიეთ ის ადამიანები, ვისაც ნაყიდი აქვს წიგნები და ფილმზე დასწრება უნდათ. „ბეჭდების მბრძანებლის“ ნამდვილ ფანებს მივეცით საშუალება, „კავეას“ და „პალიტრა L”-ის ფეისბუქ გვერდებზე მიეღოთ მონაწილეობა გათამაშებებში, მოეგოთ დახურულ ჩვენებაზე დასასწრები ბილეთები და დასწრებოდნენ სეანსს მოწვეულ სტუმრებთან ერთად. „ბეჭდების მბრძანებელზე“ მოთხოვნა იმდენად დიდი იყო, რომ თბილისი მოლის „კავეაში“ დავამატეთ ჩვენებები, სადაც არ გვქონდა გათვალისწინებული. ასევე, არ იყო გათვალისწინებული ჩვენება ბათუმშიც, რადგან კინოფესტივალი ემთხვევა, მაგრამ 3 ოქტომბრიდან ბათუმელ მაყურებელსაც ექნება ტრილოგიის ნახვის შესაძლებლობა. “. - ნინო სიხარულიძე - კავეას მარკეტინგის მენეჯერი

დახურული ჩვენება დაიწყება 20:00 საათზე, კავეა-გალერეაში. ადგილზე წარმოდგენილი იქნება თემატური აქტივობები: წიგნების გამოფენა-გაყიდვა, სხვადასხვა რეკვიზიტები, ფოტო-ჯიხური, მუსიკა ფოიეში, სიურპრიზები და სხვ.

R